মুম্বাইৰ উপকূলীয় পথৰ উৰণীয়া সেঁতুত সংঘটিত হৈছে এক মৰ্মান্তিক তথা ভয়ানক গাড়ী দুৰ্ঘটনা! তীব্ৰ গতিৰে চলা এখন বিলাসী বিএমডব্লিউ গাড়ীনিয়ন্ত্ৰণ হেৰুৱাই পোনে পোনে দলঙৰ পৰা বাগৰি পৰে। এই মাৰাত্মক দুৰ্ঘটনাত গাড়ীখনত থকা তিনিজন লোকৰ থিতাতে মৃত্যু হয়। এজন সংকটজনক অৱস্থাত চিকিৎসালয়ত চিকিৎসাধীন হৈ আছে।
আৰক্ষীৰ সূত্ৰ অনুসৰি দেওবাৰে পুৱা প্ৰায় ৫:২০ বজাত এই দুৰ্ঘটনা সম্পৰ্কে তথ্য লাভ কৰে আৰক্ষীয়ে। গাড়ীখন মেৰিন ড্ৰাইভৰ পৰা হাজী আলী অভিমুখে অতি তীব্ৰ বেগেৰে গৈ আছিল। সেই সময়ত ফ্লাই অভাৰত উঠা গাড়ীখনৰ ওপৰত চালকজনে হঠাৎ নিয়ন্ত্ৰণ হেৰুৱাই পেলায়। ফলত গাড়ীখন দলঙৰ ৰেলিঙ অতিক্ৰমি উফৰি গৈ তলৰ নিৰ্মীয়মান এলেকাত খুন্দা মাৰে।
এই ঘটনাৰ চিচিটিভি ফুটেজ পোহৰলৈ আহিছে, য’ত বন্দী হৈছে দুৰ্ঘটনাৰ শিহৰণকাৰী দৃশ্য। চিচিটিভি ফুটেজত দেখা গৈছে যে পুৱা ৫:০৩ বজাত হঠাতে গাড়ীখন উৰণীয়া সেঁতুৰ পৰা বাগৰি পৰে। গাড়ীখন খুন্দা মৰাৰ লগে লগে চূৰ্ণ-বিচূৰ্ণ হৈ পৰে।
দুৰ্ঘটনাৰ খবৰ পোৱাৰ লগে লগে উদ্ধাৰ অভিযান আৰম্ভ হয়। গাড়ীখনত থকা চাৰিওজনকে ততাতয়াকৈ উদ্ধাৰ কৰি ওচৰৰ নাইৰ হাস্পতাললৈ লৈ যোৱা হয়। অৱশ্যে তাত চিকিৎসকে তিনিজনক মৃত ঘোষণা কৰে। নিহত দুজনৰ পৰিচয় উদ্ধাৰ কৰা হৈছে। এজন ২১ বছৰীয়া শ্বানয় গাজল আৰু এজন ১৭ বছৰীয়া কিশোৰ। প্ৰায় ২৫ বছৰীয়া আন এজন যুৱকৰ পৰিচয় এতিয়াও জানিব পৰা হোৱা নাই।
গাড়ীখনত থকা চতুৰ্থজন লোক গুৰুতৰভাৱে আহত হৈছে। বৰ্তমান তেওঁ মুম্বাইৰ এখন ব্যক্তিগত চিকিৎসালয়ৰ ট্ৰমা ৱাৰ্ডত সংকটজনক অৱস্থাত চিকিৎসাধীন হৈ আছে। সমগ্ৰ বিষয়টোৰ ওপৰত আৰক্ষীয়ে তদন্ত আৰম্ভ কৰি দুৰ্ঘটনাটোৰ সঠিক কাৰণ জানিবলৈ চেষ্টা চলাইছে।
