আহমেদাবাদত সংঘটিত হৈছে এক চাঞ্চল্যকৰ ঘটনা। ধৰ্ষণৰ পৰা নিজকে বচাবলৈ চলন্ত ট্ৰাকৰ পৰা জাঁপ দিলে ৬ গৰাকী স্কুলীয়া নাবালিকা ছাত্ৰীয়ে।
ঘটনাৰ বিৱৰণ অনুসৰি, স্কুলৰ পৰা ঘৰলৈ ঘূৰি আহিবলৈ এখন ট্ৰাক উঠিছিল ৬ গৰাকী স্কুলীয়া ছাত্ৰী। স্কুলৰ পৰা ট্ৰাকত এইদৰে ঘৰলৈ উভটি অহাৰ পথত ট্ৰাক চালক আৰু চালকৰ ৫ গৰাকী সতীৰ্থই ছাত্ৰীকেইগৰাকীক ধৰ্ষণৰ চেষ্টা চলায়। নিজকে ধৰ্ষণৰ পৰা ৰক্ষা কৰিবৰ বাবে ট্ৰাকৰ পৰা জঁপিয়াই আঘাতপ্ৰাপ্ত হয় ছাত্ৰীকেইগৰাকী।
মঙলবাৰে গুজৰাটৰ চোটাৱাদেপুৰ জিলাত সংঘটিত হয় এই ঘটনা। সেই জিলাৰ আৰক্ষী অধীক্ষকে জনোৱা মতে, ঘটনা সন্দৰ্ভত ইতিমধ্যে এজাহাৰ দাখিল কৰা হৈছে। ইয়াৰে এজন অভিযুক্তকো আৰক্ষীয়ে গ্ৰেপ্তাৰ কৰিছে। বাকীসকলৰ সন্ধান অব্যাহত আছে।
জানিব পৰা মতে ছাত্ৰীকেইগৰাকীৰ ঘৰ সংখেদা তালুকৰ এখন গাঁৱত। তেওঁলোকৰ ঘৰৰ পৰা প্ৰায় ৫ কিলোমিটাৰ দূৰত্বত বিদ্যালয়খন অৱস্থিত। মঙলবাৰে বিদ্যালয়ৰ পৰা ঘৰলৈ উভতি আহিবলৈ এখন ট্ৰাকত উঠিছিল ছাত্ৰীকেইগৰাকী।
অভিযোগ অনুসৰি, সেই ট্ৰাক খনত চালকৰ বাহিৰেও আন পাঁচজন লোক উপস্থিত আছিল। চালককে ধৰি ট্ৰাকখনত উপস্থিত থকা আন লোকসকলে ছাত্ৰীকেইগৰাকীক যৌন নিৰ্যাতন চলাবলৈ চেষ্টা কৰিছিল।
ধৰ্ষণৰ পৰা ৰক্ষা পাবলৈ চলন্ত ট্ৰাকৰ পৰা জঁপিয়াই দিয়া আটাইকেইগৰাকিই ছাত্ৰী গুৰুতৰভাবে আহত হৈছে আৰু বৰ্তমান আটাইকেইগৰাকী চিকিৎসাধীন হৈ আছে।
ঘটনা সন্দৰ্ভত আৰক্ষী অধীক্ষক ইমতিয়াজ শ্বেখে কয় যে আটাইকেইজন অভিযুক্তক চিনাক্ত কৰা হৈছে। এজনক গ্ৰেপ্তাৰ কৰা হৈছে। বাকী কেইজনৰ সন্ধান চলি আছে।
তেওঁ কয় যে POCSO আৰু ভাৰতীয় দণ্ডবিধিৰ বিভিন্ন ধাৰাত গোচৰ ৰুজু কৰা হৈছে। ঘটনা সন্দৰ্ভত আৰক্ষী অধীক্ষকগৰাকীয়ে কয় যে, সুযোগ উপলব্ধি কৰি অভিযুক্তই পলায়ন কৰিছে।”
