প্ৰধানমন্ত্ৰী নৰেন্দ্ৰ মোদীক বহুমূলীয়া পৰামৰ্শ প্ৰদান কৰিছে প্ৰাক্তন প্ৰধানমন্ত্ৰী ডঃ মনমোহন সিঙে।
প্ৰধানমন্ত্ৰীৰ পদত থাকিলে ভাবি-চিন্তি কথা ক’ব লাগে, নহ’লে বিপদত পৰিব লগা হয়। এই মন্তব্য প্ৰাক্তন প্ৰধানমন্ত্ৰী গৰাকীৰ।
প্ৰাক্তন প্ৰধানমন্ত্ৰী ডঃ সিঙে কয় যে ‘শব্দৰ গুৰুত্ব বুজি’হে সীমান্তৰ বিবাদ সম্পৰ্কত প্ৰধানমন্ত্ৰী নৰেন্দ্ৰ মোদীয়ে কথা কোৱা উচিত।
লাডাখৰ গালৱান উপত্যকাৰ ভাৰত-চীনৰ ৰক্তক্ষয়ী সংঘৰ্ষৰ পিছত প্ৰধানমন্ত্ৰী নৰেন্দ্ৰ মোদীয়ে এক সৰ্বদলীয় বৈঠকৰ আহ্বান কৰিছিল।
উক্ত সৰ্বদলীয় বৈঠকত প্ৰধানমন্ত্ৰী মোদীয়ে কৈছিল, “ভাৰতৰ কোনো ভূখণ্ড বা প’ষ্ট বেদখল হোৱা নাই।”
ইয়াৰ পিছতে প্ৰধানমন্ত্ৰী মোদীৰ লগতে শাসক দলক বিৰোধীয়ে আক্ৰমণৰ লক্ষ্য কৰি লয়। আনকি দেশৰ জনতায়ো চ’ছিয়েল মিডিয়াৰ যোগেদি মোদীক তীব্ৰ সমালোচনা আৰু ককৰ্থনা কৰাৰ পৰিলক্ষিত হয়।
বিৰোধীয় প্ৰশ্ন তুলিলে, যদি চীনে ভাৰতৰ ভূমি দখল কৰাই নাই তেনে ৰক্তক্ষয়ী সংঘৰ্ষত কেনেকৈ ২০ জনকৈ ভাৰতীয় সেনা ছহিদ হ’ল?
আনহাতে উপগ্ৰহীয় চিত্ৰত চীনে ভাৰতৰ ভূমখণ্ড দখল কৰাৰ স্পষ্ট প্ৰমাণ পোৱা গৈছে।
আনকি গালৱান উপত্যকা চীনৰ বুলি প্ৰধানমন্ত্ৰী মোদীয়ে মানি লৈছে নেকি বুলি প্ৰশ্ন কৰিও বিৰোধীয়ে আক্ৰমণ কৰে।
এই বিতৰ্কৰ মাজতে দেশৰ দুটা কাৰ্যকালৰ প্ৰাক্তন প্ৰধানমন্ত্ৰী ডঃ মনমোহন সিঙে নিজৰ প্ৰতিক্ৰিয়া প্ৰকাশ কৰিছে এক বিবৃতিৰ যোগে।
প্ৰাক্তন প্ৰধানমন্ত্ৰী ডঃ সিঙে কয়, “আমি এক ঐতিহাসিক ক্ষণত উপস্থিত হৈছো। চৰকাৰৰ কাম কাজে আমাৰ ভৱিষ্যৎ প্ৰজন্মই কি দেখিব সেয়া নিৰ্ণয় কৰিব। যিয়ে দেশক নেতৃত্ব দিয়ে তেওঁ নিজৰ কৰ্তব্যৰ গুৰুত্ব বুজা উচিত। আমাৰ গণতন্ত্ৰই সেই দায়িত্ব প্ৰধানমন্ত্ৰীৰ কাৰ্যালয়ক প্ৰদান কৰিছে। সেয়ে প্ৰধানমন্ত্ৰীয়ে ব্যৱহাৰ কৰা শব্দই দেশৰ নিৰাপত্তা ও সাৰ্বভৌমত্বৰ ক্ষেত্ৰত কি তাৎপৰ্য বহন কৰিব পাৰে সেয়া মনত ৰখা উচিত।”
প্ৰধানমন্ত্ৰী মোদীৰ উক্ত মন্তব্যক চীনে এক হাতিয়াৰ হিচাপে ব্যহাৰ কৰিছে বুলিও মন্তব্য কৰে প্ৰাক্তন প্ৰধানমন্ত্ৰীগৰাকীয়ে।
