বিয়া পাতিলেই এতিয়া বহুতৰে জেপ গৰম হ’ব।
কাৰণ বিয়া পাতিলেই চৰকাৰকে নৱ দম্পতিক দিব প্ৰায় ৪ লাখ ২০ হাজাৰ টকা।
অৱশ্যে এই পদক্ষেপ গ্ৰহণ কৰা নাই ভাৰত চৰকাৰে। এই পদক্ষেপ গ্ৰহণ কৰিছে প্ৰযুক্তিৰ দেশ জাপানে।
জাপানত এতিয়া লক্ষ্যণীয় ভাবে হ্ৰাস পাইছে জনসংখ্যা।
দেশ খনৰ অধিকাংশ যুৱক-যুৱতীয়েই বিয়া বুলি ক’লেই মুখ ঘূৰাই দিয়ে।
বিয়া যেন জাপানৰ বহু যুৱক-যুৱতীৰ বাবে এক আপদহে। সেয়ে ভয়াৱহ ভাবে দেশখনত হ্ৰাস পাইছে জনসংখ্যা।
এই বিপদৰ পৰা ৰক্ষা পোৱাৰ উদ্দেশ্যেই জাপানৰ চৰকাৰে বিয়া পতা নৱ দম্পতিক ৬,০০,০০০ য়েনকৈ দিয়াৰ সিদ্ধান্ত লৈছে।
ভাৰতীয় মুদ্ৰাৰ হিচাবত এই ধনৰ পৰিমাণ হৈছে প্ৰায় ৪ লাখ ২০ হাজাৰ টকা।
অৱশ্যে বিবাহপাশত আৱদ্ধ হোৱা যুৱক-যুৱতীয়ে চৰকাৰে বান্ধি দিয়া কেতবোৰ বিশেষ চৰ্ত পূৰণ কৰিব লাগিব।
চৰ্ত অনুসৰি বিয়া পতা যুৱক-যুৱতীৰ বয়স ৪০ বছৰতকৈ বেছি হ’ব নোৱাৰিব।
দৰা-কইনাৰ বাৰ্ষিক আয় ৫.৪ নিযুত য়েনৰ বেছি হ’ব নোৱাৰিব আদি।
উল্লেখ্য ২০১৫ চনৰ পৰিসংখ্যা অনুসৰি জাপানৰ ২৫-৩৪ বছৰৰ ভিতৰৰ ২৯.১ শতাংশ ল’ৰাই বিয়া নপতাকৈ আছে।
একেদৰে এই বয়সৰ ভিতৰৰ ১৭.৮ শতাংশ ছোৱালী অবিবাহিতা হৈ ৰৈছে। ফলত দেশখনৰ জনসংখ্যা বৃদ্ধি পোৱা নাই।
