হাৰিয়ানাৰ নুহ (মেৱাট) জিলাত ধৰ্মীয় শোভাযাত্ৰাত শিলগুটি নিক্ষেপ কৰাৰ পিছতে সাম্প্ৰদায়িক সংঘৰ্ষৰ পৰিস্থিতিৰ সৃষ্টি হয়। সোমবাৰে পুৱাৰে পৰা আৰম্ভ হোৱা এই ঘটনাত দজন হোমগাৰ্ডসহ ৩জন লোকৰ মৃত্যু হয়।
অভিযোগ অনুসৰি গৃহৰক্ষী এজনক গুলীয়াই হত্যা কৰা হৈছে। আৰক্ষীৰ সূত্ৰ অনুসৰি সেই ঘটনাত ২৫ জনতকৈ অধিক লোক গুৰুতৰভাৱে আহত হয়। এই ঘটনাৰ বাবেই কেইবাটাও ঘৰ, দোকান আৰু বাহন জ্বলাই দিয়া হয়। মন্দিৰতো সংঘটিত হয় এই আক্ৰমণ।
আৰক্ষী সূত্ৰৰ মতে, “বৃজ মণ্ডল জলাভিষেক যাত্ৰা”ৰ সময়ত খেডলা মোড অঞ্চলত ভক্তৰ শোভাযাত্ৰাত ইটা-শিল নিক্ষেপ কৰাৰ ফলত সংঘৰ্ষৰ সৃষ্টি হয়। লুণ্ঠন আৰু অগ্নিসংযোগৰ ঘটনা ঘটে। নিজৰ জীৱন ৰক্ষাৰ বাবে সহস্ৰাধিক লোকে ওচৰৰ গুৰুগ্ৰামৰ কিছুমান মন্দিৰত আশ্ৰয় লয়।
আক্ৰমণকাৰীক ছত্ৰভংগ দিবলৈ আৰক্ষীয়ে লাঠী আৰু কন্দুৱা গেছ ব্যৱহাৰ কৰিও পৰিস্থিতি নিয়ন্ত্ৰণত ব্যৰ্থ হোৱা বুলি অভিযোগ উত্থাপন হৈছে।
ঘটনাৰ বাবে অঞ্চলটোত ১৪৪ ধাৰা জাৰি কৰা হৈছে। হাৰিয়ানাৰ গৃহমন্ত্ৰী অনিল বিজে কয় যে, ‘উৰাবাতৰি আৰু উচটনি ৰোধ কৰিবলৈ ম’বাইল আৰু ইণ্টাৰনেট সেৱা সাময়িকভাৱে বন্ধ কৰি দিয়া হৈছে।’
হাৰিয়ানাৰ মুখ্যমন্ত্ৰী মনোহৰলাল খট্টৰে টুইটাৰযোগে লিখিছে, ‘আজিৰ ঘটনাটো দুৰ্ভাগ্যজনক, ৰাজ্যখনত শান্তি বজাই ৰাখিবলৈ সকলোকে আহ্বান জনাইছো। দোষীক কোনো মূল্যৰ বিনিময়ত ৰেহাই দিয়া নহ’ব, তেওঁলোকৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।‘
খেডলা ম’ডৰ আৰক্ষী বিষয়া হুকুম সিঙে কয়, ‘সশস্ত্ৰ আৰক্ষী বাহিনীয়ে পৰিস্থিতি নিয়ন্ত্ৰণৰ বাবে অঞ্চলটোত ৰুট মাৰ্চ চলাইছে।‘
