বিহালী সমষ্টিৰ কেটেলা চাহ বাগিচাত আজি এটা বাঘৰ অতৰ্কিত আক্ৰমণত এগৰাকী মহিলাসহ চাৰি গৰাকী শ্ৰমিক গুৰুতৰভাৱে আহত হ’বলগীয়া হয়।
প্ৰাপ্ত খবৰ মতে প্ৰায় ৩ বজাত ৰাষ্ট্ৰীয় ঘাইপথৰ কাষৰ বাগিচাখনত প্ৰায় ২ শতাধিক শ্ৰমিকে পাত তুলি থকা অৱস্থাত অতৰ্কিতে এটা বাঘ বাগিচাৰ মাজৰ পৰা ওলাই আহি আনতী প্ৰজা (২৬) নামৰ মহিলা গৰাকীৰ ওপৰত জপিয়াই পৰে।
বাঘৰ আক্ৰমণত মহিলা গৰাকী মুখমণ্ডল, বুকু আৰু পিঠিত গুৰুতৰভাৱে আঘাতপ্ৰাপ্ত হৈ মাটিত ঢলি পৰে। ওচৰত থকা শ্ৰমিকসকলে হৈ-চৈ কৰাত বাঘটো বাগিচাৰ মাজত লুকাই পৰে। লগে লগে মহিলা গৰাকীক বৰগাং কেথলিক হস্পিতালত ভৰ্তি কৰোৱা হয়।
ইফালে বাগিচা কৰ্তৃপক্ষই বৰগাং বনাঞ্চলিক কাৰ্যালয়ত খবৰ দিয়াত ঘটনাস্থলীত বনাঞ্চলিক বিষয়া চিকন্দৰ আলি নেতৃত্বত বনকৰ্মীৰ দলে বাঘটো খেদাবলৈ বিচাৰি ফুৰা সময়তে বাগিচাৰ ভিতৰৰ ৮ নং লাইনত বাঘটোয়ে পুনৰ ফিলবেন তপ্ন, পাপু চেখ আৰু সাগৰ নায়ক নামৰ তিনিজন শ্ৰমিকক আক্ৰমণ কৰে।
আঘাতপ্ৰাপ্ত সকলৰ এজনৰ আঘাত সামান্য যদিও ফিলবেন তপ্ন আৰু আনতী প্ৰজাৰ অৱস্থা সংকটজনক বুলি জানিব পৰা গৈছে। আহতৰ তিনি গৰাকীক কেথলিক হস্পিতালত ভৰ্তি কৰোৱা হয়।
উক্ত ঘটনাটোক কেন্দ্ৰ কৰি বাগিচাখনত এক হুলস্থুলীয়া পৰিৱেশৰ সৃষ্টি হয়। বাগিচাৰ উত্তেজিত শ্ৰমিকসকল ওলাই আহি কিছু সময়ৰ বাবে ১৫ নং ৰাষ্ট্ৰীয় ঘাইপথ অৱৰোধ কৰি ৰাখে।