সতীৰ্থ মহিলা মন্ত্ৰীক আপত্তিজনকভাৱে স্পৰ্শ কৰা ত্ৰিপুৰাৰ মন্ত্ৰীৰ বিৰুদ্ধে প্ৰতিবাদ বাওঁ মৰ্চাৰ

প্ৰধান মন্ত্ৰীৰ ত্ৰিপুৰা ভ্ৰমণৰ সময়ত ঘটা এটা অপ্ৰীতিকৰ ঘটনাৰ ভিডিঅ’ ভাইৰেল হোৱাৰ পিছতে বিতৰ্কিত মন্ত্ৰীজনৰ বিৰুদ্ধে প্ৰতিবাদত উত্তাল হৈ আছে ত্ৰিপুৰা।

শনিবাৰে সংঘটিত ঘটনাটোত এগৰাকী সতীৰ্থ মহিলা মন্ত্ৰীক প্ৰধান মন্ত্ৰীয়ে অংশগ্ৰহণ কৰা জনসভাত ত্ৰিপুৰাৰ ক্ৰীড়া মন্ত্ৰী মনোজ কান্তি দেবে আপত্তিজনকভাৱে স্পৰ্শ কৰাৰ অভিযোগত মন্ত্ৰীজনৰ পদত্যাগ দাবী কৰি প্ৰতিবাদ সাব্যস্ত কৰে ত্ৰিপুৰাৰ বাওঁ মৰ্চায়।

ভাৰতীয় কমিউনিষ্ট পাৰ্টিৰ মহিলা মৰ্চা আৰু সদৌ ভাৰতীয় গণতান্ত্ৰিক মহিলা সংস্থাই সোমবাৰে আগৰতলাত প্ৰতিবাদী সমদল উলিয়াই সমাজ কল্যাণ মন্ত্ৰী সান্ত্বনা চাকমাক আপত্তিজনকভাৱে স্পৰ্শ কৰা ক্ৰীড়া মন্ত্ৰীজনৰ বিৰুদ্ধে শীঘ্ৰে শাস্তিমূলক ব্যৱস্থা গ্ৰহণ কৰাৰ বাবে দাবী জনায়।

আনহাতে, চি পি আই এমৰ ৰাজ্যিক সম্পাদক তথা বৰ্ষীয়ান নেতা বিজন ধৰে এখন সংবাদমেলত অংশগ্ৰহণ কৰি মনোজ কান্তি দেবৰ মন্ত্ৰী সভাৰ পৰা পদত্যাগ দাবী কৰি কয় যে ছচিয়েল মিডিয়াত প্ৰধান মন্ত্ৰী আৰু জনতাৰ সন্মুখত দিনদুপৰতে এগৰাকী মহিলা মন্ত্ৰীক কৰা এনে আচৰণ প্ৰকাশ পাইছে, এতিয়া তেওঁ কোনোপধ্যেই এই কাৰ্য্য ইচ্ছাকৃতভাৱে কৰা নাই বুলি ক’ব নোৱাৰে। বাওঁপন্থী নেতাজনে কমলপুৰ সংঘৰ্ষৰ লগতো মন্ত্ৰীজন জড়িত বুলি সংবাদমেলত উল্লেখ কৰি নিজে ক্ষমা বিচাৰি পদত্যাগ নকৰিলে মন্ত্ৰীজনক গ্ৰেপ্তাৰ কৰাৰ বাবে মু্খ্য মন্ত্ৰীক আহ্বান জনায়।

তদুপৰি, প্ৰধানমন্ত্ৰীৰ সন্মুখতে এনে ঘটনা সংঘটিত হ’বলৈ পালে ৰাজ্যৰ আইন-শৃখংলা পৰিস্থিতি কি পৰ্য্যায়ত আছে বুলি প্ৰশ্ন উত্থাপন কৰি ধৰে বিজেপি ক্ষমতালৈ অহাৰ পাছত ত্ৰিপুৰাত হত্যা, অপহৰণ, ধৰ্ষণ আদিৰ দৰে অপৰাধৰ সংখ্যা বৃদ্ধি হোৱা বুলিও তাৎপৰ্য্যপূৰ্ণ মন্তব্য কৰে।

ঘটনা সন্দৰ্ভত অধিক খবৰৰ বাবে পঢ়ক: https://assam.nenow.in/tripura-bjp-cries-foul-even-as-sports-ministers-indecent-video-goes-viral/