১৬ ফেব্ৰুৱাৰীত হ’বলগীয়া ত্ৰিপুৰা বিধানসভা নিৰ্বাচনত স্ব-ইচ্ছাই প্ৰতিদ্বন্দ্বিতা নকৰে চিপিআই(এম) ৰ পলিট ব্যুৰোৰ সদস্য তথা ২০ বছৰ ধৰি ত্ৰিপুৰাৰ মুখ্যমন্ত্ৰী হৈ থকা মাণিক সৰকাৰে। ইয়াৰ লগতে স্বাস্থ্যজনিত কাৰণৰ বাবে জ্যেষ্ঠ নেতা বাদল চৌধুৰীও বিৰত থাকে নিৰ্বাচনত প্ৰতিদ্বন্দিতা কৰাৰ পৰা।
বুধবাৰে সন্ধিয়া ৰাজ্যখনৰ বাওঁ মৰ্চাৰ লগতে চি পি আই (এম)ৰ জ্যেষ্ঠ নেতাসকলে ৪৭ জন প্ৰাৰ্থীৰ তালিকা প্ৰকাশ কৰে।
উল্লেখ্য যে প্ৰথমবাৰৰ বাবে ত্ৰিপুৰা বিধানসভা নিৰ্বাচনত মিত্ৰজোঁটৰ অংশীদাৰ হ’ব কংগ্ৰেছ দল। কংগ্ৰেছৰ বাবে বাওঁ মৰ্চাই এৰি দিছে ১৩ খন আসন।
বৃ্হস্পতি বাৰে কংগ্ৰেছে প্ৰাৰ্থীৰ তালিকা ঘোষণা কৰাৰ সম্ভাৱনা আছে। ইয়াৰ পূৰ্বে চি পি আই (এম) আৰু কংগ্ৰেছৰ মাজত আসন ভাগ-বতৰাক লৈ মতানৈক্যৰ সৃষ্টি হৈছিল, যাৰ ফলত মঙলবাৰে অনুষ্ঠিত হ’বলগীয়া নিৰ্ধাৰিত সংবাদমেল বাতিল কৰিবলগীয়া হৈছিল।
জানিব পৰা মতে ত্ৰিপুৰাৰ বিধান সভাৰ নিৰ্বাচনত চি পি আই (এম)ৰ ৰাজ্যিক সম্পাদক জিতেন্দ্ৰ চৌধুৰীয়ে প্ৰতিদ্বন্দিতা কৰিব দক্ষিণ ত্ৰিপুৰাৰ সবৰুম সমষ্টিৰ পৰা।
বাওঁ মঞ্চৰ নেতাসকলে সংবাদমেল সম্বোধন কৰি কয় যে ২০১৮ চনৰ বিধানসভা নিৰ্বাচনত জয়ী হোৱা মুঠ আঠজন বিধায়কক এইবাৰৰ নিৰ্বাচনৰ বাবে মনোনীত কৰা হোৱা নাই। মাণিক সৰকাৰ, বাদল চৌধুৰী, ভানু লাল সাহা, তপন চক্ৰৱৰ্তী, নাৰায়ণ চৌধুৰী, যশবীৰ ত্ৰিপুৰা আৰু মাবাছাৰ আলীক মনোনীত কৰা হোৱা নাই এইবাৰৰ নিৰ্বাচনৰ বাবে।
খবৰ অনুসৰি বাওঁপন্থীৰ ৪৭খন আসনৰ ভিতৰত চিপিআই(এম)য়ে ৪৩খন আসনত, ৰিভল্যুচনেৰী ছ’চিয়েলিষ্ট পাৰ্টিয়ে এখনত, ভাৰতীয় কমিউনিষ্ট পাৰ্টিয়ে এখনত, ফৰৱাৰ্ড ব্লকে এখন আসনত প্ৰতিদ্বন্দিতা কৰিব।
