স্বাধীনতা দিৱস আৰু গণৰাজ্য দিৱস – দুয়োটা দিন ভাৰতীয়ৰ বাবে অতি গুৰুত্বপূৰ্ণ আৰু গৌৰৱৰ দিন। দেশবাসীয়ে এই দিন দুটা উদযাপন কৰি ৰাষ্ট্ৰীয় পতাকা উত্তোলন কৰে। যদিও উদযাপনৰ মাজত কোনো পাৰ্থক্য দেখা নাযায়, তথাপিও পতাকা উত্তোলনৰ পদ্ধতিত কিছু পাৰ্থক্য দেখা যায়। কাৰণ দুয়োটা দিনেই বেলেগ বেলেগ ইতিহাসক প্ৰতিনিধিত্ব কৰে।
২০০ বছৰীয়া ব্ৰিটিছ শাসনৰ শিকলি ভাঙি ভাৰতে ১৯৪৭ চনৰ ১৫ আগষ্টত স্বাধীনতা লাভ কৰে। মূলতঃ স্বাধীনতা সংগ্ৰামীসকলৰ ত্যাগ আৰু অৱদানৰ কথা মনত ৰাখি স্বাধীনতা দিৱস পালন কৰা হয়। আনহাতে, স্বাধীনতাৰ তিনি বছৰৰ পাছত ১৯৫০ চনৰ ২৬ জানুৱাৰীত দেশত সংবিধান কাৰ্যকৰী হয়। ভাৰতবৰ্ষই বিশ্বৰ সৰ্ববৃহৎ গণৰাজ্য হিচাপে স্বীকৃতি লাভ কৰে। সেই উপলক্ষে ২৬ জানুৱাৰীত গণৰাজ্য দিৱস পালন কৰা হয়।
স্বাধীনতা দিৱসৰ দিনা পতাকা উত্তোলন কৰাটো ইংৰাজীত ‘Hoist’ বুলি কোৱা হয়। যিটোক অসমীয়াত উত্তোলন’ বোলা হয়। এই দিনটোত দিনটোত খুঁটাটোৰ তলত পতাকা বান্ধি দিয়া হয় আৰু ৰচীৰ সহায়ত পতাকাখন ওপৰলৈ তুলি লোৱা হয়। স্বাধীনতা দিৱসৰ দিনা লালকিল্লাত পতাকা উত্তোলন কৰে দেশৰ প্ৰধানমন্ত্ৰীয়ে।
আনহাতে গণৰাজ্য দিৱসৰ দিনা ৰাষ্ট্ৰীয় পতাকা উত্তোলন কৰা কাৰ্যক ইংৰাজীত ‘আনফাৰ্ল’ বুলি কোৱা হয়। যাৰ অসমীয়া অনুবাদ হৈছে ‘উন্মোচন’। আজিৰ দিনটোত পতাকাখন খুঁটাটোৰ ওপৰতে বান্ধি দিয়া হয়। ওপৰতে জাপি থোৱা পতাকাখন ৰচীৰ দ্বাৰা মুকলি কৰা হয়।
গণৰাজ্য দিৱসত ৰাজপথত জাতীয় পতাকা উত্তোলন কৰে দেশৰ ৰাষ্ট্ৰপতিয়ে। তাৰ পিছত দেশৰ বিভিন্ন প্ৰান্তৰ সংস্কৃতিক বৰ্ণাঢ্য কাৰ্যসূচীৰ জৰিয়তে প্ৰদৰ্শন কৰা হয়। ইয়াৰ বাহিৰেও বিভিন্ন অস্ত্ৰ-শস্ত্ৰ আৰু পেৰেডৰ জৰিয়তে ভাৰতীয় সামৰিক বাহিনীৰ শক্তি প্ৰদৰ্শন কৰা হয়।
