ভোটাৰ তালিকাৰ বিশেষ নিবিড় সংশোধন (SIR Row)ক লৈ বিতৰ্কৰ মাজতে শাসকীয় মিত্ৰজোঁটৰ ভিতৰৰ পৰাই নিৰ্বাচন আয়োগৰ পৰা স্পষ্ট ব্যাখ্যা দাবী কৰা হৈছে। বিজেপিৰ তিনিটা অংশীদাৰ দল লোক জনশক্তি পাৰ্টীৰ নেতা চিৰাগ পাছোৱান, ৰাষ্ট্ৰীয় লোক মৰ্চাৰ মুৰব্বী উপেন্দ্ৰ কুশৱাহা আৰু তেলেগু দেশম পাৰ্টিৰ সাংসদ লাভু শ্ৰীকৃষ্ণ দেৱৰায়ালুই নিৰ্বাচন আয়োগক বিষয়টো স্পষ্ট কৰিবলৈ আহ্বান জনাইছে।
এই বিতৰ্কৰ আৰম্ভণি হৈছিল দ্য ইণ্ডিয়ান এক্সপ্ৰেছৰ তদন্তমূলক প্ৰতিবেদনৰ পৰা। ইয়াত দাবী কৰা হৈছে যে নিৰ্বাচন আয়ুক্ত সুখবীৰ সিং সান্ধু আৰু বিবেক যোশীয়ে বিগত ১০ মাহত কমেও ১৪ বাৰ আয়োগৰ কিছুমান সিদ্ধান্ত আৰু নিৰ্দেশনাৰ ওপৰত লিখিত আপত্তি দাখিল কৰিছিল। তেওঁলোকৰ অভিযোগৰ ভিতৰত আছিল যে তেওঁলোকৰ অজ্ঞাতে বা পৰামৰ্শ অবিহনে কিছুমান সিদ্ধান্ত লোৱা হৈছিল।
কিন্তু নিৰ্বাচন আয়োগে এই প্ৰতিবেদনৰ পিছত কয় যে মতানৈক্য আয়োগৰ সিদ্ধান্ত গ্ৰহণ প্ৰক্ৰিয়া, আলোচনা আৰু পৰ্যালোচনাৰ এক স্বাভাৱিক অংশ আৰু এছ আই আৰকে ধৰি চূড়ান্ত সিদ্ধান্তসমূহ সৰ্বসন্মতিক্ৰমে লোৱা হৈছে।
এনে পৰিস্থিতিত কেন্দ্ৰীয় মন্ত্ৰী তথা লোক জনশক্তি পাৰ্টিৰ সভাপতি চিৰাগ পাছোৱানে প্ৰথমে ৰাজহুৱাভাৱে নিৰ্বাচন আয়োগৰ পৰা অধিক শক্তিশালী ব্যাখ্যা বিচাৰিছে। পাটনাত সাংবাদিকৰ আগত তেওঁ কয় যে যিহেতু ই এক সাংবিধানিক প্ৰতিষ্ঠান, গতিকে তেওঁ চৰকাৰৰ অংশ হিচাপে নিৰ্বাচন আয়োগক ‘ডিফেণ্ড’ কৰিব নিবিচাৰে। তেওঁ লগতে বিৰোধীসকলে নিজৰ ৰাজনৈতিক স্থিতি অনুসৰি প্ৰশ্ন উত্থাপন কৰিব বুলিও মন্তব্য কৰে।
অৱশ্যে তেওঁৰ বক্তব্যৰ মূল কথা আছিল ভোটদান প্ৰক্ৰিয়াত সাধাৰণ ৰাইজৰ আস্থা। চিৰাগে কয় যে যদি দেশৰ নিৰ্বাচনী ব্যৱস্থাৰ প্ৰতি মানুহৰ আস্থা হেৰুৱাবলৈ আৰম্ভ কৰে, তেন্তে সেয়া গণতন্ত্ৰৰ বাবে ভাল নহ’ব। গতিকে নিৰ্বাচন আয়োগে নিজৰ স্থিতি অধিক শক্তিশালীভাৱে স্পষ্ট কৰি ৰাইজৰ মনত সৃষ্টি হোৱা সন্দেহ দূৰ কৰিব লাগে।
চিৰাগৰ মতে, আয়োগৰ ব্যাখ্যাৰ প্ৰয়োজন বিৰোধী নেতা ৰাহুল গান্ধী বা আন কোনো ৰাজনৈতিক নেতাক সন্তুষ্ট কৰিবলৈ নহয়, বৰঞ্চ সাধাৰণ ৰাইজৰ আগত বিষয়টো স্পষ্ট কৰিবলৈহে।
ইপিনে, ৰাষ্ট্ৰীয় লোক মৰ্চাৰ মুৰব্বী তথা ৰাজ্যসভাৰ সাংসদ উপেন্দ্ৰ কুশৱাহাইও এছ আই আৰক লৈ সৃষ্টি হোৱা বিভ্ৰান্তি দূৰ কৰিবলৈ নিৰ্বাচন আয়োগৰ পৰা তাৎক্ষণিক ব্যাখ্যা বিচাৰিছে।
এক্সৰ এটা পোষ্টত তেওঁ কয় যে এছ আই আৰক লৈ হোৱা বিতৰ্কই সাধাৰণ মানুহৰ মাজত যথেষ্ট বিভ্ৰান্তিৰ সৃষ্টি কৰিছে। প্ৰকৃত পৰিস্থিতি স্পষ্ট কৰিবলৈ নিৰ্বাচন আয়োগে তাৎক্ষণিক ব্যাখ্যা আগবঢ়োৱাৰ প্ৰয়োজন। অৰ্থাৎ বিজেপিৰ মিত্ৰজোঁটৰ অংশীদাৰৰ এটা অংশই পোনপটীয়াকৈ এছ আই আৰৰ বিৰোধিতা কৰা নাই, বৰঞ্চ নিৰ্বাচন আয়োগৰ স্বচ্ছতা আৰু ব্যাখ্যাৰ প্ৰয়োজনীয়তাৰ ওপৰত গুৰুত্ব আৰোপ কৰিছে।
আনহাতে, তেলেগু দেশম পাৰ্টিয়ে অৱশ্যে অন্ধ্ৰ প্ৰদেশৰ এছ আই আৰ প্ৰক্ৰিয়াক ‘সফলতা’ বুলি অভিহিত কৰিছে। দলৰ সাংসদ লাভু শ্ৰীকৃষ্ণ দেৱৰায়ালুৱে কয় যে বিৰোধীয়েও অন্ধ্ৰ প্ৰদেশৰ এই প্ৰক্ৰিয়াক লৈ থকা উদ্বেগক সমৰ্থন কৰিবলৈ প্ৰমাণ দিব পৰা নাই। অৱশ্যে নিৰ্বাচন আয়োগ এক সাংবিধানিক প্ৰতিষ্ঠান আৰু গণতন্ত্ৰত ইয়াৰ গুৰুত্বপূৰ্ণ ভূমিকা আছে বুলি উল্লেখ কৰে। গতিকে কোনোবাই প্ৰশ্ন উত্থাপন কৰিলে সঠিক ব্যাখ্যা আৰু স্বচ্ছতা বজাই ৰখাটোৱে প্ৰতিষ্ঠানটোৰ প্ৰতি জনসাধাৰণৰ আস্থা আৰু অধিক শক্তিশালী কৰিব পাৰে।
ইণ্ডিয়ান এক্সপ্ৰেছৰ বাতৰি অনুসৰি সুখবীৰ সিং সান্ধু আৰু বিবেক যোশীয়ে উত্থাপন কৰা বিষয়সমূহৰ ভিতৰত নতুন ভোটাৰ পঞ্জীয়নৰ বাবে ফৰ্ম ৬ৰ পৰিৱৰ্তন, ভোটাৰ তালিকাৰ পৰা নাম যোগ আৰু বাদ দিয়াৰ প্ৰক্ৰিয়া আৰু ভোটাৰ তালিকাৰ তথ্যকোষৰ নিয়ন্ত্ৰণ আদি অন্তৰ্ভুক্ত।
প্ৰতিবেদন অনুসৰি, ছয় নং প্ৰপত্ৰত এছ আই আৰ সম্পৰ্কীয় কিছু নতুন প্ৰশ্ন সংযোজন কৰা হয়। সান্ধু আৰু যোশীয়ে আইনী প্ৰক্ৰিয়া অনুসৰণ নকৰাকৈ এনে পৰিৱৰ্তন কৰা বুলি আপত্তি কৰে।
ভোটাৰ তালিকাৰ তথ্যকোষৰ নিয়ন্ত্ৰণ কেন্দ্ৰীভূত কৰা হৈছে নেকি সেই সন্দৰ্ভতো প্ৰশ্ন উত্থাপন হোৱা বুলিও প্ৰতিবেদনত দাবী কৰা হৈছে। আয়ুক্ত দুগৰাকীৰ এই টোকাটোত ৰাজ্যিক পৰ্যায়ৰ বিষয়াসকলে ভোটাৰ ডাটাবেছত প্ৰয়োজনীয় এক্সেছৰ বিষয়েও উদ্বেগ প্ৰকাশ কৰিছে।
গোৱাৰ ক্ষেত্ৰত এটা চফটৱেৰ ইছ্যুও পোহৰলৈ আহিছে। দ্য ইণ্ডিয়ান এক্সপ্ৰেছৰ তথ্য অনুসৰি স্থানীয় পৰ্যায়ত ৯৭ জন ভোটাৰক যোগ্য বুলি গণ্য কৰা হৈছিল যদিও চফটৱেৰৰ সমস্যাৰ বাবে তেওঁলোকৰ নাম চূড়ান্ত ভোটাৰ তালিকাত অন্তৰ্ভুক্ত কৰা হোৱা নাছিল।
আনহাতে, নিৰ্বাচন আয়োগে এই প্ৰতিবেদনৰ পিছত কৈছে যে আয়োগৰ সদস্যসকলৰ মাজত মতানৈক্য হোৱাটো স্বাভাৱিক সিদ্ধান্ত গ্ৰহণ প্ৰক্ৰিয়াৰ অংশ। আয়োগৰ বিবৃতি অনুসৰি এছ আই আৰকে ধৰি চূড়ান্ত সিদ্ধান্ত তিনিজনীয়া আয়োগৰ সৰ্বসন্মতিক্ৰমে গ্ৰহণ কৰা হয়।
সংশ্লিষ্ট দুই নিৰ্বাচন আয়ুক্ত সুখবীৰ সিং সন্ধু আৰু বিবেক যোশীয়েও দ্য ইণ্ডিয়ান এক্সপ্ৰেছৰ প্ৰতিবেদনত উল্লেখ কৰা আপত্তি সন্দৰ্ভত বিতংভাৱে কোনো মন্তব্য কৰা নাই। ফলত প্ৰতিবেদনত উত্থাপিত অভিযোগ সন্দৰ্ভত তেওঁলোকৰ প্ৰত্যক্ষ ৰাজহুৱা বক্তব্য এতিয়াও চৰ্চালৈ অহা নাই।
ইপিনে, এই বিতৰ্ক পোহৰলৈ অহাৰ পিছত বিৰোধী দলসমূহে মুখ্য নিৰ্বাচনী আয়ুক্ত জ্ঞানেশ কুমাৰৰ বিৰুদ্ধে সৰৱ হৈছে। দ্য ইণ্ডিয়ান এক্সপ্ৰেছৰ প্ৰতিবেদনৰ ভিত্তিত বিৰোধী শিবিৰৰ কেইবাজনো নেতাই তেওঁৰ পদত্যাগৰ দাবী জনাইছে আৰু এছ আই আৰক লৈ প্ৰশ্ন উত্থাপন কৰিছে।
আনহাতে বিজেপিয়ে নিৰ্বাচন আয়োগৰ ভিতৰত মত বিনিময়ক এক স্বাভাৱিক গণতান্ত্ৰিক প্ৰক্ৰিয়া বুলি ব্যাখ্যা কৰিছে। ফলত এছ আই আৰ বিতৰ্ক এতিয়া কেৱল বিৰোধী দল বনাম নিৰ্বাচন আয়োগৰ বিষয় নহয়। শাসকীয় মিত্ৰজোঁটৰ একাংশ অংশীদাৰেও সাধাৰণ জনতাৰ সংশয় দূৰ কৰাৰ বাবে নিৰ্বাচন আয়োগৰ স্পষ্ট ব্যাখ্যাৰ প্ৰয়োজনীয়তাৰ কথা প্ৰকাশ কৰিছে।
নিৰ্বাচন আয়োগে এছ আই আৰকে ধৰি চূড়ান্ত সিদ্ধান্তসমূহ সৰ্বসন্মতিক্ৰমে লোৱা বুলি প্ৰকাশ কৰিছে। ফলত আয়োগৰ পৰা অধিক বিশদ ব্যাখ্যা অনাগত দিনত এই বিতৰ্কৰ অন্যতম গুৰুত্বপূৰ্ণ বিষয় হৈ পৰিব পাৰে।
