হায়দৰাবাদৰ ধৰ্ষণ তথা হত্যাৰ ঘটনাৰ পুনৰাবৃত্তি ঘটাই এইবাৰ ত্ৰিপুৰাত এগৰাকী নাবালিকাক ধৰ্ষণ কৰাৰ পাছত জ্বলাই হত্যা কৰাৰ এক ঘটনা সংঘটিত হৈছে।
ত্ৰিপুৰা আৰক্ষীয়ে শনিবাৰে নাবালিকাগৰাকীক ধৰ্ষণ কৰি তাৰ আত্মীয়ৰ সহযোগত জ্বলাই হত্যা কৰাৰ অভিযোগত অভিযুক্তজনক গ্ৰেপ্তাৰ কৰিছে।
ইয়াৰ পূৰ্বে ঘটনাৰ বলি ছোৱালীজনীয়ে শেষ নিশ্বাস ত্যাগ কৰা আগৰতলাৰ জি বি পি হাস্পাতলৰ সন্মুখতে উন্মত্ত জনতাই অভিযুক্তক প্ৰহাৰ কৰে।
আৰক্ষীয়ে কয় যে মূল অভিযুক্ত অজয় ৰুদ্ৰপালে দুমাহ পূৰ্বে ছোৱালীজনীক বিয়া কৰোৱাৰ প্ৰতিশ্ৰুতি দি দক্ষিণ ত্ৰিপুৰাৰ শান্তিৰ বজাৰ অঞ্চলত থকা তাৰ ঘৰলৈ তাইক লৈ গৈছিল।
বাতৰি অনুসৰি, ঘটনাৰ বলি ছোৱালীজনীৰ পৰিয়ালে অভিযোগ কৰে যে অজয় আৰু তাৰ পৰিয়ালৰ লোকে ছোৱালীজনীক বিগত দুমাহ ধৰি নিৰ্যাতন চলায় আৰু তেওঁলোকে শুকুৰবাৰে সন্ধিয়া তাইক জ্বলাই দিয়ে।
অজয়ো তাইক যোৱা দুমাহ ধৰি ধৰ্ষণ কৰাৰ অভিযোগত অভিযুক্ত হৈছে।
জি বি পি হাস্পাতলৰ চিকিৎসকে কয় যে ছোৱালীজনীক ৯০ শতাংশ পুৰি যোৱা অৱস্থাত ভৰ্তি কৰোৱা হৈছিল।
শনিবাৰে মাজ নিশা ছোৱালীজনীয়ে শেষ নিশ্বাস ত্যাগ কৰে।
