জম্মু-কাশ্মীৰৰ পেহেলগামত পৰ্যটকক গুলীয়াই হত্যা কৰাৰ পূৰ্বে পৰ্যটকৰ ধৰ্মৰ বিষয়ে প্ৰশ্ন কৰিছিল সন্ত্ৰাসবাদীয়ে। মৃতকসকলৰ কেইবাটাও পৰিয়ালে এই অভিযোগ উত্থাপন কৰিছে।
ইফালে চোৰাংচোৱাৰ বিষয়া সকলৰ মতে, স্থানীয় লোকৰ সহায় অবিহনে সন্ত্ৰাসবাদীয়ে এনে আক্ৰমণ সংঘটিত কৰা অসম্ভৱ। স্থানীয় লোকৰ সমৰ্থন লাভ কৰিহে বৈছাৰণ উপত্যকালৈ গৈছিল সন্ত্ৰাসবাদীৰ দল।
কিন্তু তেওঁলোকক কোনে সহায় কৰিছিল? স্থানীয় ট্যুৰ গাইড নে ঘোঁৰাত উঠাই পৰ্যটকক পৰ্যটন কেন্দ্ৰলৈ লৈ যোৱাসকলে? এই কথাক লৈ এতিয়া সন্দেহ ঘনীভূত হৈছে। কাৰণ আৰক্ষীয়ে ইতিমধ্যে এজন গাইডক গ্ৰেপ্তাৰ কৰিছে।
২২ এপ্ৰিলত পেহেলগামৰ বৈছাৰণ উপত্যকাত সন্ত্ৰাসবাদী আক্ৰমণ সংঘটিত হোৱাৰ পূৰ্বে ২০ এপ্ৰিলত উত্তৰ প্ৰদেশৰ বাসিন্দা একতা তিৱাৰী নামৰ এগৰাকী যুৱতী তালৈ গৈছিল। তেওঁ দাবী কৰিছিল যে তেওঁ এজন সন্দেহযুক্ত সন্ত্ৰাসবাদীৰ সৈতে কথা পাতিছিল!
অভিযোগ অনুসৰি, উক্ত ব্যক্তিজনৰ ঘোঁৰাত বৈছাৰণলৈ গৈছিল যুৱতীগৰাকী। যাত্ৰাৰ সময়ত সেই ব্যক্তিজনে তেওঁক সুধিছিল যে তেওঁৰ ধৰ্ম কি? ইতিমধ্যে চাৰিওজন আক্ৰমণকাৰীৰ ফটো প্ৰকাশ পাইছে। ইয়াৰ উপৰিও ছ’চিয়েল মিডিয়াতো প্ৰচাৰিত হৈছে এগৰাকী গাইডৰ ফটো। ছবিখন দেখাৰ পিছতে তেওঁ এই কথা আৰক্ষীক অৱগত কৰে।
যুৱতীগৰাকীৰ অভিযোগৰ ভিত্তিত গণ্ডাৰৱালৰ পৰা আয়াজ আহমেদ জংগল নামৰ গাইডজনক গ্ৰেপ্তাৰ কৰা হয়। ইতিমধ্যে তেওঁৰ জেৰা আৰম্ভ হৈছে। পেহেলগাম সন্ত্ৰাসবাদী আক্ৰমণৰ লগত এই ব্যক্তিজন পৰোক্ষভাৱে জড়িত বুলি আৰক্ষীয়ে সন্দেহ প্ৰকাশ কৰিছে। সন্দেহ অনুসৰি তেওঁৰ পৰা বিভিন্ন তথ্য লৈ সেই স্থানলৈ আহিছিল উগ্ৰপন্থী। ইতিমধ্যে আৰক্ষীয়ে জানিব পাৰিছে যে উগ্ৰপন্থীয়ে বৈষ্ণো দেৱী উপত্যকাতো কেইবাটাও অভিযান চলাইছিল।
একতা নামৰ যুৱতীগৰাকীৰ ফোনত এই যুৱকজনৰ এখন ছবি আছে। যুৱতীগৰাকীয়ে দাবী কৰিছে যে এই ব্যক্তিজন উগ্ৰপন্থীৰ অন্যতম। যুৱতীগৰাকীয়ে আৰক্ষীক জনোৱা মতে, পাকিস্তানীৰ দৰে দেখা দুজন যুৱকে তেওঁৰ ধৰ্মৰ বিষয়ে সুধিছিল।
যুৱতীগৰাকীয়ে অধিক বিস্ফোৰক দাবীও উত্থাপন কৰে। তেওঁ আৰক্ষীক জনোৱা মতে, কোনোবাই ফোনত বন্দুকৰ কথা কোৱা শুনিছিল।
