দিল্লীত সংঘটিত হৈছে এটা লোমহৰ্ষক ঘটনা।
অভি়যোগ অনুসৰি এগৰাকী ২৫ বছৰীয়া মহিলাই তেওঁৰ এঘৰ প্ৰতিৱেশীৰ এটি শিশু সন্তানক হত্যা কৰে।
হত্যা কৰি এটা প্লাষ্টিক বেগত মৃতদেহটো এটা বিল্ডিঙৰ ছাদলৈ দলিয়াই দিয়ে।
মাত্ৰ আঢ়ৈ বছৰীয়া শিশুটোক হত্যা কৰাৰ কাৰণ হৈছে মহিলাগৰাকীক এগৰাকী তান্ত্ৰিকে তেনে কৰিবলৈ উপদেশ দিছিল।
দেওবাৰে আৰক্ষীয়ে জনোৱামতে, মহিলাগৰাকীয়ে গৰ্ভাৱস্থা লাভ কৰিবৰ বাবে তান্ত্ৰিকজনে এই হত্যাকাণ্ড সংঘটিত কৰিবলৈ বিধান দিছিল।
মহিলাগৰাকীক বৰ্তমান আৰক্ষীৰ জেৰাত আছে।
দিল্লীৰ ৰোহিনী অঞ্চলত সংঘটিত হৈছে এই ঘটনা।
জেৰাত মহিলাগৰাকীয়ে কয় যে তেওঁ সন্তানধাৰণ কৰিবলৈ অক্ষম বাবে তেওঁৰ শহুৰেকৰ ঘৰ আৰু আত্মীয়সকলে নানাধৰণে তিৰষ্কাৰ কৰিছিল।
যাৰ ফলশ্ৰুতিত তেওঁ এজন তান্ত্ৰিকৰ কাষ চাপিবলৈ বাধ্য হ’ল।
তান্ত্ৰিকজনে ভগৱানত সন্তুষ্ট কৰিবলৈ এটি শিশু বলি দিবলৈ বিধান দিলে।
তাৰ পাছতে তেওঁ সংঘটিত কৰিলে এই ঘটনা।
মহিলাগৰাকীয়ে আৰক্ষীক জনায় যে তেওঁ ২০১৩ চনতে বিবাহপাশত আৱদ্ধ হৈছিল কিন্তু চিকিৎসকক দেখুওৱাৰ পাছতো সন্তান ধাৰণ কৰিব পৰা নাছিল।
যাৰ ফলশ্ৰুতিত চাৰি বছৰ পূৰ্বে তেওঁৰ গৃহস্থান উত্তৰ প্ৰদেশৰ হাৰদৈ অঞ্চলৰ এগৰাকী তান্ত্ৰিকৰ কাষ চাপে।
শিশুটো হত্যা কৰাৰ পাছত তাৰ অভিভাৱকসকলৰ মাজত হুৱা দুৱা লাগে।
তেওঁলোকে শিশুটোক কোনোবাই অপহৰণ অথবা নিখোঁজ হোৱা বুলি ভাবে।
শনিবাৰে আৰক্ষীক তেওঁলোকে দিয়া এখন অভিযোগৰ ভিত্তিত আৰক্ষীয়ে অনুসন্ধান চলায়।
যেতিয়া বিল্ডিংটোত শিশুটোৰ মৃতদেহ তেওঁলোকে লাভ কৰে, দেখে যে শিশুটোৰ ডিঙিত আঘাতৰ চিন স্পষ্ট।
প্ৰথম পৰ্যবেক্ষণতে আৰক্ষীয়ে অনুমান কৰে যে শিশুটোক ডিঙি চেপি হত্যা কৰা হৈছিল।
তাৰপাছত এটা হত্যাকাণ্ডৰ গোচৰ পঞ্জীয়ন কৰা হয়।
শিশুটোৰ পৰিয়ালবৰ্গ, আত্মীয় আৰু প্ৰতিৱেশীসকলক আৰক্ষীয়ে প্ৰশ্ন সোধাত তেওঁলোকে কয় যে শিশুটোক শেষবাৰৰ বাবে এগৰাকী প্ৰতিৱেশীৰ স’তে দেখা পাইছিল।
যেতিয়া প্ৰতিৱেশীগৰাকীক আৰক্ষীয়ে জেৰা কৰে, তেওঁ স্বীকাৰোক্তি কৰে যে শিশুটোৱে ছাদৰ ওপৰত খেলি থাকোতে তেওঁ তাক হত্যা কৰে।
ঘটনাটোৱে চাঞ্চল্যৰ সৃষ্টি কৰিছে।