বিবিচিৰ মোদী বিষয়ক তথ্যচিত্ৰ সংলগ্ন টুইট ডিলিট কৰিছে টুইটাৰে! অভিযোগ তৃণমূল সাংসদ ডেৰেক অ’ব্ৰাইনৰ

গুজৰাটৰ নৃশংস গোধৰা কাণ্ড সন্দৰ্ভত আন্ত:ৰাষ্ট্ৰীয় সংবাদ সংস্থা বিবিচি- এ প্ৰস্তুত কৰা এক তথ্যচিত্ৰত এই নৃশংস ঘটনাত বৰ্তমানৰ প্ৰধানমন্ত্ৰী তথা সেই সময়ৰ গুজৰাটৰ মুখ্যমন্ত্ৰী নৰেন্দ্ৰ মোদী প্ৰত্যক্ষভাৱে জড়িত থকা বুলি উল্লেখ কৰাৰ পিছতে এই তথ্যচিত্ৰখনক কেন্দ্ৰ কৰি ব্যাপক চৰ্চাৰ সৃষ্টি হৈছে। ইতিমধ্যে ভাৰতে নিষিদ্ধ কৰিছে এই তথ্যচিত্ৰখন।

তথ্যচিত্ৰখনৰ সৰৱ চৰ্চা চলি থকাৰ সময়তে তৃণমূল কংগ্ৰেছৰ সাংসদ ডেৰেক অ’ব্ৰাইনে উত্থাপন কৰিছে আন এক গুৰুত্বপূৰ্ণ অভিযোগ। অ’ব্ৰাইনৰ অভিযোগ মতে, বিবিচিৰ এই তথ্যচিত্ৰখনে প্ৰধানমন্ত্ৰী নৰেন্দ্ৰ মোডীৰ সংখ্যালঘুসকলৰ প্ৰতি থকা স্থিতি উন্মোচিত কৰা বুলি দাবী কৰি তেওঁ কৰা এক টুইট টুইটাৰে ডিলিট কৰি দিছে।

অ’ব্ৰাইনে উল্লেখ কৰা মতে মাইক্ৰ’ব্লগিং চাইট টুইটাৰে অ’ব্ৰাইনক এক মেইল যোগে ভাৰত চৰকাৰৰ অনুৰোধত তেওঁৰ টুইটটো ভাৰতৰ আইন উলংঘা কৰা বুলি দাবী কৰি ডিলিট কৰা হৈছে বুলি জানিবলৈ দিছে। তৃণমূল সাংসদ গৰাকীয়ে এই অভিযোগ উত্থাপন কৰি এই কাৰ্যক বিজেপি চৰকাৰৰ “চেন্সৰশ্বিপ” বুলি অভিহিত কৰে।

তৃণমূল নেতাগৰাকীয়ে এক টুইট যোগে কয়, “চেন্সৰশ্বিপ। টুইটাৰ ইণ্ডিয়াই বিবিচি তথ্যচিত্ৰ সন্দৰ্ভত মোৰ টুইটটো ডিলিট কৰিছে। এই টুইটটো লক্ষাধিক লোকে দৰ্শন কৰিছিল। ১ ঘণ্টীয়া বিবিচিৰ তথ্যচিত্ৰখনে প্ৰধানমন্ত্ৰী নৰেন্দ্ৰ মোদীয়ে সংখ্যালঘুসকলক কেনেদৰে ঘৃণা কৰে, সেয়া উন্মোচন কৰিছে।” তেওঁ লগতে টুইটটোৰ লগত টুইটাৰৰ পৰা তেওঁত দিয়া মেইলটোও সংলগ্ন কৰি দিয়ে।

CENSORSHIP@Twitter @TwitterIndia HAS TAKEN DOWN MY TWEET of the #BBCDocumentary, it received lakhs of views

The 1 hr @BBC docu exposes how PM @narendramodi HATES MINORITIES

Here’s👇the mail I recieved. Also see flimsy reason given. Oppn will continue to fight the good fight pic.twitter.com/8lfR0XPViJ

— Derek O’Brien | ডেরেক ও’ব্রায়েন (@derekobrienmp) January 21, 2023

উল্লেখ্য যে BBC-য়ে ২০০২ চনৰ গুজৰাটৰ গোধৰা হিংসাত্মক কাণ্ডৰ ওপৰত দুটা খণ্ডৰ তথ্যচিত্ৰ নিৰ্মাণ কৰিছে। এই তথ্য চিত্ৰতে ব্ৰিটিছ সংবাদ সংস্থাটোৱে গোধৰা হিংসাত্মক কাণ্ডত এতিয়াৰ প্ৰধানমন্ত্ৰী নৰেন্দ্ৰ মোদী প্ৰত্যক্ষভাৱে জড়িত আছিল বুৰি গুৰুতৰ তথা বিস্ফোৰক অভিযোগ উত্থাপন কৰিছে।

গোধৰাত সংঘৰ্ষৰ নামত ইচ্ছাকৃতভাৱে মুছলমান সম্প্ৰদায়ক লক্ষ্য কৰি লোৱা হৈছিল বুলি উল্লেখ কৰি তথ্যচিত্ৰখনত এই সংঘৰ্ষটো ৰাজনৈতিকভাৱে পৰিচালিত কৰিবলৈ চেষ্টা কৰা হৈছিল বুলিও দেখুওৱা হৈছে। কট্টৰ হিন্দুত্ববাদী সংগঠন আৰএছএছ আৰু বিশ্ব হিন্দু পৰিষদ সদ্যসকল এই সংঘৰ্ষত জড়িত থকা বুলি তথ্যচিত্ৰখনত লগতে উল্লেখ কৰা হৈছে।

আনহাতে তথ্যচিত্ৰখনে আক্ৰমণকাৰীৰ বিৰুদ্ধে মোদীৰ আৰক্ষীয়ে বিশেষ ব্যৱস্থা আৰু তৎপৰতা লোৱা নাছিল বুলি দাবী কৰি এই ক্ষেত্ৰত মুখ্যমন্ত্ৰী হিচাপে নৰেন্দ্ৰ মোদীয়ে আৰক্ষীক বাধা প্ৰদান কৰিছিল বুলি গুৰুতৰ দাবী উত্থাপন কৰিছে। এইদৰে মুখ্যমন্ত্ৰী নৰেন্দ্ৰ মোদীয়ে মৌনতাৰে আক্ৰমণকাৰীক উৎসাহিত কৰিছিল আৰু মোদীৰ মন্ত্ৰীসকলেও হিংসাক প্ৰশ্ৰয় দি জ্যেষ্ঠ আৰক্ষী বিষয়াসকলক হিংসাত্মক কাণ্ডক হস্তক্ষেপ নকৰিবলৈ নিৰ্দেশ দিছিল বুলিও দাবী কৰা হৈছে।

ইফালে গুজৰাট কাণ্ডক লৈ BBC-ৰ দুটা খণ্ডৰ তথ্য চিত্ৰখন মুকলি হোৱাৰ পাছতে প্ৰতিক্ৰিয়া প্ৰকাশ কৰিছে ভাৰত চৰকাৰে। প্ৰধানমন্ত্ৰী নৰেন্দ্ৰ মোদীক সমৰ্থন কৰি কেন্দ্ৰই কৈছে যে তথ্যচিত্ৰখন ঔপনিৱেশিক মনোবৃত্তিৰে নিৰ্মাণ কৰা হৈছে। ভাৰতৰ বৈদেশিক মন্ত্ৰণালয়ৰ মুখপাত্ৰ অৰিন্দম বাগচিয়ে সংবাদ মাধ্যমৰ আগত তথ্যচিত্ৰখনক প্ৰপাগাণ্ডা আখ্যা দি বিশেষ উদ্দেশ্যৰে নিৰ্মাণ কৰা হৈছে বুলি অভিযোগ কৰিছে।