‘বিশ্বখ্যাত এশিঙীয়া গঁড় চোৰাংচিকাৰীৰ হাতত নিধন হোৱাতো আমাৰ সকলোৰে বাবে উদ্বিগ্নতাৰ কাৰণ। অসমৰ গঁড় অসমৰে নহয় বিশ্বৰ সম্পদ। সেয়ে এশিঙীয়া গঁড়ৰ সুৰক্ষাৰ বাবে চৰকাৰকে ধৰি সংশ্লিষ্ট সকলো পক্ষই সম্ভৱপৰ প্ৰচেষ্টা হাতত লোৱা উচিত।’ এই মন্তব্য কৰে সুদূৰ ইংলেণ্ডৰ ইয়াকশ্বায়াৰৰ পৰা অসম ভ্ৰমণ কৰিবলৈ অহা পৰ্যটক দম্পতী জেনিঠ কোপ’ল আৰু ব্ৰায়ান কোপ’লে।
ইৰ্ষ্টান আইক’নিক টোৰচ এণ্ড ট্ৰেভেলছৰ সঞ্চালক উদিত ভানু বৰঠাকুৰৰ তত্বাৱধানত অসম ভ্ৰমণ কৰা পৰ্যটক দম্পতীদ্বয়ে আজি নগাঁৱত সাংবাদিকৰে হোৱা এক অন্তৰংগ অনুষ্ঠানত অসমীয়াৰ অতিথি পৰায়ণতাত সন্তুষ্টি প্ৰকাশ কৰি কয় অসমত অসমীয়া মানুহৰ কৃষ্টি-সংস্কৃতি, আচাৰ-ব্যৱহাৰ, খাদ্যভাস আদিয়ে তেওঁলোকক বাৰে বাৰে আকৰ্ষণ কৰে বুলি কয়।
তাৰোপৰি ইংৰাজ সকলৰ প্ৰতি অসমৰ মানুহৰ বিদ্বেষ ভাৱ থকা বুলি তেওঁলোকে এক ধাৰণা পুহি ৰাখিছিল যদিও অসমলৈ আহি সেই ধাৰণা অমূলক বুলি বৃটিছ দম্পতীদ্বয়ে ব্যক্ত কৰে।
আনহাতে অসমত সন্ত্ৰাসবাদী সংগঠন সক্ৰিয় বুলি বহিঃদেশত প্ৰচাৰিত খবৰৰ প্ৰতিক্ৰিয়া প্ৰকাশ কৰি ১৭ বাৰ ভাৰত ভ্ৰমণ আৰু তিনিবাৰ অসম ভ্ৰমণৰ কালত কোনো ধৰণৰ সন্ত্ৰাসবাদী সংগঠনৰ ভাবুকিৰ সন্মুখীন হোৱা নাই বুলি স্পষ্ট কৰি কয়ে যে এবাৰে মাথো কাশ্মীৰত ২০১৬ চনত তেওঁলোকে এক অশান্তজৰ্জৰ পৰিস্থিতিৰ সন্মুখীন হোৱা বুলি জানিবলৈ দিয়ে।
দম্পতীদ্বয়ে নগাঁৱকে ধৰি অসমত পৰ্যটকক আকৰ্ষণ কৰা যথেষ্ট সমল আছে বুলি মন্তব্য কৰি কয় যে অসমৰ জাতীয় জীৱন, বনাঞ্চল তথা প্ৰাকৃতিক সৌন্দৰ্যই সকলোকে আকৰ্ষণ কৰে।
ইষ্টান আইক’নিক টোৰচ এণ্ড ট্ৰেভেলছৰ সঞ্চালক উদিত ভানু বৰঠাকুৰে জনোৱা মতে জেনিঠ কোপ’ল এগৰাকী বিশেষভাৱে সক্ষম শিশুৰ বিদ্যালয়ৰ শিক্ষক হোৱাৰ বিপৰীতে ব্ৰায়ান এগৰাকী কাৰিকৰী অভিযন্তা।
উল্লেখযোগ্য যে ইষ্টান আইক’নিক টোৰচ এণ্ড ট্ৰেভেলছৰ তত্বাৱধানত ইতিপূৰ্বে ইংলেণ্ড, আমেৰিকা, অষ্ট্ৰেলিয়া, জাৰ্মানী আদি বহু দেশৰ পৰ্যটকে অসম ভ্ৰমণ কৰিছে।
