আপুনি কেতিয়াবা শুনিছেনে যে শৌচাগাৰত বহি থকা অৱস্থাত এজন ব্যক্তিৰ মলাশয় (Rectum) শৰীৰৰ বাহিৰলৈ ওলাই আহিব পাৰে? আচৰিত যেন লাগিলেও, আমি প্ৰতিদিনে কৰা এটা সাধাৰণ ভুলৰ বাবে এনে এক ভয়ংকৰ পৰিস্থিতিৰ সৃষ্টি হ’ব পাৰে।
শেহতীয়াকৈ চীনৰ এজন ব্যক্তিৰ ক্ষেত্ৰত এনে এক ঘটনা ঘটিছিল। সেই ব্যক্তিজনে প্ৰতিদিনে শৌচাগাৰত বহি কমেও ৩০ মিনিট সময় ম’বাইলত গেম খেলিছিল। এদিন মাজনিশা শৌচ কৰিবলৈ যাওঁতে তেওঁৰ মলাশয়ৰ প্ৰায় ৬ ইঞ্চি অংশ শৰীৰৰ বাহিৰলৈ ওলাই আহে, যাৰ বাবে তেওঁক জৰুৰীকালীনভাৱে হাস্পতালত ভৰ্তি কৰিবলগীয়া হয়।
মলাশয় কিয় বাহিৰলৈ ওলাই আহে? (Rectal Prolapse)
চিকিৎসকৰ মতে, শৌচাগাৰত অত্যধিক সময় বহি থকাৰ ফলত তেওঁৰ পেলভিক পেশী (Pelvic Muscles) দুৰ্বল হৈ পৰিছিল। এই অৱস্থাটোক চিকিৎসা বিজ্ঞানৰ ভাষাত ‘ৰেক্টেল প্ৰলেপ্স’ (Rectal Prolapse) বুলি কোৱা হয়। ইয়াত মলাশয়ৰ বেৰখন ইয়াৰ স্বাভাৱিক স্থানৰ পৰা খহি আহে আৰু শৌচদ্বাৰেৰে বাহিৰলৈ ওলাই পৰে। উক্ত ব্যক্তিজনৰ সৰুৰে পৰাই এই সমস্যাৰ কিছু লক্ষণ আছিল, যিটো সময়মতে চিকিৎসা নকৰাৰ বাবে আৰু শৌচাগাৰত ফোন ব্যৱহাৰ কৰি বেছি সময় বহি থকাৰ বাবে অধিক গুৰুতৰ হৈ পৰিল।
শৌচাগাৰত বেছি সময় ফোন ব্যৱহাৰ কৰিলে কি কি সমস্যা হ’ব পাৰে?
শৌচাগাৰৰ আসনত (Toilet seat) প্ৰয়োজনতকৈ বেছি সময় বহি থাকিলে শৰীৰত বিভিন্ন দীৰ্ঘম্যাদী প্ৰভাৱ পৰিব পাৰে:
অৰ্শ বা কেঁচুমূৰীয়া (Hemorrhoids): বেছি সময় বহি থাকিলে পায়ুদ্বাৰৰ আশে-পাশে থকা সিৰাবোৰৰ ওপৰত অতিৰিক্ত চাপ পৰে। ইয়াৰ ফলত সিৰাবোৰ ফুলি উঠে আৰু শৌচ কৰাৰ সময়ত ঘৰ্ষণৰ ফলত তেজ ওলাব পাৰে।
পেলভিক পেশীৰ দুৰ্বলতা: শৌচাগাৰত দীৰ্ঘসময় বহি থকা অৱস্থানে শ্ৰোণী বা পেলভিক অঞ্চলৰ পেশীসমূহ দুৰ্বল কৰি তোলে। ইয়াৰ ফলত কোষ্ঠকাঠিন্য, প্ৰস্ৰাৱ-পায়খানা ধৰি ৰাখিব নোৱাৰা সমস্যা (Incontinence), আৰু হাঁহিলে বা কাহিলে প্ৰস্ৰাৱ ওলাই যোৱাৰ দৰে সমস্যা হ’ব পাৰে।
ৰেক্টেল প্ৰলেপ্স: ওপৰত উল্লেখ কৰাৰ দৰে, অত্যধিক চাপে মলাশয়টোক ইয়াৰ স্বাভাৱিক স্থানৰ পৰা স্থানচ্যুত কৰি শৰীৰৰ বাহিৰলৈ ঠেলি উলিয়াই দিব পাৰে।
গতিকে, শৌচাগাৰত অতিৰিক্ত সময় অতিবাহিত কৰা পৰিহাৰ কৰক। যদি আপোনাৰ শৌচ কৰোঁতে কষ্ট হয় বা কোনো অস্বাভাৱিক লক্ষণ দেখা পায়, তেন্তে পলম নকৰি বিশেষজ্ঞ চিকিৎসকৰ পৰামৰ্শ লওক।
বি.দ্ৰ. : এই তথ্য কেৱল সাধাৰণ সজাগতাৰ বাবে আগবঢ়োৱা হৈছে। কোনো স্বাস্থ্যজনিত সমস্যাৰ বাবে সদায় চিকিৎসকৰ পৰামৰ্শ ল’ব।
