পথৰ কাষত ৰৈ থকা এখন ট্ৰাকত খুন্দা মৰাৰ ফলত তিনিজন স্কুটী আৰোহীৰ মৃত্যু হয়। শনিবাৰে সন্ধিয়া প্ৰায় ৭ বজাত ঝাৰখণ্ডৰ পূব সিংভূম জিলাৰ মুছাবোনি অঞ্চলত সংঘটিত হয় এই শোকাৱহ দুৰ্ঘটনা।
জানিব পৰা মতে, এখন স্কুটিত ৪জন যুৱক উঠি আহিছিল। সেই সময়ত স্কুটাৰ চালকজনে নিয়ন্ত্ৰণ হেৰুৱাই পথৰ কাষত ৰৈ থকা এখন ট্ৰাকত খুন্দা মাৰে। দুৰ্ঘটনাত চাৰিওজনেই স্কুটাৰৰ পৰা ছিটিকি পৰে। চিকিৎসালয়লৈ নিয়াৰ সময়ত চিকিৎসকে তিনিজনক মৃত ঘোষণা কৰে। সংকটজনক অৱস্থাত এজন যুৱক চিকিৎসাধীন হৈ আছে।
সূত্ৰৰ পৰা জানিব পৰা মতে, হিন্দুস্তান কপাৰ লিমিটেড চমুকৈ এইচ চি এলৰ চুলঝা খনিৰ পৰা ওলাই আহি পথত এখন ট্ৰাক বিকল হৈ পৰে। মুছাবোনি অঞ্চলত পথৰ কাষত ৰখাই থোৱা আছিল ট্ৰাকখন। ইপিনে শনিবাৰে সন্ধিয়া স্কুটীত উঠি আহি আছিল ৰোহিত কৰ্মকাৰ (২৫), সমীৰ কৰ্মকাৰ (১৬), ৰাজ গোপ (১৮) আৰু ৰাহুল কৰ্মকাৰ (৩২)।
জানিব পৰা মতে, ঘাটশিলাৰ এজন আত্মীয়ৰ ঘৰৰ পৰা তেওঁলোক উভতি আহিছিল। স্কুটাৰ চালকজনে নিয়ন্ত্ৰণ হেৰুৱাই ৰখাই থোৱা ট্ৰাকখনৰ পিছফালে খুন্দা মাৰে। লগে লগে স্থানীয় ৰাইজে তেওঁলোকক উদ্ধাৰ কৰি স্থানীয় চিকিৎসালয়লৈ লৈ যায়। কিন্তু তেওঁলোকৰ অৱস্থা সংকটজনক হোৱাৰ বাবে তেওঁলোকক আন এখন চিকিৎসালয়লৈ প্ৰেৰণ কৰিবলগীয়া হয়।
বাতৰি মতে, ৰোহিত, তেওঁৰ ভাতৃ সমীৰ আৰু ৰাজৰ আন এখন চিকিৎসালয়লৈ স্থানান্তৰিত হোৱাৰ সময়তে মৃত্যু হয়। সংকটজনক অৱস্থাত চিকিৎসালয়ত চিকিৎসাধীন হৈ আছে ৰাহুল।
প্ৰাথমিকভাৱে আৰক্ষীয়ে কোনো ধৰণৰ ইনডিকেটৰ লাইট নজ্বলাই ট্ৰাকখন ৰখাই থোৱা বুলি সন্দেহ প্ৰকাশ কৰে। ফলত স্কুটাৰ চালকজনে ট্ৰাকখন দেখা নাপাই খুন্দা মাৰে। কিন্তু আৰক্ষী আৰু প্ৰশাসনে বাৰে বাৰে নিষেধাজ্ঞা আৰোপ কৰাৰ পাছতো একেখন স্কুটিত ৪ জন আৰোহীক লৈ প্ৰশ্ন উত্থাপন হৈছে।
