‘’সোণাপুৰ অঞ্চলৰ মূল সমস্যা হৈছে ইয়াৰ স্থানীয় তিৱা, বড়ো আৰু কাৰ্বি আদি জনজাতীয় লোকসকলৰ পৈত্ৰিক ভূমিৰ পৰা উৎখাত হ’বলগা হোৱাটো। বিশেষকৈ বিভিন্ন চৰকাৰী আৰু উদ্যোগিক প্ৰকল্পৰ বাবে ভূমি অধিগ্ৰহণ কৰাৰ ফলত এই জনজাতীয় লোকসকলে ভূমিৰ মালিকীস্বত্ব হেৰুৱাব লগা হৈছে।‘’-এই মন্তব্য উপমন্যু হাজৰিকাৰ।
গুৱাহাটী লোকসভা সমষ্টিৰ নিৰ্দলীয় প্ৰাৰ্থী উপমন্যু হাজৰিকাই দেওবাৰে নিৰ্বাচনী প্ৰচাৰৰ অংশ হিচাপে সোণাপুৰৰ যোগদল আৰু নিউ মাৰ্কেটত নিৰ্বাচনী সভা অনুষ্ঠিত কৰাৰ লগতে প্ৰচাৰ পত্ৰিকা বিতৰণ কৰে।
তেওঁ ভাষণ প্ৰসংগত কয় যে যেতিয়া কোনো এটা জনজাতিৰ জনসংখ্যা কম হয়, তেতিয়া পৈত্ৰিক গৃহভূমিৰ পৰা উৎখাত হ’লে জনজাতিটোৰ অস্তিত্বৰেই সংকট আহি পৰে । চৰকাৰৰ খিলঞ্জীয়া বিৰোধী নীতিৰ ফলত আজি এই পৰিস্থিতিৰ সৃষ্টি হৈছে।
বিগত ৬ বছৰ ধৰি প্ৰৱজন বিৰোধী মঞ্চই খিলঞ্জীয়াৰ অধিকাৰ ৰক্ষাৰ বাবে যি জনজাগৰণ অভিযান চলাইছিল, তাৰ আধাৰত আইন প্ৰণয়ন হ’লে এই সমস্যা সমূহ দূৰ হ’ব বুলিও হাজৰিকাই আশা ব্যক্ত কৰে।
তদুপৰি, তেওঁ উল্লেখ কৰে যে আনকি সোণাপুৰ অঞ্চলত গঢ়ি উঠা উদ্যোগসমূহতো স্থানীয় যুবক-যুবতীয়ে সংস্থাপন পোৱা নাই।
উদ্যোগৰ বাবে ভূমি অধিগ্ৰহণৰ দিনৰে পৰা স্থানীয় যুবক-যুবতীক সেই উদ্যোগৰ বাবে প্ৰয়োজনীয় কুশলী কৰ্মীৰ ৰূপত প্ৰশিক্ষণ দিয়াৰ ব্যৱস্থা কৰিলে নিয়োগৰ সমস্যাটো সমাধান কৰিব পৰা যাব বুলি হাজৰিকাই মত পোষণ কৰে ।
