ধাৰাবাহিক বিস্ফোৰণে কঁপাই গ’ল ইজৰাইলক। ইজৰাইল আৰক্ষীয়ে জনোৱা মতে, ৰাজধানী টেল আভিভৰ দক্ষিণ উপকণ্ঠ অঞ্চলত তিনিখন বাছত বিস্ফোৰণ ঘটিছে। বাছ খালী হোৱাৰ বাবে কোনো লোক আহত হোৱা নাই। তদুপৰি আৰু দুখন বাছৰ পৰা বিস্ফোৰক সামগ্ৰী উদ্ধাৰ কৰা হয়।
ইজৰাইলে এই ঘটনাক সন্ত্ৰাসবাদী আক্ৰমণ বুলি অভিহিত কৰিছে। ইয়াৰ আঁৰত পেলেষ্টাইনী উগ্ৰপন্থী সংগঠন আছে বুলি অভিযোগ উত্থাপন কৰিছে ইজৰাইলৰ প্ৰতিৰক্ষা মন্ত্ৰীয়ে। অৱশ্যে এতিয়ালৈকে কোনো উগ্ৰপন্থী সংগঠনে এই বিস্ফোৰণৰ দায়িত্ব স্বীকাৰ কৰা নাই।
টেল আভিভৰ বাট ইয়াম আৰু হোলন অঞ্চলত এই বিস্ফোৰণ সংঘটিত হোৱা বুলি জানিব পৰা গৈছে। প্ৰথম দুটা বিস্ফোৰণ সংঘটিত হয় বেট ইয়াম ডিপোত থকা খালী বাছত। তৃতীয়টো বিস্ফোৰণ সংঘটিত হয় হোলনত ৰখাই থোৱা এখন বাছত। তাত আৰু দুখন বাছৰ পৰা বিস্ফোৰক উদ্ধাৰ কৰে আৰক্ষীয়ে।
এই কাণ্ড সন্দৰ্ভত ইজৰাইল আৰক্ষীৰ এক বিবৃতিত কোৱা হৈছে যে, বিস্ফোৰণৰ পিছত বহু সন্দেহজনক বস্তু পৰীক্ষা কৰা হৈছিল। বোমা নিষ্কাশন দলটোৱে বাছ দুখনত বিস্ফোৰক সামগ্ৰীৰ বাহিৰে একো নাপালে। বাট ইয়াম আৰু হোলনত বৃহৎ সংখ্যক নিৰাপত্তাৰক্ষী মোতায়েন কৰা হৈছে।
আৰক্ষীৰ সূত্ৰই প্ৰকাশ কৰিছে যে একেধৰণৰ বিস্ফোৰক ব্যৱহাৰ কৰি এই বিস্ফোৰণ সংঘটিত কৰা হৈছে। ইজৰাইলে দাবী কৰিছে যে টাইমাৰৰ দ্বাৰা বিস্ফোৰণ ঘটোৱা হৈছে। ইজৰাইলী আৰক্ষীৰ এগৰাকী মুখপাত্ৰই কয় যে এই ঘটনাত ব্যৱহৃত বিস্ফোৰকসমূহ ৱেষ্ট বেংকত ব্যৱহাৰ কৰা বিস্ফোৰকসমূহৰ সৈতে মিল আছে।
যদিও তিনিখন বাছত বিস্ফোৰণ ঘটিছিল, তথাপিও খালী হৈ থকাৰ বাবে কোনো লোকৰ মৃত্যু হোৱা নাই। বাট য়ামৰ মেয়ৰেও এই বিষয়ত আচৰিত হৈছে। বিস্ফোৰণৰ পিছতে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে টেল আভিভৰ বাবে কটকটীয়া নিৰাপত্তা গঢ়ি তোলাৰ নিৰ্দেশ দিছে। তেওঁ নিৰাপত্তা সংস্থাক বিস্ফোৰণৰ তদন্তৰ নিৰ্দেশ দিছে।
ইজৰাইলৰ প্ৰতিৰক্ষা মন্ত্ৰীয়ে এই বিস্ফোৰণৰ বাবে ৱেষ্ট বেংকত থকা পেলেষ্টাইনী উগ্ৰপন্থীৰ পিনে আঙুলিয়াইছে। তেওঁ ইজৰাইল প্ৰতিৰক্ষা বাহিনীক তুলকাৰেম অঞ্চলৰ পেলেষ্টাইনী শৰণাৰ্থী শিবিৰত অভিযান তীব্ৰতৰ কৰিবলৈ নিৰ্দেশ দিছে।
ইজৰাইলৰ বাছত বোমা বিস্ফোৰণৰ ভয়ানক ইতিহাস আছে। ২০০০ চনৰ পৰা ২০০৫ চনৰ ভিতৰত পেলেষ্টাইনী আত্মঘাতী বোমাৰুৱে তাত একাধিক বাছ বিস্ফোৰণ কৰি সাধাৰণ ইজৰাইলী নাগৰিকৰ মৃত্যু ঘটায়। ২০২২ চনৰ নৱেম্বৰ মাহত জেৰুজালেমত এখন বাছত দুটা বিস্ফোৰণ সংঘটিত হৈছিল। তাত কেইবাজনো লোকে প্ৰাণ হেৰুৱাইছিল।
উল্লেখ্য যে ২০২৩ চনৰ ৭ অক্টোবৰত হামাছে গাজা ষ্ট্ৰিপৰ পৰা ইজৰাইলৰ ওপৰত ৰকেট আক্ৰমণ চলায়। সেই আক্ৰমণত ১২০০ৰো অধিক ইজৰাইলী নাগৰিকৰ মৃত্যু হয়। ইয়াৰ পিছত ইজৰাইলে এবছৰতকৈও অধিক সময় ধৰি গাজা ষ্ট্ৰিপত প্ৰত্যাক্ৰমণ চলাই আহিছে। শেহতীয়াকৈ হামাছ আৰু ইজৰাইলৰ মাজত যুদ্ধবিৰতি চুক্তি কৰা হৈছে। ইয়াৰ মাজতে সংঘটিত হৈছে এই বিস্ফোৰণ।
