জ্যেষ্ঠ নাগৰিকসকলৰ বাবে ভ্রমণ সদায় এক হেঁপাহৰ বিষয় কিন্তু বয়স আৰু শাৰীৰিক অসুস্থতাৰ বাবে বহুতৰে সেই ইচ্ছা পূৰণ নহয়। এই কথাটোক গুৰুত্ব দি বিশ্বত পোনপ্ৰথমবাৰৰ বাবে এক বিশেষ পদক্ষেপ গ্ৰহণ কৰা হৈছে। এতিয়াৰে পৰা ঘৰৰ পৰা নোলোৱাকৈ বা শাৰীৰিক কষ্ট নকৰাকৈয়ে বৃদ্ধসকলে এখন দেশৰ পৰা আনখন দেশলৈ ভ্ৰমণ কৰিব পাৰিব। ইয়াৰ বাবে অষ্ট্ৰেলিয়াত মুকলি কৰা হৈছে এক অত্যাধুনিক ভার্চুৱেল ট্রেন।
অষ্ট্ৰেলিয়াৰ চেইণ্ট ভিনচেণ্ট কেয়াৰ টুয়ুম্বাত এই বিশেষ ট্রেন সেৱা আৰম্ভ কৰা হৈছে যাৰ নাম দিয়া হৈছে চেইণ্ট ভিনচেণ্ট এক্সপ্ৰেছ। চলিত বৰ্ষৰ মাৰ্চ মাহৰ পৰাই এই ব্যৱস্থা কাৰ্যকৰী কৰা হৈছে। এই উদ্যোগৰ মূল লক্ষ্য হৈছে সেইসকল বয়সস্থ লোক যিসকলে ভ্ৰমণ কৰিব বিচাৰে যদিও শাৰীৰিক সীমাবদ্ধতাৰ বাবে সেয়া অসম্ভৱ হৈ পৰে। এই ভার্চুৱেল ট্রেনখনত যাত্ৰীসকলক এক বাস্তৱসন্মত ভ্ৰমণৰ আমেজ দিবলৈ বহুতো আধুনিক প্ৰযুক্তি ব্যৱহাৰ কৰা হৈছে।
এই ভার্চুৱেল ট্রেনৰ অভিজ্ঞতাটো অতি আমোদজনক। ট্রেনখনৰ চাৰিওফালে ডাঙৰ ডাঙৰ এইচডি স্ক্ৰীণ লগোৱা হৈছে আৰু চাৰিওফালৰ পৰা ভাঁহি অহা শব্দৰ জৰিয়তে যাত্ৰীসকলক আচল ৰে’ল যাত্ৰাৰ দৰে অনুভৱ কৰোৱা হয়। কেৱল দৃশ্য বা শব্দই নহয় ইয়াত যাত্ৰীসকলক প্ৰিন্টেড টিকট আৰু নকল পাছপোৰ্টো প্ৰদান কৰা হয়। ইয়াৰ উপৰিও যাত্ৰীসকলে যিখন দেশলৈ ভ্ৰমণ কৰিব বিচাৰে সেই দেশৰ সুস্বাদু আহাৰৰ সোৱাদো ল’ব পাৰিব। এনেদৰে প্ৰযুক্তিক ব্যৱহাৰ কৰি তেওঁলোকক ১০ খনকৈ ভিন্ন দেশ ভ্ৰমণৰ সুযোগ দিয়া হৈছে।
বিশেষজ্ঞসকলৰ মতে এই অভিনৱ পদক্ষেপে বৃদ্ধসকলৰ মানসিক স্বাস্থ্যৰ উন্নতি সাধন কৰিছে। বিশেষকৈ ডিমেনচিয়া বা স্মৃতি শক্তি বিলোপ হোৱা ৰোগত আক্ৰান্ত ব্যক্তিসকলৰ বাবে এই ভার্চুৱেল ভ্ৰমণ অতি সহায়ক বুলি প্ৰমাণিত হৈছে। এই যাত্ৰাই তেওঁলোকক মানসিকভাৱে সক্ৰিয় কৰি ৰাখে আৰু স্মৃতি শক্তি বৃদ্ধিত সহায় কৰিব।
আধুনিক প্ৰযুক্তিৰ জৰিয়তে কিদৰে মানৱীয় সেৱা আগবঢ়াব পাৰি এয়া তাৰ এক উৎকৃষ্ট নিদৰ্শন। ভৱিষ্যতে বিশ্বৰ বিভিন্ন বৃদ্ধাশ্ৰম বা কেয়াৰ চেন্টাৰসমূহত এই আৰ্হি জনপ্ৰিয় হোৱাৰ সম্ভাৱনা আছে। মুঠতে এই ভার্চুৱেল ট্রেনখনে প্ৰবীণসকলৰ বাবে সীমাবদ্ধতাৰ মাজতো এক নতুন জীৱনৰ সোৱাদ কঢ়িয়াই আনিছে।
