শালকোচা আৰক্ষীয়ে কৰায়ত্ব কৰা এটা চোৰৰ দেহত কোভিড-১৯ ৰ অৱস্থিতি ধৰা পৰাৰ পিছতে চোৰটোক চিকিৎসালয়লৈ স্বাস্থ্য পৰীক্ষাৰ বাবে নিয়া আৰক্ষীৰ লোকসকল চিন্তিত হৈ পৰিছে।
কিয়নো আক্ৰান্ত চোৰটোৰ পৰা আৰক্ষীৰ দেহলৈও কোভিড সংক্ৰমিত হোৱাৰ পূৰ্ণ সম্ভাৱনা আছে।
উল্লেখ্য পশ্চিম অসমৰ বিলাসীপাৰা মহকুমাৰ চাপৰ থানাৰ অন্তৰ্গত শালকোচা আৰক্ষী চকীৰ এলাকাধীন শ্ৰীগ্ৰাম ষষ্ঠ খণ্ডকে ধৰি কেবাঠাইত শালকোচা আৰক্ষীয়ে এক গোপন সূত্ৰৰ পমখেদি ৰেজাউল কৰিম ৰাজু (১৭) , জহিৰ উদ্দীন(১৭) আৰু সবুৰ আলী(২৫) নামে তিনি গৰাকী দুৰ্ধৰ্ষ চোৰক আটক কৰিবলৈ সক্ষম হয় ।
চোৰ কেইজনক চাপৰ চিকিৎসা লয়ত স্বাস্থ্য পৰীক্ষা কৰাবলৈ অনা হয়।
কোভিড পৰীক্ষাৰ সময়তে ৰেজাউল কৰিম ৰাজু নামৰ চোৰটোৰ দেহত কোভিড-১৯ ৰ অৱস্থিতি ধৰা পৰে ।
উল্লেখ্য যোৱা বুধবাৰে শালকোচা আৰক্ষী চকীৰ অন্তৰ্গত নিউহাতীপোতা বজাৰৰ সমীপত থকা আব্দুল ওহাব আৰু আব্দুল ৰহিম নামে দুই ভাই-ককাইৰ ঘৰত গভীৰ নিশা প্ৰৱেশ কৰি গৰাকীক অচেতন কৰি কেবা লক্ষাধিক মূল্যৰ সোণ -ৰূপৰ আ-অলংকাৰ আৰু নগদ ৮০ হাজাৰ টকা লুটি নিছিল বুলি পৰিয়ালটোৰ মুৰব্বী তথা সমাজকৰ্মী আব্দুৰ ৰাজ্জাকে জনাইছে।
ধৃত তিনি গৰাকী চোৰৰ ভিতৰত সবুৰ আলী আৰু জহিৰ উদ্দিনক জেল লৈ প্ৰেৰণ কৰা হৈছে ।
ইপিনে ৰেজাউল কৰিম ৰাজু নামৰ চোৰটোৰ গাত কোভিড-১৯ ৰ অৱস্থিতি ধৰা পৰাৰ বাবে চোৰটোক বিলাসীপাৰা মহকুমাৰ অন্তর্গত দ্বীপৰকুটি কোভিড হস্পিতাল লৈ প্ৰেৰণ কৰা হৈছে বুলি শালকোচা আৰক্ষী সূত্ৰে প্ৰকাশ ।
