কেন্দ্ৰৰ বিজেপি চৰকাৰৰ ব্যক্তিগতকৰণ নীতিৰ বিৰুদ্ধে কৃষক বিদ্ৰোহৰ পাছত এইবাৰ ভাৰত বন্ধৰ আহ্বান দিছে দেশৰ শ্ৰমিক সংগঠনসমূহে।
অহা ২৬ নৱেম্বৰত দেশজোৰা ধৰ্মঘটৰ আহ্বান দিছে দেশৰ দহটা শ্ৰমিক সংগঠনে।
নতুন দিল্লীত অনুষ্ঠিত সংগঠনসমূহৰ ৰাষ্ট্ৰীয় অভিৱৰ্তনত এই সিদ্ধান্ত গ্ৰহণ কৰা হয়। তদুপৰি, কৰ’না পৰিস্থিতি মোকাবিলা কৰাৰ ক্ষেত্ৰত চৰকাৰৰ ভুল সিদ্ধান্তৰো প্ৰতিবাদ কৰা হয়।
আনহাতে, আয়কৰ সীমাৰ বাহিৰত থকা পৰিয়ালক প্ৰতিমাহে ৭,৫০০টকা আৰু প্ৰতিজন সদস্যলৈ ১০ কেজি খাদ্য সামগ্ৰী, গ্ৰাম্য নিয়োগ নিশ্চিতকৰণ আঁচনিত ২০০দিনৰ কাম দিয়াকে ধৰি পাঁচটা দাবী উত্থাপন কৰা হয়।
ভাৰত বন্ধৰ আহ্বান দিয়া সংগঠনসমূহৰ ভিতৰত আছে আইএনটিইউচি, চিআইটিইউ, এআইটিইউচি, ছেবা, এইচএমএছ, টিইউচিচি, ইউটিইউচি, এআইচিচিটিইউ, এলপিএফ সহ কেন্দ্ৰীয় ট্ৰেড য়ুনিয়নসমূহ।
কেন্দ্ৰৰ এনডিএ চৰকাৰ ৰাষ্ট্ৰীয় সম্পত্তি ব্যক্তিগতকৰণত তৎপৰ হৈ পৰা বুলি অভিযোগ তুলিছে শ্ৰমিক সংগঠনসমূহে।
কেন্দ্ৰৰ এনে সিদ্ধান্তই লাখ লাখ শ্ৰমিক তথা সাধাৰণ লোকৰ জীৱনলৈ চৰম অনিশ্চয়তা কঢ়িয়াই অনাৰ অভিযোগ তুলি সংগঠনসমূহে ইয়াৰ প্ৰতিবাদত ৰাষ্ট্ৰজোৰা ধৰ্মঘটৰ আহ্বান দিছে।
বিগত মাহত নতুন কৃষি আইনৰ বিৰুদ্ধে আৰম্ভ হোৱা কৃষকৰ প্ৰবল প্ৰতিবাদৰ প্ৰভাৱ এতিয়াও অব্যাহত আছে।
নতুন কৃষি আইনৰ বিৰোধিতা কৰিয়েই এনডিএৰ আটাইতকৈ পুৰণি মিত্ৰজোঁট শিৰোমণি আকালি দলে এনডিএ ত্যাগ কৰিছে।
