চলিত ৰঞ্জী চিজনত দুৰ্বল প্ৰদৰ্শন অব্যাহত ৰখা অসমৰ বিৰুদ্ধে এলিট গ্ৰুপ ‘চি’ৰ এখন খেলত ৰানৰ পাহাৰ গঢ়িছে ত্ৰিপুৰাই।
বৰ্ষাপাৰা ক্ৰিকেট ষ্টেডিয়ামত অনুষ্ঠিত খেলখনত অসমে টছত জয়ী হৈ প্রথমে ত্ৰিপুৰাক বেটিং কৰিবলৈ আমন্ত্ৰণ জনাই আৰু ত্ৰিপুৰাই অসমৰ বলাৰৰ বিৰুদ্ধে সাবলীলভাৱে খেলি প্ৰথম ইনিংছত বিশাল ৪৯৭ ৰান সংগ্ৰহ কৰে।
ত্ৰিপুৰাৰ হৈ মণিশংকৰ মুৰাসিঙে দৰ্শনীয় বেটিঙেৰে সৰ্বাধিক ১১৮ ৰান কৰাৰ লগতে অৰ্কপ্ৰভা সিনহা (৯০), প্ৰত্যুশ সিঙে (৬৩), মিলিন্দ কুমাৰে (৫৩) আৰু সুভম ঘোষ আৰু হৰমীট সিঙে ক্ৰমে ৪৮ ৰান আৰু ৪১ ৰানৰ বৰঙনি যোগায়।
অসমৰ হৈ বলিঙত ৰঞ্জিত মালীয়ে ৫ টা, মৃণ্ময় দত্তই ২ টা আৰু ৰিয়ান পৰাগ আৰু গকুল শৰ্মাই এটাকৈ উইকেট দখল কৰে।
ত্ৰিপুৰাৰ বিশাল ৪৯৭ ৰানৰ প্ৰত্যুত্তৰত অসমে নিজৰ প্রথম ইনিংছ আৰম্ভ কৰি দ্বিতীয় দিনৰ খেলৰ অন্তত এটা উইকেট হেৰুৱাই ১৬২ ৰান সংগ্ৰহ কৰে।
অসমৰ হৈ ক্ৰিজত ঋষভ দাসে ৮৮ ৰান আৰু অধিনায়ক গকুল শৰ্মাই ৩৯ ৰান কৰি বেট ধৰি আছে।
সুভম মণ্ডলে ৩৩ ৰান কৰি ত্ৰিপুৰাৰ হৰমীট সিঙৰ বলত পেভিলিয়ন মুখী হয়।
উল্লেখযোগ্য যে, চলিত ৰঞ্জি চিজনত চুড়ান্ত দুৰ্বল প্ৰদৰ্শন দাঙি ধৰা অসমে ত্ৰিপুৰাৰ বিৰুদ্ধে পইণ্ট সংগ্ৰহ কৰিবলৈ হ’লে প্ৰথম ইনিংছত ত্ৰিপুৰাতকৈ অধিক পইণ্ট সংগ্ৰহ কৰিব লাগিব অথবা ত্ৰিপুৰাক পৰাস্ত কৰিব লাগিব।
