অসমকে ধৰি ১৬খন ৰাজ্যৰ বনাঞ্চলত বাস কৰি থকা জনজাতীয় লোকসকলক উচ্ছেদ কৰাৰ উচ্চতম ন্যায়ালয়ৰ নিৰ্দেশটোৰ প্ৰতিবাদত অহা ৫ মাৰ্চত ভাৰত বন্ধৰ আহ্বান কৰিছে দেশৰ বিভিন্ন জনজাতীয় আৰু বনবাসী সংগঠনবোৰে।
বিজেপি নেতৃত্বাধীন কেন্দ্ৰীয় চৰকাৰখনে শীৰ্ষতম আদালতখনত জনজাতীয় লোক আৰু বনবাসীসকলৰ অধিকাৰক সুৰক্ষা দিয়াত ব্যৰ্থ হ’ল বুলি অভিযোগ তুলিছে বন্ধৰ আহ্বান জনোৱা সংগঠনবোৰে। অনতিপলমে তেওঁলোকৰ অধিকাৰ নিশ্চিত কৰিব পাৰাকৈ এখন অধ্যাদেশ আনিবৰ বাবে আহ্বান জনাইছে সংগঠনবোৰে।
দলিত আৰু জনজাতীয় নেতা অশোক ভাৰতীয়ে সংবাদ মাধ্যমৰ আগত কয় যে যদিহে তেওঁলোকৰ দাবী কেন্দ্ৰীয় চৰকাৰখনে মানি লয়, তেতিয়া বন্ধৰ আহ্বান প্ৰত্যাহাৰ কৰিব। জনজাতীয় সংগঠনবোৰৰ আহ্বানৰ প্ৰতি সঁহাৰি জনাইছে দলিত সংগঠনবোৰেও।
“যদি শতিকাৰ পিছত শতিকা ধৰি নিজৰ ঠাইত বাস কৰি অহা জনজাতিসকলৰ পট্টা নাই, প্ৰয়োজনীয় নথি নাই, তেতিয়া হ’লে তেওঁলোক নিজৰ স্বত্বৰ পৰা বঞ্চিত নোহোৱাটো চৰকাৰ আৰু সংশ্লিষ্ট বিষয়াই নিশ্চিত কৰিব লাগিব। উচ্চতম ন্যায়ালয়ত চৰকাৰৰ ন্যায়িক বিষয়াসকলে অনুসূচিত জাতি আৰু জনজাতিসকলক প্ৰতনিধিত্ব কৰাত ব্যৰ্থ হ’ল। আনকি দলিত আৰু জনজাতি আয়োগো ব্যৰ্থ হ’ল”, ভাৰতীয়ে সংবাদ মাধ্যমৰ আগত এইদৰে কয়।
উল্লেখযোগ্য যে দেশৰ শীৰ্ষতম আদালতখনে যোৱা ১৩ ফেব্ৰুৱাৰিত বন অধিকাৰ আইন (Forest Rights Act)খনৰ অধীনত ১৬খন ৰাজ্যৰ বিভিন্ন বনাঞ্চলত বাস কৰি থকা জনজাতিসকলক আৰু বনবাসী পৰিয়ালবোৰক উচ্ছেদৰ নিৰ্দেশ দিছিল। আইনখনৰ প্ৰত্যাহ্বান জনাই দিয়া এখন আৱেদনৰ শুনানি লৈ আদালতখনে এই নিৰ্দেশটো দিয়ে। নিৰ্দেশটোৰ পিছতে হাহাকাৰ লাগে সংশ্লিষ্ট ৰাজ্যকেইখনৰ শতিকাৰ পিছত শতিকা জুৰি অৰণ্যাঞ্চলক আশ্ৰয় কৰি থকা জনজাতীয় আৰু বনবাসী লোকসকলৰ মাজত।
২০০৬ চনত কংগ্ৰেছ চৰকাৰখনৰ দিনত অনা বন অধিকাৰ আইনখনে পৰম্পৰাগতভাৱে বনাঞ্চলক আশ্ৰয় কৰি থকা জনজাতি আৰু বনবাসীসকলক তেওঁলোকৰ গাৱঁৰ সীমাৰ ভিতৰত থকা বনাঞ্চলত প্ৰৱেশ কৰা, বনাঞ্চল পৰিচালনা কৰাৰ তেওঁলোকৰ অধিকাৰ ঘূৰাই দিছিল।
উচ্চতম ন্যায়ালয়ৰ নিৰ্দেশটোৰ পিছত এই আইনখনৰ অধীনত অধিকাৰৰ সৈতে বনাঞ্চলত বাস কৰি থকা ১১ লাখৰো অধিক পৰিয়াল উচ্ছেদিত হোৱাৰ সম্ভাৱনাই দেখা দিছে।
উচ্ছেদৰ নিৰ্দেশটোৰ পিছত জনজাতীয় সংগঠন আৰু অন্যান্য সংগঠনবোৰৰ দেশজুৰি প্ৰতিক্ৰিয়া দেখি কেন্দ্ৰীয় চৰকাৰে উচ্চতম ন্যায়ালয়ত ইয়াক পুনৰ বিবেচনা কৰিবলৈ জনোৱা আৱেদনৰ শুনানি লৈ ১৩ ফেব্ৰুৱাৰিৰ নিৰ্দেশটোত স্থগনাদেশ দিয়ে।