আছু আৰু ৩০ টা জনগোষ্ঠীয় সংগঠনৰ আহ্বানত দেওবাৰে যোৰহাট জিলাৰ টীয়কত এক প্ৰতিবাদী জোঁৰ সমদল উলিওৱা হয়।
টীয়ক আঞ্চলিক ছাত্ৰ সন্থা, শিমলুগুৰি মৌজা আঞ্চলিক ছাত্ৰ সন্থা, টীয়ক চুতীয়া ছাত্ৰ সন্থা, আটচা টীয়ক উপ শাখা, টিএমপিকে টীয়ক আঞ্চলিক সমিতি, জগদুৱাৰ ব্যৱসায়ী সন্থা তথা জগদুৱাৰ আৰু টীয়কৰ ৰাইজে জাতিধ্বংসী নাগৰিকত্ব সংশোধনী বিধেয়কৰ বিৰুদ্ধে এই প্ৰতিবাদী জোঁৰ সমদল বাহিৰ কৰে।
জগদুৱাৰৰ পৰা গায়ন গাঁও, কাকতি গাঁওলৈকে সমদল কৰি প্ৰতিবাদকাৰীসকলে কেব আমি নামনো, বিজেপি গ’ বেক, সৰ্বানন্দ সোণোৱালৰ কাম নাই, বিজেপিক খেদাওক অসমক ৰক্ষা কৰক, জাতিদ্রোহী অগপ নিপাত যাওঁক, অতুল বৰা নিপাত যাওক আদি ধ্বনিৰে পৰিবেশ উত্তাল কৰি তোলে।
প্ৰতিবাদী সমদলত নেতৃত্ব দিয়ে অসম আন্দোলনত গুলিবিদ্ধ ৰমেন শৰ্মা, টীয়ক জ্যেষ্ঠ নাগৰিক সন্থাৰ সভাপতি অশোক কুমাৰ বৰা, যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগ, গীতিকাৰ অশোক বৰা, কৰ্মচাৰী পৰিষদৰ টীয়ক আঞ্চলিকৰ সভাপতি দিলীপ বৰা, সম্পাদক হেমন্ত শইকীয়া, উপদেষ্টা কিশোৰ দাসকে ধৰি নেতাসকলে।
যোৰহাট মহকুমা ছাত্ৰ সন্থাৰ সাংগঠনিক সম্পাদক যদুমণি বৰুৱা, টীয়ক আছুৰ সভাপতি ৰন্টু ভূঞা, অধিবক্তা বিশ্বজিত নাথ, জগদুৱাৰ ব্যৱসায় সন্থাৰ সভাপতি ৰাজুমনি বৰুৱা, সম্পাদক ভাস্কৰ বৰুৱা, কংগ্ৰেছ নেত্ৰী পল্লৱী শইকীয়া, প্ৰাক্তন প্ৰৱক্তা খগেন ফুকনকে ধৰি আন শতাধিক ৰাইজে সমদলটোত অংশগ্ৰহণ কৰে l
উল্লেখ্য যে এই প্ৰতিবাদী কাযসূচীতে জগদুৱাৰ ব্যৱসায়ী সন্থাৰ লগতে প্ৰতিবাদকাৰী সকলে বিধেয়কখনৰ প্ৰতিলিপি দাহ কৰে l