মহানগৰবাসীৰ বাবে এক ভয়ংকৰ খবৰ। ত্ৰিপুৰাৰ প্ৰথমগৰাকী ক’ভিড-১৯ আক্ৰান্ত গীতাৰাণী কৰ্মকাৰ নামৰ ৩৫ বছৰীয়া মহিলা গৰাকী দুদিন ধৰি আছিল গুৱাহাটীত।
গুৱাহাটীৰ পল্টনবজাৰস্থিত হোটেল সুখমণিত ৩০৪ আৰু ৩০৭নং কোঠাত ভাড়া কৰি আছিল গীতাৰাণীৰ পৰিয়াল।
যোৱা ১৬ আৰু ১৭ মাৰ্চত হোটেলখনত থাকি গুৱাহাটীৰ বিভিন্ন স্থান ভ্ৰমণ কৰিছিল মহিলাগৰাকীয়ে।
পল্টনবজাৰৰ বিশাল মেগা মাৰ্টত ১৭ মাৰ্চৰ সন্ধিয়া প্ৰায় ৫ বজাৰ পৰা একঘণ্টা সময় বজাৰ কৰিছিল মহিলা গৰাকীৰ লগতে পৰিয়ালৰ লোকে।
আনকি বালাজি মন্দিৰ আৰু কামাখ্যা মন্দিৰলৈও গৈছিল কৰ’নাত আক্ৰান্ত মহিলাগৰাকী।
হোটেল সুখমণিত উক্ত দুদিন ৰিচিপচনিষ্টসহ মুঠ ১৬ গৰাকী কৰ্মচাৰী কৰ্মৰত আছিল।
তাৰে তিনিগৰাকী যুৱতী ইতিমধ্যে নিজ বাসগৃহলৈ উভতি যোৱা বুলি খবৰ পোৱা গৈছে।
মহিলাগৰাকী কৰ’নাত আক্ৰান্ত হোৱাৰ খবৰ লাভ কৰাত বাকী ১৩ গৰাকী কৰ্মচাৰীক হোটেলখনতে কুৱাৰেণ্টাইন কৰি ৰখা হৈছে।
আজি স্বাস্থ্য বিভাগৰ পৰা দুগৰাকী স্বাস্থ্য কৰ্মী আহি ১৩ গৰাকীৰ নমুনা সংগ্ৰহ কৰেহি।
মহিলাগৰাকী কাৰ কাৰ সংস্পৰ্শলৈ আহিছিল বৰ্তমান সময়ত কামৰূপ মহানগৰ জিলা প্ৰশাসনে তদন্ত আৰম্ভ কৰিছে।
ইয়াৰোপৰি, বিশাল মেগামাৰ্টত উক্ত সন্ধিয়া যি যি বজাৰ কৰিছিল সকলোকে ঘৰতে কুৱাৰেণ্টাইন হ’বলৈ আহ্বান জনাইছে কামৰূপ মহানগৰ জিলা প্ৰশাসনে।
উল্লেখযোগ্য যে, ৰাজস্থানৰ পৰা গুৱাহাটীত থাকি গীতাৰাণীৰ পৰিয়াল ত্ৰিপুৰালৈ গৈছিল।
