নগাঁও জিলাৰ চামগুৰি আৰক্ষী থানাৰ অধীনৰ সোনাৰিবালিৰ ৩৭ নং ৰাষ্ট্ৰীয় ঘাই পথত আজি বিয়লি সংঘটিত হোৱা এক ভয়াবহ পথ দুৰ্ঘটনাত পতিত হৈ তিনিজন লোক গুৰুতৰভাৱে আহত হয়।
ঘটনাৰ সন্দৰ্ভত জানিব পৰা মতে, আজি বিয়লি প্ৰায় ৪-৩০ বজাত সোনাৰিবালিৰ ৩৭ নং ৰাষ্ট্ৰীয় ঘাই পথত নগাঁৱৰ পৰা নগাঁও অভিমুখী এ.এছ-০২বি.চি-৭৩৮০ নম্বৰৰ টাটা ডি আই গাড়ী খনৰ সৈতে কলিয়াবৰ অভিমুখী এ.এছ-১২চি-৪৮৬১ নম্বৰৰ ট্ৰাক খনৰ মুখামুখি সংঘৰ্ষ সংঘটিত হয়।
সংঘৰ্ষৰ ফলত দুয়োখন গাড়ীৰে চালক হেণ্ডিমেন সহ তিনিজন লোক গুৰুতৰভাৱে আহত হয়।
আহত সকল ক্ৰমে নগাঁও বামুনিপথাৰৰ ৰামেশ্বৰ মূণ্ডা আৰু অনু দাস আৰু আনজন যমুনামুখৰ শ্বৰিফ উদ্দিন বুলি জানিব পৰা গৈছে।
আনহাতে, ঘটনা সংঘটিত হোৱাৰ পাছত চামগুৰি আৰক্ষী থানাৰ আৰক্ষী ঘটনাস্থলীত উপস্থিত হৈ আহত তিনিওজনকে স্থানীয় ৰাইজৰ সহযোগত তৎকালীনভাৱে চিকিৎসালয়লৈ প্ৰেৰণ কৰা হয় বুলি জানিব পৰা গৈছে।
উল্লেখ্য যে, ৰাষ্ট্ৰীয় ঘাই পথৰ দুৰৱস্থাৰ বাবেই চামগুৰিত দৈনিক বহুবোৰ সৰু-বৰ পথ দুৰ্ঘটনা সংঘটিত হৈ আহিছে যাৰ ফলশ্ৰুতিত প্ৰায়েই বহু পথচাৰী মৃত্যু মুখত পৰাৰ লগতে আঘাতপ্ৰাপ্তও হ’বলগীয়া হয় ৷
বৃহস্পতিবাৰে বিয়লি দুৰ্ঘটনাটোৰ ফলত ৩৭ নং ৰাষ্ট্ৰীয় ঘাই পথ চোৱাত দীৰ্ঘ সময় ধৰি বহু শতাধিক যান বাহন আবদ্ধ হৈ পৰাত ৰাজপথটোত তীব্ৰ যানজঁটৰ সৃষ্টি হয়।
