‘বৃহত্তৰ তিপ্ৰালেণ্ড’ক লৈ পুনৰ সৰৱ হৈছে তিপ্ৰা মথা। আসন্ন ত্ৰিপুৰাৰ বিধানসভা নিৰ্বাচন। ভোটাৰসকলে ১৬ ফেব্ৰুৱাৰীত ৰাজ্যখনৰ ৬০ খন আসনৰ প্ৰাৰ্থীৰ ভাগ্য নিৰ্ণয় কৰিব। একাংশ পৰ্যবেক্ষকৰ ধাৰণা যে তিপ্ৰা মথা এইবাৰ বিজেপি শাসিত ত্ৰিপুৰাৰ অন্যতম কিংমেকাৰ হ’ব পাৰে। তিপ্ৰা মথাৰ মুৰব্বী আৰু ত্ৰিপুৰা ৰাজপৰিয়ালৰ সদস্য প্ৰদ্যুত কিশোৰ দেববৰ্মাই কয় যে তিপ্ৰালেণ্ডৰ সাংবিধানিক সমাধান নোহোৱালৈকে তেওঁলোকে কোনো দলক সমৰ্থন নকৰে। কোনো চৰকাৰতে যোগদান নিদিয়ে।
তিপ্ৰা মথাৰ নিৰ্বাচনী ইস্তাহাৰ প্ৰকাশ কৰি প্ৰদ্যুত কিশোৰে কয়, “প্ৰয়োজন হ’লে আমি বিৰোধী দলত বহিম। কিন্তু কেইটামান মন্ত্ৰীপদ পোৱাৰ লোভত আমি আমাৰ মূল দাবীৰ পৰা আঁতৰি নাযাও।‘’
তেওঁ কয় যে যদিও ৰাজনৈতিক দলসমূহে এই সন্দৰ্ভত মৌখিক প্ৰতিশ্ৰুতি দিছে, তথাপিও ইয়াক গ্ৰহণ কৰা নহ’ব। ইয়াৰ পূৰ্বে, তিপ্ৰা মথাই কৈছিল যে ই ৰাজ্যখনৰ ৬০ খন বিধানসভা আসনৰ ভিতৰত ৪২ খন আসনত প্ৰতিদ্বন্দিতা কৰিব।
অৱশ্যে, প্ৰদ্যুৎ কিশোৰে স্পষ্ট কৰি দিছে যে তিপ্ৰা মথাই ত্ৰিপুৰাক বিভক্ত কৰিব নিবিচাৰে। “আমি ত্ৰিপুৰা ভাঙিব নিবিচাৰো। ভাৰতক কোনে দুৰ্বল কৰিব বিচাৰে? ধৰ্মৰ নামত বিভাজন কৰিব বিচাৰে?”
প্ৰদ্যুতে পূৰ্বেই কৈ আহিছে যে তেওঁৰ প্ৰাথমিক লক্ষ্য হৈছে জনজাতীয় সম্প্ৰদায়ৰ স্বাৰ্থ সুৰক্ষিত কৰা। ত্ৰিপুৰাৰ ৬০ খন বিধানসভা আসনৰ ভিতৰত ২০ খন জনজাতীয় সম্প্ৰদায়ৰ বাবে সংৰক্ষিত। ২০১৮ চনৰ বিধানসভা নিৰ্বাচনত ইয়াৰে ১০ খনত বিজেপিয়ে আৰু ৮খনত ইয়াৰ সহযোগী আইপিএফটিয়ে জিকিছিল। চিপিআই(এম)য়ে দুখনত জয়লাভ কৰিছিল। যোৱা কেইমাহমানত বেছিভাগ আইপিএফটি নেতা আৰু কৰ্মীয়ে তিপ্ৰাত যোগদান কৰিছে। এই পৰিস্থিতিত, তিপ্ৰাই সেই আসনবোৰত শাসকীয় মিত্ৰজোঁটৰ মুখ্য প্ৰতিদ্বন্দী বুলি ধাৰণা কৰা হৈছে।
ত্ৰিপুৰা প্ৰদেশ কংগ্ৰেছ কমিটিৰ প্ৰাক্তন সভাপতি আৰু ৰাজপৰিয়ালৰ বংশধৰ প্ৰদ্যুৎ বিক্ৰমে ২০২১ চনৰ আৰম্ভণিতে জনজাতীয় সম্প্ৰদায়ৰ অধিকাৰ সুৰক্ষাৰ দাবীত তিপ্ৰা ইণ্ডিজেনাছ প্ৰগ্ৰেছিভ ৰিজিঅ’নেল এলায়েন্স বা তিপ্ৰা মাথা দল আৰম্ভ কৰিছিল। দলটোৰ গণ ভিত্তিৰ প্ৰথম প্ৰমাণ ২০২১ চনৰ এপ্ৰিলত পোৱা গৈছিল। ত্ৰিপুৰা জনজাতীয় অঞ্চল স্বায়ত্তশাসিত জিলা পৰিষদ (এডিচি) নিৰ্বাচনত বিভিন্ন থলুৱা বা জনজাতীয় সম্প্ৰদায়ৰ লোকৰে গঠিত তিপ্ৰা মথাই ১৮খন আসন লাভ কৰিছিল। বাকী ৯খন আসন বিজেপি আৰু ইয়াৰ মিত্ৰজোঁটৰ অংশীদাৰ জনজাতীয় আইপিএফটিয়ে যুটীয়াভাৱে জিকিছিল।
যোৱা ১ জানুৱাৰীত আইপিএফটিৰ মুৰব্বী আৰু মিত্ৰজোঁটৰ মন্ত্ৰী এন চি দেববৰ্মাৰ মৃত্যুৰ পিছত প্ৰায় নেতাহীন হৈ পৰা দলটো তিপ্ৰাৰ সৈতে একত্ৰিত হ’বলৈ আলোচনাও আৰম্ভ কৰিছিল। অৱশ্যে বিজেপিৰ বাধাৰ বাবে সেয়া সম্ভৱ হোৱা নাছিল।
