তিনিচুকীয়া জিলাৰ মাৰ্ঘেৰিটা মহকুমাৰ লিডু আৰক্ষী চকীৰ অন্তৰ্গত পাটকাই পাহাৰৰ পাদদেশত অৱস্থিত ৩ নং মালৌ গাৱঁৰ ৰাঙে হাখুন নামৰ ৪৫ বছৰীয়া বিশেষ ভাৱে সক্ষম ব্যক্তি এগৰাকী জাগুনস্থ ৰাজপুতনা ৰাইফলচৰ জোৱান আৰু আই এন টি লোকৰ দ্বাৰা নিৰ্মম শাৰীৰিক অত্যাচাৰৰ সন্মুখীন হোৱাৰ অভিযোগ উত্থাপন কৰাৰ ২৪ ঘণ্টা নৌহওঁতেই সুৰ সলনি কৰিলে।
আজি লেখাপানীৰ সেনা চাউনীত সংবাদমাধ্যমৰ আগত তেওঁ ভাৰতীয় সেনাৰ লোক বুলি ধাৰণা কৰাসকল আচলতে সেনাৰ লোক নাছলি বুলি কয়।
আজি কেইবাটাও সেনা শিবিৰ চোৱাৰ লগতে প্ৰতিগৰাকী জোৱানক সাক্ষাৎ কৰাৰ পাছত তেওঁক উঠাই নি শাৰীৰিক ভাৱে অত্যাচাৰ কৰাসকল সেনাৰ জোৱান নাছিল সেয়া নিশ্চিত হৈছে বুলি সংবাদমাধ্যমৰ আগত হাখুনে সদৰী কৰে।
ব্যক্তিজনে সেনাৰ হেঁচাত ভাষ্য সলনি কৰাৰ অভিযোগ অস্বীকাৰ কৰে।
গুৰুত্বপূৰ্ণ কথা টিৰাপ স্বায়ত্ত্ব শাসিত জিলা পৰিষদ দাবী সমিতিয়ে দেওবাৰে শতাধিক গাওঁখনৰ লোক লৈ লিডু আৰক্ষী চকীত উপস্থিত হৈ সবিশেষ প্ৰকাশ কৰিছিল।
লগতে সোমবাৰে তিনিচুকীয়া জিলা উপায়ুক্তক সবিশেষ জনাই ন্যায় বিচৰাৰ লগতে মানৱাধিকাৰ আয়োগৰ ওচৰত গোচৰ তৰিব বুলি জানিবলৈ দিছিল।
এতিয়া প্ৰশ্ন হ’ল – পাটকাই পাদদেশৰ ৩নং মালৌ গাৱঁৰ ৰাঙে হাখুনক যদি সেনাই উঠাই নিয়া নাছিল কোনে উঠাই নিছিল?
কাৰ দ্বাৰা নিৰ্মম শাৰীৰিক অত্যাচাৰৰ সন্মুখীন হৈছিল সেইয়া এক ৰহস্যৰ বিষয় হিচাপে বিবেচিত হৈছে।
এই সন্দৰ্ভত এক তদন্তৰ অৱকাশ আছে বুলি একাংশ সচেতন মহলত চৰ্চা হৈছে।