কালি ৰাজ্যিক কেবিনেটে ৫ টা মুছলমান জনগোষ্ঠীক খিলঞ্জীয়া মুছলমানৰ স্বীকৃতি দিয়াক কেন্দ্ৰ কৰি প্ৰতিক্ৰিয়া প্ৰকাশ কৰিছে তৃণমূল কংগ্ৰেছৰ মেডিয়া বিভাগৰ অধ্যক্ষ দিলীপ শৰ্মাই।
তেওঁ প্ৰশ্ন কৰে “ কালি যে ঘোষণা কৰিবলগীয়া হ’ল এওঁলোক পূৰ্বে খিলঞ্জীয়া নাছিল নেকি?
অসমৰ জনসাধাৰণে অতদিনে এইকেইটা জনগোষ্ঠীক খিলঞ্জীয়া বুলিয়েই জানি আহিছিল বুলি শৰ্মাই সদৰী কৰে।
ইপিনে, খিলঞ্জীয়া ঘোষণা কৰাৰ আঁৰত বিজেপি চৰকাৰৰ ৰাজনৈতিক অভিসন্ধি থকা বুলি দাবী কৰি দিলীপ শৰ্মাই লগতে কয় “কা আন্দোলনৰ সময়ত দেশৰ প্ৰধানমন্ত্ৰী আৰু গৃহমন্ত্ৰীয়ে অসম চুক্তিৰ ৬ নং দফা আখৰে আখৰে ৰূপায়ণ কৰিম বুলি কৈছিল। আনকি ৬ নং দফা ৰূপায়ণ কমিটি এখনো গঠন কৰি দিছিল। কমিটিয়ে দিয়া প্ৰতিবেদন ধোঁৱাচাঙত তাত এতিয়া মকৰাই জাল বান্ধিছে।“
“বৰ্তমানলৈকে খিলঞ্জীয়াৰ সংজ্ঞা নিৰ্ধাৰণ নোহোৱাৰ পাছত কি যুক্তিত ৫ টা মুছলমান জনগোষ্ঠীক খিলঞ্জীয়া বুলি ঘোষণা কৰিলে?” শৰ্মাই প্ৰশ্ন কৰি এইদৰে কয়।
২০১৯-২০ চনৰ বাজেটত তেতিয়াৰ বিত্তমন্ত্ৰী ড০ হিমন্ত বিশ্ব শৰ্মাই অসমৰ খিলঞ্জীয়া মুছলমানৰ বাবে নিগম আৰু পৰিষদ গঠন কৰিব বুলি ঘোষণা কৰিছিল বুলি সোঁৱৰাই দি শৰ্মাই লগতে কয় “বাজেটত ১০০ কোটি টকাও ধাৰ্য্য কৰিছিল। কিমানজন খিলঞ্জীয়া মুছলমানৰ বাবে এই ধন খৰচ কৰিলে? কোনোধৰণৰ নিগম বা পৰিষদো গঠন নকৰিলে।“
খিলঞ্জীয়া মুছলমান বুলি পুনৰাই স্বীকৃতি দিয়াতকৈ পূৰ্বৰ প্ৰতিশ্ৰুতি অনুসৰি ১০০ কোটি টকা মোকলাই দিয়াৰ লগতে নিগম আৰু পৰিষদ গঠন কৰিবলৈ শৰ্মাই দাবী জনায়।
আনহাতে, অন্য এক বিষয়ত প্ৰতিক্ৰিয়া প্ৰকাশ কৰি শৰ্মাই কয় “ অসমৰ বিত্তীয় ব্যৱস্থাত এক বিশৃংখলতাৰ পৰিবেশৰ সৃষ্টি হৈছে। ২২ হাজাৰ কোটি টকা ৰাজ্যৰ বিভিন্ন বিভাগৰ ঠিকাদাৰসকলক দিবলৈ আছে বুলি ইতিমধ্যে খবৰ প্ৰকাশ পাইছে। মুখ্যমন্ত্ৰীয়ে দম্ভালি মাৰি কেন্দ্ৰৰ পৰা সাহায্য নালাগে বুলি ক’লে। যাৰ ফলত কালি ১০০০ কোটি টকা ধাৰ ল’বলগীয়া হৈছে আৰু সেই ধনেৰে বানপানীত ক্ষতিগ্ৰস্ত লোকক সাহায্য দিবলগীয়া হৈছে”।
শৰ্মাৰ প্ৰশ্ন “মুখ্যমন্ত্ৰীয়ে কেন্দ্ৰৰ পৰা পাবলগীয়া ধন বা অংশ কিয় সাহসেৰে আদায় কৰিব নোৱাৰে”?
আনহাতে, অসম আৰক্ষীৰ প্ৰায়বোৰ এনকাউন্টাৰেই ভুৱা বুলি দাবী কৰি শৰ্মাই লগতে অসমৰ হৈ যোৱা প্ৰত্যেকটো এনকাউন্টাৰৰ নিৰপেক্ষ তদন্তৰ দাবী তোলে তৃণমূল কংগ্ৰেছে।
