টংলা পৌৰসভাৰ অবিবেচক তথা নিৰ্মম সিদ্ধান্তৰ ফলত প্ৰায় ২৫০ টা বগলীৰ মৃত্যুৰ ঘটনাত টংলা পৌৰসভাৰ কাৰ্যবাহী বিষয়া শান্তনু দাসকে ধৰি ৩জনক বৃহস্পতিবাৰে গ্ৰেপ্তাৰ কৰা হৈছে।
টংলা বন বিভাগৰ বিট অ’ফিচে তেওঁলোকক গ্ৰেপ্তাৰ কৰে। ওদালগুৰিৰ ডিএফঅ’ এন কে বৰদলৈয়ে এইকথা নিশ্চিত কৰিছে।
পৌৰসভাৰ কাৰ্য্যবাহী বিষয়া শান্তনু কুমাৰ দাসৰ উপৰি আন দুজন হৈছে কনিষ্ঠ অভিযন্তা সদানন্দ চহৰীয়া আৰু কৰ্মচাৰী মিলন চাংমা।
অভিযুক্তকেইজনক ওদালগুৰিৰ মুখ্য ন্যায়িক দণ্ডাধীশে ১৪ দিনৰ ন্যায়িক জিম্মালৈ প্ৰেৰণ কৰিছে।
টংলা বন সংমণ্ডলৰ পৰা তৰা এক গোচৰৰ ভিত্তিত Section 50/51/9 of Wildlife Protection Act 1972ত তেওঁলোকক গ্ৰেপ্তাৰ কৰা হৈছে।
উল্লেখ্য যে অতিমাৰী কৰ’না’ৰ দোহাই দি যোৱা ২৪ জুনত টংলা পৌৰসভাই শতাধিক বগলী হত্যা কৰাৰ পিছতে সমগ্ৰ ঘটনা নৰ্থ-ইষ্ট নাওত ফাদিল হৈছিল।
ইয়াৰ পাছতে মুখ্যমন্ত্ৰী হিমন্ত বিশ্ব শৰ্মাই টুইট যোগে বনমন্ত্ৰী পৰিমল শুক্লবৈদ্যক তদন্তৰ নিৰ্দেশ দিছিল।
উল্লেখযোগ্য ২৪ জুনৰ দিনা টংলা পৌৰসভাই ১ নং ওৱাৰ্ড’ৰ লোকজীৎ সুতাৰ’ৰ বাঁহ গছ’ত আশ্ৰয় লৈ থকা প্ৰায় ২৫০টা বগলীক অতি নিৰ্মমভাৱে হত্যা কৰিছিল।
মূল চহৰৰ পৰা কিছু আঁতৰত অৱস্থিত লোকজীৎ সুতাৰ’ৰ ঘৰৰ বাঁহত অন্য বছৰৰ দৰে এইবেলিও শ শ বগলী পোৱালি জগাবলৈ আহিছিল।
লোকজীৎ সুতাৰে জানিব দিছিল যে মাত্ৰ দুমাহ জিৰণি লৈ পোৱালি বোৰ ডাঙৰ হোৱাৰ লগে লগে ইয়াৰ পৰা বগলীবোৰ আঁতৰি যায়।
প্ৰতি বছৰে সিঁহতৰ এই অহা যোৱা কাৰ্য্য চলি থাকে। কিন্তু নিৰ্দয়, হৃদয়হীন এচাম লোকৰ কৱলত পৰি তেওঁ লোকৰ সন্তানৰ লগতে, সিহঁতে পৰিয়ালবোৰ চিৰদিনৰ বাবে হেৰুৱালে।
এই বাতৰি প্ৰকাশ পোৱাৰ পিছতে ৰাজ্যৰ প্ৰকৃতি প্ৰেমী সকলৰ লগতে বৌদ্ধিক সমাজৰ মাজত হাহাকাৰ অৱস্থাৰ সৃষ্টি হয়। লোকজীৎ সুতাৰৰ ঘৰত বছৰ বছৰ ধৰি বগলী চৰাইবোৰৰ এই কাৰ্য্য অব্যাহত আছে যদিও এইবাৰ হঠাতে কিয় বগলীয়ে পৰিবেশ বিনষ্ট কৰিলে তাক লৈ ৰহস্যৰ সৃষ্টি হয়।
যোৱা জুন মাহৰ ৮ তাৰিখে চহৰ খনৰ ১ আৰু ২ নং ওৱাৰ্ড’ৰ পাঁচ ঘৰ পৰিয়ালৰ লোকক তেওঁ লোকৰ বাঁহবোৰ কাটিবৰ বাবে টংলা পৌৰসভাৰ কাৰ্য্যবাহী বিষয়া তথা নগৰ আৰু গাঁও উন্নয়ন পৰিকল্পনা বিভাগৰ ওদালগুৰি জিলাৰ সহ: সঞ্চালক শান্তনু কুমাৰ দাসে এক জাননী জাৰি কৰিছিল। কিন্তু কাৰ্য্যবাহী বিষয়া গৰাকীৰ এই জাননীৰ ওপৰত ভিত্তি কৰিয়ে পৌৰসভাৰ নৱ নিৰ্বাচিত অধ্যক্ষ তথা খালিংদুৱাৰ এম চি এল এ (MCLA) দিলীপ বড়োৰ লিখিত নিৰ্দেশত,পৌৰসভাই এনেদৰে বগলীবোৰ হত্যা কৰিছিল।
