ৱাশ্বিংটনে ইছলামিক ষ্টেট (আইএছ) উগ্ৰপন্থী গোটৰ এজন শীৰ্ষ কমাণ্ডাৰৰ মৃত্যুৰ কথা নিশ্চিত কৰিছে। বৃহস্পতিবাৰে পেন্টাগনে কয় যে চোমালিয়াত আমেৰিকাৰ সেনা বাহিনীৰ এক অভিযানত আই এছৰ শীৰ্ষ কমাণ্ডাৰ বিলাল আল-ছুদানী আৰু তেওঁৰ ১০ জন সহযোগী নিহত হৈছে।
আমেৰিকা যুক্তৰাষ্ট্ৰৰ প্ৰতিৰক্ষা সচিব লয়ড অষ্টিনে কয়, “ৰাষ্ট্ৰপতি জো বিডেনৰ নিৰ্দেশত ২৫ জানুৱাৰীত বিশেষ বাহিনীয়ে উত্তৰ চোমালিয়াত আই এছৰ এটা গোপন শিবিৰত অভিযান চলাইছিল। সেই অভিযানত বিলাল আৰু তেওঁৰ সহযোগীসকল নিহত হৈছে।
লগতে পঢ়ক: ”টেংকেৰে আৰম্ভ, ইয়াৰ পিছত পাৰমাণৱিক বোমা”-বিডেন প্ৰশাসনক তীব্ৰ সমালোচনা ডোনাল্ড ট্ৰাম্পৰ
আমেৰিকা যুক্তৰাষ্ট্ৰৰ সেনাৰ যুটীয়া চীফ অফ ষ্টাফ কমিটিৰ অধ্যক্ষ জেনেৰেল মাৰ্ক মিলাৰীয়ে দাবী কৰে যে বিলালৰ মৃত্যু আফ্ৰিকা আৰু পশ্চিম এছিয়াত আই এছৰ বাবে এক ডাঙৰ আঘাত।
নৱেম্বৰত চিৰিয়াৰ যুদ্ধত ইয়াৰ সৰ্বোচ্চ নেতা আবু আল-হাছান আল-হাছেমী আল-কুৰাইছিৰ মৃত্যুৰ পিছত আবু আল-হুছেইন আল-হুছেইনি আল-কুৰাইছিক ইছলামিক ষ্টেট (আইএছ) গোটৰ নতুন মুৰব্বী হিচাপে নিযুক্তি দিয়া হৈছে। বিলাল নতুন আইএছ মুৰব্বীৰ ঘনিষ্ঠ বুলি জনা গৈছিল।
লগতে পঢ়ক: ইউক্ৰেইনত পুনৰ ৰাছিয়াৰ মিছাইল আক্ৰমণ; নিহত কমেও ১১ জন
আইএছৰ প্ৰতিষ্ঠাপক আৰু ইয়াৰ সৰ্বোচ্চ নেতা আবু বকৰ আল-বাগদাদী ২০১৯ চনত আমেৰিকা যুক্তৰাষ্ট্ৰৰ সামৰিক অভিযানত নিহত হৈছিল। তাৰ পিছতে ৪৫ বছৰীয়া শিক্ষাবিদ আবু ইব্ৰাহিম আল হাছিমি আল কুৰাইছিয়ে সংগঠনটোৰ দায়িত্ব গ্ৰহণ কৰে। যোৱা বছৰ মাৰ্চত উত্তৰ চিৰিয়াত আমেৰিকা যুক্তৰাষ্ট্ৰৰ সামৰিক অভিযানত ইব্ৰাহিমৰ মৃত্যুৰ পিছত হাচেমীয়ে দায়িত্ব গ্ৰহণ কৰিছিল।
