এতিয়াৰে পৰা দৃষ্টিহীনসকলৰ জীৱনৰ অন্ধকাৰ দূৰ কৰিবলৈ চকুৰ অস্ত্ৰোপচাৰৰ প্ৰয়োজন নহ’ব, বৰঞ্চ প্ৰযুক্তিৰ যাদুৰে তেওঁলোকৰ জীৱন পোহৰাই তুলিব পৰা যাব। দৃষ্টিহীন লোকসকলৰ দৈনিক জীৱনযাপনৰ পদ্ধতি সম্পূৰ্ণ সলনি কৰি এক নতুন দিশৰ সূচনা কৰিছে মাৰ্ক জুকাৰবাৰ্গৰ প্ৰতিষ্ঠান মেটায়ে। তেওঁলোকে প্ৰস্তুত কৰা বিশেষ কৃত্ৰিম বুদ্ধিমত্তা বা এআই চালিত স্মাৰ্ট চশমাই এতিয়া বিশেষভাৱে সক্ষম লোকসকলৰ বাবে আশাৰ ৰেঙণি কঢ়িয়াই আনিছে। যিসকল লোকে চকুৰে নেদেখে অথবা যাৰ চলাফুৰা কৰাত বিভিন্ন ধৰণৰ সমস্যা হয়, তেওঁলোকৰ বাবে এই চশমা আচৰিত ধৰণে কাম কৰিব। ইয়াৰ ফলত পকেটৰ পৰা বাৰে বাৰে স্মাৰ্টফোন উলিয়াই থকাৰ জঞ্জাল একেবাৰতে নোহোৱা হ’ব আৰু ফোন স্পৰ্শ নকৰাকৈ কেৱল মুখৰ কথা আৰু ইংগিতৰ জৰিয়তে সকলো কাম কৰিব পৰা যাব।
এই স্মাৰ্ট চশমাত বহুতো উন্নত ধৰণৰ সুবিধা সংযোজন কৰা হৈছে। ৰে-বেন বা ওকলেৰ দৰে জনপ্ৰিয় ব্ৰেণ্ডৰ এই মেটা চশমাখন পিন্ধি কেৱল এবাৰ মুখেৰে ক’লেই হ’ব যে মেটা মোৰ চকু হোৱা। ইয়াৰ লগে লগে কোনো ধৰণৰ বুটাম বা স্ক্ৰীন স্পৰ্শ নকৰাকৈয়ে আপোনাৰ আপোনজনৰ ওচৰলৈ এটা ভিডিঅ’ কল গুচি যাব। ফলত কলৰ সিপাৰে থকা ব্যক্তিজনে লাইভ ভিডিঅ’ চাই আপোনাৰ সন্মুখত কি আছে বা কি বাধা আছে, সেই সকলোবোৰ কথা লগে লগে কৈ দিব পাৰিব। কেৱল সিমানেই নহয়, হোৱাটছএপ বা ইনষ্টাগ্ৰামৰ ফোন কল ৰিচিভ কৰা, কটা বা মিউট কৰাৰ দৰে কামবোৰো এতিয়া কেৱল কণ্ঠস্বৰৰ জৰিয়তে কৰিব পৰা যাব। ইয়াৰ উপৰিও চশমাযোৰত থকা এটা বুটামত আলফুলকৈ চুই দিলেই মেটা এআইয়ে আপোনাৰ চাৰিওফালৰ পৰিৱেশটো কেনেকুৱা, তাৰ এটা নিখুঁত বৰ্ণনা মুখেৰে দি দিব।
বৰ্তমান সমগ্ৰ বিশ্বতে কোটি কোটি লোক কিবা নহয় কিবা শাৰীৰিক প্ৰত্যাহ্বানৰ মুখামুখি হৈ আহিছে। তেনে লোকসকলক আনৰ ওপৰত নিৰ্ভৰ নকৰাকৈ স্বাৱলম্বী কৰি গঢ়ি তুলিবলৈ এই প্ৰযুক্তি এতিয়া এটা মহৌষধৰ দৰে প্ৰমাণিত হৈছে। ইয়াৰ এটা ডাঙৰ উদাহৰণ হৈছে ইৰাক যুদ্ধত চকুৰ দৃষ্টি হেৰুওৱা আমেৰিকাৰ প্ৰাক্তন সেনা ডোনাল্ড অভাৰটন। তেওঁ এতিয়া এই চশমা পিন্ধিয়েই কোনো সহায় নোলোৱাকৈ ৰেস্তোৰাঁৰ মেনু কাৰ্ড পঢ়িব পাৰে আৰু বিমানবন্দৰত অকলে অকলে ঘূৰি ফুৰিব পাৰে। ঠিক তেনেদৰে হাত-ভৰি লৰচৰ কৰিব নোৱাৰা নোৱা কাৰিয়া নামৰ এজন ব্যক্তিয়েও হাত ব্যৱহাৰ নকৰাকৈ কেৱল মুখৰ কথাৰেই অতি সুন্দৰ ছবি আৰু ভিডিঅ’ তুলিবলৈ সক্ষম হৈছে।
মেটাই কেৱল এইখিনিতে থমকি ৰোৱা নাই, তেওঁলোকে আন আন এপ প্ৰস্তুতকৰ্তা কোম্পানীবোৰৰ বাবেও এই প্ৰযুক্তিৰ দুৱাৰ মুকলি কৰি দিছে। ইয়াৰ ফলত ওৰিয়নৰ দৰে এপ্লিকেচনে এতিয়া দৃষ্টিহীন লোকসকলক নিজৰ ঘৰৰ চাবি বা প্ৰয়োজনীয় বস্তু বিচাৰি উলিয়াত সহায় কৰিছে আৰু আলিবাটৰ বিপদসমূহ এৰাই চলিবলৈ পথ দেখুৱাইছে। তদুপৰি কাৰ্নেগী মেলন ইউনিভাৰ্চিটিৰ সৈতে মিলি মেটায়ে এনে এটা ৰিষ্টবেণ্ড বা হাতত পিন্ধা বেণ্ড তৈয়াৰ কৰি আছে, যিয়ে মানুহৰ মাংসপেশীৰ সংকেত বুজি কাম কৰিব। ইয়াৰ দ্বাৰা মেৰুদণ্ডৰ আঘাতপ্ৰাপ্ত ৰোগীসকলেও কেৱল বিভিন্ন ইলেক্ট্ৰনিক সঁজুলি নিয়ন্ত্ৰণ কৰিব পাৰিব। বিজ্ঞানৰ এই অভূতপূৰ্ব প্ৰগতিয়ে মানুহৰ জীৱন ধাৰণৰ মান যিদৰে সলনি কৰি দিছে, সেয়া সঁচাকৈয়ে কোনো ৰূপকথাৰ কাহিনীতকৈ কম নহয়।
