ঝাৰখণ্ডত পুনৰ গছত ওলমি থকা অৱস্থাত উদ্ধাৰ জনজাতীয় কিশোৰীৰ মৃতদেহ: হত্যাৰ সন্দেহ
ঝাৰখণ্ডৰ দুমকা জিলাৰ এখন ভিতৰুৱা গাঁৱত বুধবাৰে গছত ওলমি থকা অৱস্থাত এগৰাকী জনজাতীয় কিশোৰীৰ মৃতদেহ উদ্ধাৰ হৈছে।
দুমকাত এই তিনি মাহৰ ভিতৰত চতুৰ্থ বাৰৰ বাবে এনে ঘটনা সংঘটিত হৈছে। ধাৰাবাহিকভাৱে সংঘটিত এনে ঘটনাই চাঞ্চল্যৰ সৃষ্টি কৰিছে জিলাখনত।
স্থানীয় গাওঁবাসীয়ে মৃতদেহটো দেখা পোৱাৰ পিছত লগে লগে আৰক্ষীক খবৰ দিয়ে আৰু দুমকা জিলাৰ আৰক্ষীৰ এটা দল ঘটনাস্থলীত উপস্থিত হয়।
আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। এইপৰ্যন্ত কিশোৰীগৰাকীৰ মৃত্যু কেনেদৰে হৈছিল সেই বিষয়ে কোনো নিশ্চিতি পোৱা নাই আৰক্ষীয়ে।
কিন্তু মৃতদেহটো ওলমি থকাৰ লক্ষণলৈ চাই আৰক্ষীয়ে এয়া হত্যা বুলি সন্দেহ কৰিছে। আৰক্ষীয়ে সংবাদ মাধ্যমৰ আগত উল্লেখ কৰা মতে উদ্ধাৰ হোৱা মৃতদেহটো কিছু পচি গৈছিল আৰু সেয়ে বহু দিন পূৰ্বেই কিশোৰীগৰাকীৰ মৃত্যু হৈছিল বুলি সন্দেহ কৰা হৈছে।
নিহত কিশোৰীগৰাকী দশম শ্ৰেণীত অধ্যয়ন কৰিছিল বুলি জানিব পৰা গৈছে। আৰক্ষীৰ ভাষ্য মতে কিশোৰীগৰাকীয়ে দুমকাৰ আম্বাজোৰাত আইতাকৰ সৈতে বাস কৰিছিল।
যোৱা ৭ অক্টোবৰত কিশোৰীগৰাকী নিৰুদ্দেশ হোৱা বুলি জানিব পৰা গৈছে। ইতিমধ্যে আৰক্ষীয়ে এই ঘটনাৰ তদন্ত আৰম্ভ কৰিছে আৰু মৃতদেহৰ মৰণোত্তৰ পৰীক্ষাৰ প্ৰতিবেদনৰ পাছত এয়া হত্যা নে আত্মহত্যা জানিব পৰা যাব বুলি উল্লেখ কৰিছে।