প্ৰায় ৩২ ঘণ্টা ধৰি আঠ কিলোমিটাৰ পথ অৱৰুদ্ধ। যাৰ বাবে প্ৰায় ৪ হাজাৰ গাড়ী আৱদ্ধ হৈ পৰিছিল। সেই যান-জঁটত অসুস্থ হৈ তিনিজন লোকৰ মৃত্যু হয়। মধ্য প্ৰদেশৰ ইন্দোৰত সংঘটিত হৈছে এই ঘটনা।
জানিব পৰা মতে, ছয় লেনযুক্ত পথ নিৰ্মাণৰ বাবে এনে যান-জঁটৰ সৃষ্টি হৈছিল। এই ঘটনাত প্ৰশাসনৰ ভূমিকাক লৈ প্ৰশ্ন উত্থাপন হ’বলৈ আৰম্ভ কৰিছে।
বৃহস্পতিবাৰে সন্ধিয়াৰ পৰা আৰম্ভ হয় যান-জঁট। লাহে লাহে যান-জঁট বাঢ়িবলৈ ধৰে। প্ৰায় আঠ কিলোমিটাৰ পথত আৱদ্ধ হৈ আছিল ৪ হাজাৰ গাড়ী। জামত আবদ্ধ হৈ থকা অৱস্থাত সন্দীপ পেটেল নামৰ এজন ব্যক্তি অসুস্থ হৈ পৰে। চিকিৎসালয়লৈ যোৱাৰ পথত হাৰ্ট এটেকত আক্ৰান্ত হৈ তেওঁৰ মৃত্যু হয়।
শুকুৰবাৰে পুৱা বলৰাম পেটেল আৰু কমল পাঞ্চল নামৰ আৰু দুজন লোক অসুস্থ হৈ পৰে। দুয়োকে উদ্ধাৰ কৰি স্থানীয় চিকিৎসালয়ত ভৰ্তি কৰোৱা হয়। দুয়োৰে তাতেই মৃত্যু হয়।
কমলৰ পুত্ৰ বিজয়ৰ ভাষাত, “আমি ডেৰ ঘণ্টা ধৰি ট্ৰেফিক জামত আবদ্ধ হৈ আছিলো। হঠাতে দেউতাৰ অসুস্থ অনুভৱ হ’ল। গাড়ীতে অজ্ঞান হৈ পৰিল। তাৰ পৰা উদ্ধাৰ কৰি চিকিৎসালয়লৈ যোৱাৰ পথত তেওঁৰ মৃত্যু হয়।”
ইপিনে, ইমান দীঘলীয়া যান-জঁটৰ কাৰণক লৈ আৰম্ভ হৈছে চৰকাৰ বিৰোধী প্ৰতিবাদ। স্থানীয় প্ৰশাসনে জনায় যে এফালে ছয় লেনযুক্ত পথৰ কাম চলি আছে। আনহাতে, ধাৰাসাৰ বৰষুণৰ ফলত পথৰ কেইবাঠাইত পানী জমা হৈছে। ফলত পথ অৱৰুদ্ধ হৈ পৰে।
ভৱিষ্যতে এনেধৰণৰ ঘটনা যাতে পুনৰ সংঘটিত নহয় তাৰ বাবে এনএইচএআই, আৰক্ষী আৰু ৰাজহুৱা নিৰ্মাণ বিভাগে এখন বৈঠকত মিলিত হৈছে। জানিব পৰা মতে, সেই বৈঠকত যান-জঁট নিয়ন্ত্ৰণৰ বাবে কেইবাটাও ব্যৱস্থা গ্ৰহণৰ সিদ্ধান্ত লোৱা হৈছে।
