অভিনৱ প্ৰচেষ্টা:এজোপা মহানিম নিম গছৰ পুলি ৰোৱক আৰু ১০০০০ টকা জিকক! ক’ত?

নামনি অসমৰ ধুবুৰী জিলাৰ অন্তৰ্গত বৃহত্তৰ চাপৰ অঞ্চলত গছ পুলি ৰোপন কৰি জীৱকুল তথা প্ৰকৃতিৰ ৰক্ষাৰ্থে আৰু বাতাবৰণ চিৰসেউজ কৰি ৰখাৰ প্ৰতি সকলোকে আকৰ্ষিত কৰিবলৈ “save Earth cycling club,chapar”নামেৰে  এটি সংগঠনে এক অভিনৱ প্ৰচেষ্টা হাতত লৈ প্ৰকৃতিপ্ৰেমী তথা সচেতন মহলৰ প্ৰশংসা বুটোলিবলৈ সক্ষম হৈছে।

যুৱ সমাজকৰ্মী তথা প্ৰকৃতিপ্ৰেমী সুৰজিত দাসৰ ঐকান্তিক প্ৰচেষ্টাত গঢ়ি উঠা” save Earth Cycling club ‘ ৰ উদ্যোগত চাপৰৰ বিভিন্ন ঠাইত ৩১ গৰাকী ব্যক্তিৰ ঘৰে ঘৰে গৈ এডাল এডাল কৈ মহানিমৰ পুলি বিতৰণ কৰা হয় ।

উক্ত ক্লাবৰ জৰিয়তে মহানিম গছ পুলি ৰোপন কৰাৰ প্ৰতিযোগিতাৰ আয়োজন কৰা হৈছে ।

এজোপা মহানিম নিম গছৰ পুলি ৰোৱক আৰু ১০০০০ টকা জিকক! শীৰ্ষক এক হৃদয় স্পৰ্শী প্ৰতিযোগিতাৰ আয়োজন কৰা হৈছে বুলি ক্লাবটোৰ সঞ্চালক সুৰজিত দাসে জানিবলৈ দিছে।

আজিলৈকে ৭০ গৰাকী প্ৰতিযোগীৰ মাজত এই গছপুলি প্ৰদান কৰা হৈছে।।মুঠ ১০০ গৰাকী প্ৰতিযোগীৰ মাজত এই গছ পুলি বিতৰণ কৰা হব বুলি সঞ্চালক সুৰজিত দাসে জানিবলৈ দিছে।

দ্বিতীয় পয্যাযৰ এই প্ৰতিযোগিতা মুঠ ১০০ গৰাকী প্ৰতিযোগীৰ মাজত আয়োজন কৰা হৈছে ।

আনহাতে এই চলিত জুন মাহৰ প্ৰথম সপ্তাহত চাপৰ চহৰৰ লগতে ইয়াৰ উপকণ্ঠ অঞ্চলত প্ৰথম পৰ্যায়ৰ কাৰ্যসূচী হাতত লৈ মুঠ ৫০(পঞ্চাছ)গৰাকী প্ৰতিযোগীৰ মাজত ৫০ ডাল মহানিম গছৰ পুলি ইতিমধ্যে বিতৰণ কৰা হৈছে।প্ৰথম পৰ্যায়ত ৫০০০(পাঁচ হাজাৰ)টকা কৃতকাৰ্যতা লাভ কৰা প্ৰতিযোগীক প্ৰদান কৰি সন্মানিত কৰা হব আৰু এই (পাঁচ হাজাৰ টকা ) পুৰস্কাৰৰ ধনৰাশি C E C নামে এক কম্পিউটাৰ শৈক্ষিক প্ৰতিষ্ঠানে আগবঢ়াইছে ।

জানিব পৰা মতে উক্ত গছ পুলি সমূহ অহা দুই বছৰৰ ভিতৰত মুঠ ছয় ফুটত কৈ দীঘল হলে প্ৰতিযোগী সকলৰ মাজত লটাৰীযোগে বাছনি কৰি পৰ্যায় অনুসাৰে এই গছ পুলি ৰোপন কৰা বিজয়ী প্ৰতিযোগীৰ মাজৰ উক্ত পুৰস্কাৰ প্ৰদান কৰা হব। প্ৰথম পৰ্যায়ত এজন আৰু দ্বিতীয় পৰ্যায়ত এজনক ক্ৰমে পাঁচ আৰু দহ হাজাৰ টকা পুৰস্কাৰ প্ৰদান কৰা হব।

চাপৰৰ ছেভ আৰ্থ চাইক্লিং ক্লাবৰ সঞ্চালক সুৰজিত দাসে জানিবলৈ দিয়া মতে দ্বিতীয় পৰ্যায়ত আয়োজিত হবলগা প্ৰতিযোগিতাৰ ১০০০০(দহ হাজাৰ )টকা কৰ্মসূত্ৰে হায়দৰাবাদত থকা এগৰাকী চাপৰৰ যুৱক ৰঞ্জন পোদ্দাৰে
প্ৰদান কৰিছে।

পোদ্দাৰৰ এই মহানুভৱতাৰ বাবে ছেভ আর্থ চাইক্লিং ক্লাবৰ সকলো সদস্যই ধন্যবাদ জ্ঞাপন কৰিছে। গছ পুলি ৰোপন প্ৰতিযোগিতাৰ এই ধাৰা আগলৈ অব্যাহত থাকিব বুলি উদোগতা সকলে প্ৰকাশ কৰিছে।

উল্লেযোগ্য যে এই গছপুলি বিতৰণ কাৰ্যসূচী ক্লাবৰ সঞ্চালক সমন্বিতে সকলো সদস্যই চাইকেলেৰে পৰিভ্ৰমণ কৰি বিতৰণ কৰে। সঞ্চালক সুৰজিত দাস আৰু ৰকি ৰিম্বল হক, উল্লিয়াছ ইছলাম, Bittu বাৰৈ , সায়েদ হুছেইন, প্ৰাণজিত কলিতা, সুৰেশ হোৰো আৰু প্ৰদীপ সাহ আদি সদস্য সকলে নিয়াৰিকৈ উক্ত অভিনৱ কাৰ্য্য সম্পাদন কৰি থকা দেখা গৈছে।