হংকঙত তিনিটা দশকৰ ভিতৰত সংঘটিত হোৱা এক ভয়াৱহ অগ্নিকাণ্ডৰ ফলত উচ্চ আৱাসিক টাৱাৰত বাস কৰা ৪৪ জন লোকৰ মৃত্যু হোৱাৰ লগতে প্ৰায় ৩০০ লোক নিৰুদ্দিষ্ট হৈ পৰে।
স্থানীয় সংবাদ মাধ্যমে প্ৰকাশ কৰা অনুসৰি, এই ঘটনাৰ সৈতে জড়িত থকাৰ সন্দেহত আৰক্ষীয়ে নিৰ্মাণ কোম্পানীৰ তিনিজন লোকক অনিচ্ছাকৃত নৰহত্যাৰ অভিযোগত গ্ৰেপ্তাৰ কৰে। আৰক্ষীৰ মতে, আটক কৰা লোকসকলৰ অৱহেলাৰ বাবে জুই লগাৰ সম্ভাৱনা আছে।
পুনৰ নিৰ্মাণ চলি থকা ৩২ মহলীয়া অট্টালিকাৰ বাহিৰত থকা বাঁহৰ তৰপত দুপৰীয়াৰ ভাগত জুই লাগে আৰু আঠটা টাৱাৰৰ সাতটা অট্টালিকাত দ্ৰুতগতিত জুই বিয়পি পৰে।
ধ্বংসাৱশেষ আৰু জ্বলি থকা বাঁহসমূহৰ পৰা ৰক্ষা পাবলৈ শ শ বাসিন্দা, যাৰ বহুতেই বৃদ্ধ, সেই স্থান খালী কৰিবলৈ বাধ্য হয়। অগ্নিনিৰ্বাপক বাহিনীয়ে জুইৰ সৈতে যুঁজি থকাৰ সময়তে প্ৰায় ৯০০ লোকক অস্থায়ী আশ্ৰয় শিবিৰলৈ স্থানান্তৰ কৰা হয় আৰু ১৪০খনতকৈও অধিক অগ্নিনিৰ্বাপক গাড়ী আৰু ৬০খন এম্বুলেন্স নিয়োগ কৰা হয়।
হংকঙৰ মুখ্য কাৰ্যবাহী জন লীয়ে কয় যে জৰুৰীকালীন ক্ৰুৱে নিৰুদ্দিষ্ট হোৱা বাসিন্দাসকলৰ সন্ধান অব্যাহত ৰখাৰ সমান্তৰালভাৱে এক উচ্চ পৰ্যায়ৰ তদন্ত ঘোষণা কৰিছে। আৰক্ষী আৰু অগ্নিনিৰ্বাপক বাহিনীয়ে ইতিমধ্যে এটা বিশেষ দল গঠন কৰি অগ্নিকাণ্ডৰ কাৰণ অনুসন্ধান কৰি আছে।
চীনৰ ৰাষ্ট্ৰপতি ছি জিনপিঙে অভিযানত নিহত অগ্নিনিৰ্বাপক বাহিনীৰ জোৱানজনৰ বাবে শোক প্ৰকাশ কৰাৰ লগতে নিহতসকলৰ পৰিয়াললৈ সমবেদনা জ্ঞাপন কৰে।
উল্লেখ্য যে চহৰখনৰ ইতিহাসত এইটোৱেই অন্যতম ভয়াৱহ অগ্নিকাণ্ড। ১৯৯৬ চনৰ নৱেম্বৰ মাহত হংকঙৰ ‘গাৰ্লেই বিল্ডিং‘ত শেষবাৰৰ বাবে একেধৰণৰ ভয়াৱহ অগ্নিকাণ্ড সংঘটিত হৈছিল, য’ত ৪১ জন লোকৰ মৃত্যু হৈছিল।
