“কেব” কেৱল অসমীয়া বা ত্ৰিপুৰাৰ সমস্যা নহয়; ই কেৱল জাতি, ভাষা, সংস্কৃতিৰ সংকটৰ কাৰণ নহয়। ই ভাৰতৰ মূল মতাদৰ্শটোৰ বিৰুদ্ধে, ভাৰতৰ সংবিধানৰ মৌলিক বৈশিষ্ট্যটোৰ বিৰুদ্ধে এটা খোজ।
পশ্চিম বংগৰ মুখ্য মন্ত্ৰী মমতা বেনাৰ্জীৰ “কেব” বিৰোধিতাই এই কথা প্ৰমাণ কৰাৰ পিছত পাঞ্জাব আৰু কেৰালাৰ মুখ্য মন্ত্ৰীদ্বয়েও একেই স্থিতি লৈ ইয়াক অধিক প্ৰকট কৰিলে।
ঘাইকৈ অবৈধ হিন্দু বাঙালীক নাগৰিকত্ব দিবলৈ অনা “কেব”ক পশ্চিম বংগত কাৰ্য্যকৰী কৰিবলৈ দিয়া নহ’ব বুলি যোৱা ৬ ডিচেম্বৰত স্পষ্ট কৰি দিছিল ৰাজ্যখনৰ মুখ্য মন্ত্ৰী মমতা বেনাৰ্জীয়ে।
“তোমালোকে লোকসভা আৰু ৰাজ্যসভাত আইন গৃহীত কৰিব পাৰা, কাৰণ তোমালোকৰ হাতত সংখ্যা আছে। কিন্তু আমি তোমালোকক দেশখন বিভাজন কৰিবলৈ নিদিওঁ। সকলোৱে মুখ বন্ধ ৰাখিলেও মই মাত মাতিম, আনকি মই ইয়াৰ বাবে মৃত্যুও আঁকোৱালিম”, ইণ্ডিয়ান এক্সপ্ৰেছত মমতা বেনাৰ্জীৰ উদ্ধৃতি। তেওঁ ধৰ্মৰ ভিত্তিত নাগৰিকত্ব কিয় বুলি প্ৰশ্নও কৰে।
বেনাৰ্জীৰ পিছতে ১২ ডিচেম্বৰত একেই স্থিতিৰে কেৰালাৰ মুখ্য মন্ত্ৰী পিনাৰায়ী বিজয়ন আৰু পাঞ্জাবৰ মুখ্য মন্ত্ৰী কেপ্টেইন অমৰিন্দৰ সিঙে কয় যে তেওঁলোকে তেওঁলোকৰ ৰাজ্যত “কেব” কাৰ্য্যকৰী হ’বলৈ নিদিয়ে।
The Citizenship Amendment Bill is an attack on the secular and democratic character of India. The move to decide citizenship on the basis of religion amounts to a rejection of the Constitution. It will only take our country backward. Our hard-fought freedom is at stake. pic.twitter.com/Yg9Y8QJLUx
— Pinarayi Vijayan (@vijayanpinarayi) December 11, 2019
“বিধেয়কখন অসাংবিধানিক” বুলি মন্তব্য কৰি পিনাৰায়ী বিজয়নে কয়, কেন্দ্ৰীয় তালিকাত থাকিলেও ৰাজ্য চৰকাৰক এই আইনখন প্ৰয়োগ কৰিবলৈ বাধ্য কৰাব নোৱাৰে।
“আমাৰ গণতন্ত্ৰ বিপদত। কেবৰ জৰিয়তে সংঘ পৰিবাৰে সংসদত তেওঁলোকৰ সংখ্যাগৰিষ্ঠতা থকাৰ সুযোগ লৈ ভাৰত গণতন্ত্ৰ আৰু সংবিধানৰ আধাৰটো ধ্বংস কৰিব খুজিছে। ই হ’ল ধৰ্মনিৰপেক্ষতা প্ৰত্যাখ্যান। বিজেপিয়ে এইটো স্পষ্ট কৰি দিলে যে তেওঁলোকৰ মূল ৰাজনৈতিক উদ্দেশ্য হ’ল সাম্প্ৰদায়িকতা। আমি ইয়াক বাধা দিবই লাগিব”, এটা টুইটত বিজয়নৰ মত।
অমৰিন্দৰ সিঙে “কেব”ক ভাৰতৰ ধৰ্মনিৰপেক্ষ চৰিত্ৰৰ ওপৰত স্পষ্ট আঘাত বুলি মন্তব্য কৰিছে। তেওঁৰ চৰকাৰে এইখন পাঞ্জাবত প্ৰয়োগ হ’বলৈ নিদিয়ে বুলি দৃঢ়তাৰে কয়।
Any legislation that seeks to divide people on religious lines is illegal, unethical & unconstitutional. India's strength lies in its diversity and #CABBill2019 violates the basic principle of the constitution. Hence my govt will not allow the bill to be implemented in Punjab.
— Capt.Amarinder Singh (@capt_amarinder) December 12, 2019
১২ ডিচেম্বৰত তেওঁৰ এটা টুইট দেখা গৈছে, যিটোত কৈছে, “ধৰ্মৰ ভিত্তিত মানুহক ভাগ কৰিব খোজা যিকোনো আইনেই অবৈধ, অনৈতিক আৰু অসাংবিধানিক। ভাৰতৰ শক্তি নিহিত আছে বৈচিত্ৰ্যৰ মাজত আৰু “কেব”খনে সংবিধানৰ বুনিয়াদী নীতি উলংঘা কৰিছে। গতিকে মোৰ চৰকাৰে বিধেয়কখন পাঞ্জাবত কাৰ্য্যকৰী হ’বলৈ নিদিয়ে”।
তেওঁৰ চৰকাৰে এইখনৰ প্ৰয়োগত বাধা দিব বুলি সংবাদ মাধ্যমক জানিবলৈ দি কয়, এখন নিৰ্বাচিত চৰকাৰৰ দায়িত্ব হ’ল সংবিধানত থকা মূল্যৱান মূল্যবোধবোৰক প্ৰোৎসাহিত কৰা, ধ্বংস কৰাটো নহয়।
