ডিব্ৰুগড় চহৰত শেহতীয়াকৈ ৰাজপথৰ কুকুৰ নিৰুদ্দেশ হোৱাক লৈ সৃষ্টি হোৱা জনসাধাৰণৰ শংকা এতিয়া এক নতুন মোৰ লৈছে। মঙলবাৰে নিশা প্ৰায় ২ বজাত ডিব্ৰুগড় আৰক্ষীয়ে তহল দি থকা অৱস্থাত এখন সন্দেহযুক্ত বাহন প্ৰত্যক্ষ কৰে। চহৰখনৰ ভিতৰত এএছ-০২জেড-৫৩৮৬ নম্বৰৰ গাড়ীখন অস্বাভাৱিকভাৱে চলাচল কৰি থকা দেখি আৰক্ষীৰ দলটোৱে গাড়ীখনৰ পিছে পিছে গৈ অৱশেষত তালাচীৰ বাবে ৰখায়। গাড়ীখনত থকা তিনিজন যুৱকক আৰক্ষীয়ে আটক কৰে। ধৃত যুৱককেইজন কাৰ্বি আংলং জিলাৰ বাসিন্দা ছয়ংকিৰি ৰংফাৰ, ৱাইচং ৰংপি আৰু ছেনচেন হামছে বুলি চিনাক্ত কৰা হৈছে।
আৰক্ষীয়ে গাড়ীখনত তালাচী চলোৱাৰ সময়ত ১৫ টাকৈ চাউলৰ খালী বস্তা, ৰছী, বিস্কুটৰ পেকেট আৰু তিনিটা মবাইল ফোন উদ্ধাৰ কৰে। এই সামগ্ৰীসমূহ উদ্ধাৰ হোৱাৰ পিছতে সমগ্ৰ চহৰখনতে তীব্ৰ চাঞ্চল্যৰ সৃষ্টি হৈছে। উল্লেখযোগ্য যে বিগত কেইবামাহো ধৰি ডিব্ৰুগড়ৰ পৰা ৰহস্যজনকভাৱে বহুতো পথৰ কুকুৰ সন্ধানহীন হৈ আছিল। স্থানীয় ৰাইজ আৰু পশু প্ৰেমীসকলে নিশাৰ ভাগত কুকুৰবোৰ চুৰি হোৱাৰ সন্দেহ কৰি আহিছিল। এতিয়া আটক কৰা যুৱককেইজনৰ পৰা উদ্ধাৰ হোৱা সামগ্ৰীসমূহে এই সন্দেহক অধিক দৃঢ় কৰি তুলিছে।
বৰ্তমান ডিব্ৰুগড় আৰক্ষীয়ে আটক কৰা যুৱককেইজনক অধিক সোধা-পোছা অব্যাহত ৰাখিছে। মাজনিশা তেওঁলোকে কি উদ্দেশ্যত এনে সামগ্ৰী লৈ চহৰখনত ঘুৰি ফুৰিছিল আৰু ইয়াৰ সৈতে পূৰ্বৰ ঘটনাৰ কিবা সম্পৰ্ক আছে নেকি সেই বিষয়ে তদন্ত চলাই থকা হৈছে। তেওঁলোকৰ মবাইল ফোনসমূহো পৰীক্ষা কৰি থকা হৈছে যাতে এই চক্ৰটোৰ সৈতে আন কোনো জড়িত আছে নেকি সেইটো জানিব পৰা যায়। আৰক্ষীৰ মতে এই ঘটনাৰ আঁৰত এটা ডাঙৰ দল থাকিব পাৰে বুলিও সন্দেহ কৰা হৈছে।
এই ঘটনাই স্থানীয় পশু প্ৰেমী তথা সচেতন নাগৰিকৰ মাজত তীব্ৰ ক্ষোভৰ সৃষ্টি কৰিছে। পশু কল্যাণ কৰ্মীসকলে এই ঘটনাক মানৱতাহীন কাৰ্য বুলি অভিহিত কৰিছে আৰু দোষীৰ বিৰুদ্ধে কঠোৰ ব্যৱস্থা ল’বলৈ দাবী জনাইছে। ডিব্ৰুগড় আৰক্ষীয়ে জনোৱা অনুসৰি তদন্তৰ পিছতহে সমগ্ৰ ৰহস্য পোহৰলৈ আহিব আৰু আগন্তুক দিনত অধিক তথ্য ৰাজহুৱা কৰা হ’ব।
