শেহতীয়াকৈ অসমৰ শিক্ষানগৰী হিচাবে খ্যাত যোৰহাটৰ মাজমজিয়াত সোমবাৰে এদল উন্মত্ত লোকে খেদি খেদি হত্যা কৰিলে সদৌ অসম ছাত্ৰ সন্থাৰ অক্লান্ত কৰ্মী অনিমেষ ভূঞাক।
অনিমেষৰ হত্যাকাণ্ডই কেৱল অসমেই নহয়, সমগ্ৰ দেশকে জোকাৰি গৈছে।ইয়াৰ পূৰ্বেও অসমত গণপ্ৰহাৰৰ কেইবাটাও ভয়াৱহ ঘটনা সংঘটিত হৈ গৈছে।
ইমানৰ পিছতো অসমত আজিলৈকে গণপ্ৰহাৰৰ বিৰুদ্ধে এখন কঠোৰ আইন বলবৎ পোৱা পৰিলক্ষিত হোৱা নাই।
উত্তৰ পূৰ্বাঞ্চলৰ ৰাজ্য কেইখনৰ ভিতৰত কেৱল মণিপুৰতহে সেই ৰাজ্যৰ চৰকাৰে গণপ্ৰহাৰৰ বিৰুদ্ধে আইন প্ৰণয়ন কৰিছে।
দেশৰ ভিতৰত কেৱল তিনিখন ৰাজ্যতহে গণ প্ৰহাৰৰ বিৰুদ্ধে আইন আছে । সেই ৰাজ্য দুখন হৈছে ক্ৰমে ৰাজস্থান, পশ্চিমবংগ আৰু মণিপুৰ।
মণিপুৰ বিধানসভাত ২০১৮ চনতে গণ প্ৰহাৰৰ বিৰুদ্ধে আইন প্ৰণয়ন কৰাৰ বিষয়ত এখন বিধেয়ক উত্থাপন কৰা হৈছিল আৰু সেই বিধেয়ক গৃহীত কৰি আইনত পৰিণত কৰা হৈছিল।
বিধেয়ক খনে ৰাজ্য খনৰ প্ৰতিখন জিলাত গণ প্ৰহাৰৰ দৰে নাৰকীয় অপৰাধ ৰোধ কৰিবলৈ একোজন নডেল বিষয়া নিযুক্তি দিয়াৰ পোষকতা কৰিছিল।
গণ প্ৰহাৰ ৰোধ কৰাত ব্যৰ্থ হোৱা আৰক্ষীক ১-৩ বছৰৰ কাৰাদণ্ডৰ লগতে ৫০ হাজাৰ টকাৰ জৰিমনা বিহাৰ বিধান ৰখা হৈছে।
এই ক্ষেত্ৰত চৰকাৰৰ কোনো অনুমোদন অবিহনেই কৰ্তব্যত গাফিলতি কৰা আৰক্ষীৰ বিৰুদ্ধে ব্যৱস্থা গ্ৰহণৰ দিহা কৰা হৈছিল।ৰাজস্থানতো গণ প্ৰহাৰৰ বিৰুদ্ধে কঠোৰ বিধেয়ক এখন বিধানসভাত উত্থাপন কৰা হৈছিল।
পৰৱৰ্তী সময়ত সেই বিধেয়ক আইনত পৰিণত হৈছে।
ৰাজস্থান চৰকাৰে ২০১৯ চনৰ আগষ্ট মাহত গণ প্ৰহাৰৰ বিৰুদ্ধে আইন প্ৰণয়ন কৰিছিল। পশ্চিমবংগৰ চৰকাৰেও তেনে এখন আইন প্ৰণয়ন কৰাৰ বাবে প্ৰচেষ্টা অব্যাহত ৰাখিছিল।
সেইমৰ্মে ২০১৯ চনৰ আগষ্ট মাহত পশ্চিমবংগৰ চৰকাৰে গণ প্ৰহাৰ প্ৰতিৰোধী আইন গ্ৰহণ কৰিছিল। এই আইন অনুসৰি ঘটনাত জৰিত অপৰাধীৰ যাবজ্জীৱন কাৰাদণ্ডৰ লগতে পাঁচ লাখ টকাৰ জৰিমনা বিহাৰ বিধান ৰখা হৈছে।
দেশৰ উচ্চতম ন্যায়ালয়ে ২০১৮ চনৰ জুলাই মাহতে গণ প্ৰহাৰৰ ঘটনাৰ তাৎক্ষণিক বিচাৰ কৰিবলৈ দেশৰ প্ৰতি খন ৰাজ্যৰ প্ৰতিখন জিলাত একো খনকৈ ফাষ্ট ট্ৰেক আদালত স্থাপনৰ নিৰ্দেশ দিছিল।
ন্যায়ালয়ে গণ প্ৰহাৰৰ বলি হোৱাসকলৰ লগতে তেওঁলোকৰ পৰিয়ালৰ পুনৰ সংস্থাপনৰো নিৰ্দেশ দিছিল।
ইমানৰ পিছতো দেশৰ প্ৰায় সংখ্যক ৰাজ্য আৰু কেন্দ্ৰীয় শাসিত অঞ্চলেই ন্যায়ালয়ৰ নিৰ্দেশ কাৰ্যকৰী নকৰাত পুনৰ ২০১৯ চনৰ জুলাই মাহত উচ্চতম ন্যায়ালয়ে সকলো ৰাজ্য আৰু কেন্দ্ৰীয় শাসিত অঞ্চললৈ জাননী জাৰি কৰি গণ প্ৰহাৰৰ প্ৰসংগত ৰাজ্য চৰকাৰ আৰু কেন্দ্ৰীয় শাসিত অঞ্চলসমূহে কেনেধৰণৰ পদক্ষেপ গ্ৰহণ কৰিছে সেয়া দাখিল কৰিবলৈ নিৰ্দেশ দিছিল।
কিন্তু সকলো ফুটুকাৰ ফেনত পৰিণত হ’ল। দেশৰ কেৱল তিনি খন ৰাজ্যইহে গণ প্ৰহাৰৰ বিৰুদ্ধে বিশেষ আইন প্ৰণয়ন কৰিলে।এই ক্ষেত্ৰত অসমত কেইবাটাও গণ প্ৰহাৰৰ ঘটনা ঘটি যোৱাৰ পিছতো অসম চৰকাৰে উচ্চতম ন্যায়ালয়ৰ ৰায়ৰ প্ৰতি বিশেষ কোনো গুৰুত্বই নহ’ল।
অসমত সেয়ে গণ প্ৰহাৰৰ যিবোৰ ঘটনা ঘটিবলৈ পালে সেইবোৰ অসম চৰকাৰ অমনোযোগিতা আৰু উদাসীনতাৰ ফলতে ঘটা ঘটনা বুলি কোৱাৰো নিশ্চয়কৈ থল আছে।
অসমত গণ প্ৰহাৰ প্ৰতিৰোধৰ কঠোৰ আইন এখন নথকাৰ বাবে বহুতে এনে ঘটনাত জৰিত হ’বলৈ কুণ্ঠাবোধ নকৰা হৈছে আৰু আইনৰ সুৰুঙাৰেও বাৰে বাৰে সাৰি গৈছে গণ প্ৰহাৰত জৰিত অপৰাধীসকল।
আৰক্ষীয়েও গণ প্ৰহাৰৰ বিষয়ত সতৰ্ক হৈ থকাৰ মনোভাৱ প্ৰদৰ্শন কৰিব পৰা নাই।
কাৰণ গণ প্ৰহাৰৰ ঘটনা ঘটিলেও সংশ্লিষ্ট অঞ্চলৰ দায়িত্বত থকা আৰক্ষীক শাস্তি বিহিব পৰা কোনো আইন অসমত নাই।
অভি-নীল হত্যাৰ ক্ষেত্ৰতো ফাষ্ট ট্ৰেক আদালতৰ কথা কোৱা হৈছিল।
কিন্তু ইমানৰ পিছতো সেই ঘটনাৰ অপৰাধীসকলকো আজি পৰ্যন্ত শাস্তি বিহিব পৰা নগ’ল। অনিমেষ হত্যাৰ ক্ষেত্ৰত তেনে নঘটক তাকেই কামনা কৰিছো।
