দক্ষিণপূব দিল্লীৰ ঘিটৰ্নি নামৰ ঠাইখনত সংঘটিত হৈছে এটি চাঞ্চল্যকৰ ঘটনা।
এগৰাকী মহিলাক নিজ বাসগৃহত মৃত অৱস্থাত উদ্ধাৰ কৰা হয়।
মহিলাগৰাকীগৰাকীয়ে আত্মহত্যা কৰিছিল আৰু উলমি ৰোৱা অৱস্থাত উদ্ধাৰ হয়।
তেওঁৰ উপৰিও বাসগৃহৰ গা ধোৱা ঘৰত তেওঁলোকৰ দুই সন্তানক আঘাতপ্ৰাপ্ত অৱস্থাত উদ্ধাৰ কৰা হয়।
মহিলাগৰাকীৰ স্বামী হৈছে দিল্লী আৰক্ষীৰ এজন কনিষ্টবল।
অভিযোগ অনুসৰি, মহিলাগৰাকীয়ে তেওঁৰ দুই পুত্ৰক হত্যা কৰাৰ চেষ্টা কৰিছিল।
তেওঁৰ প্ৰথমটো সন্তানৰ বয়স ৩ আৰু দ্বিতীয় সন্তানৰ বয়স ৩ মাহ।
সন্তান দুটাক আঘাত কৰি সিহঁতক গা ধোৱা ঘৰত সোমোৱাই থয়।
আৰক্ষীয়ে কোৱা মতে, তাৰপাছতে তেওঁ এখন চিলিং ফেনত উলমি আত্মহত্যা কৰে।
সন্তান দুটাক ফ’ৰ্টিছ হস্পিতালত চিকিৎসাধীন হৈ আছে, ৩ মহীয়া সন্তানটোৰ অৱস্থা সংকটজনক।
আৰক্ষীয়ে কয় যে মহিলাগৰাকীৰ স্বামী তথা দিল্লীৰ বসন্তকুঞ্জত কৰ্তব্যৰত কনিষ্টবল সুশীলে পুৱা আৰক্ষীক খবৰ দিয়ে যে তেওঁ ঘৰৰ দুৱাৰ খুলিব পৰা নাই আৰু ভিতৰৰ পৰা কোনেও তেওঁক সহাৰি জনোৱা নাই।
তাৰপাছতে বসন্তকুঞ্জ আৰু বসন্ত বিহাৰৰ পৰা আৰক্ষীৰ এটা দল উক্ত স্থানত উপস্থিত হয় আৰু দোৱাৰখন ভাঙে।
তাৰপাছতে কনিষ্টবলজনৰ পত্নীক নিজ কোঠাত চিলিং ফেনত উলমি ৰোৱা অৱস্থাত উদ্ধাৰ কৰা হয়।
তদুপৰি পুত্ৰসন্তান দুটাকো গা ধোৱা ঘৰত অচেতন অৱস্থাত পোৱা যায়।
আৰক্ষীসূত্ৰই প্ৰকাশ কৰা মতে, কনিষ্টবল আৰু তেওঁৰ পত্নীৰ মাজত শেহতীয়াকৈ পাৰিবাৰিক অশান্তি বিৰাজ কৰিছিল।
সুশীলৰ পত্নীৰ নাম ৰাজেশ বুলি জানিব পৰা গৈছে।
তেওঁলোকে ২০১৪ চনত বিবাহপাশত আৱদ্ধ হৈছিল।
পত্নীগৰাকীয়ে আত্মহত্যা কৰাৰ সময়ত কনিষ্টবলজনে ৰাজস্থানত দুদিনৰ বাবে আছিল।
আৰক্ষীয়ে জনাইছে যে তেওঁলোকে এতিয়ালৈকে কাকো দোষী সাব্যষ্ট কৰা নাই কিন্তু মহিলাগৰাকীৰ পৰিয়াল অথবা কনিষ্টবলজনে যদি অভিযোগপত্ৰ দাখিল কৰে, তেন্তে এটা গোচৰ পঞ্জীয়ন কৰা হ’ব।
ইতিমধ্যে কনিষ্টবলজনক এখন স্থানীয় আৰক্ষী থানাত সোধাপোছৰ বাবে মতা হৈছে।
আনহাতে, মহিলাগৰাকীৰ পৰিয়ালে আৰক্ষীৰ আগত দিয়া এটা বিবৃত্তিত অভিযোগ কৰিছে যে স্বামীয়ে মহিলাগৰাকীৰ আগত যৌতুকৰ দাবী কৰি আছিল।
