বিশ্বৰ দুই মহাশক্তি চীন আৰু আমেৰিকাৰ মাজত তুংগত উঠিছে বাণিজ্যৰ প্ৰতিযোগিতা।
শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পে চীনা সামগ্ৰীৰ ওপৰত অতিৰিক্ত শুল্ক আৰোপ কৰিছে। ইয়াৰ পিছতেই চীনৰ ৰাষ্ট্ৰপতি জিং পিঙেও আমেৰিকাৰ সামগ্ৰীৰ ওপৰত শুল্ক আৰোপ কৰিছে।
আমেৰিকাৰ কোম্পানীসমূহৰ বিৰুদ্ধে উত্থাপন হোৱা নীতি উলংঘাৰ তদন্তও কৰিবলৈ ওলাইছে চীনে। বিশ্বৰ দুখন বৃহত্তম অৰ্থনীতিৰ শুল্ক যুদ্ধ আৰম্ভ হোৱাৰ লগে লগে তোলপাৰ লাগিছে সমগ্ৰ বিশ্বত।
আমেৰিকাৰ ৰাষ্ট্ৰপতি ড’নাল্ড ট্ৰাম্পে দ্বিতীয়বাৰৰ বাবে কাৰ্যভাৰ গ্ৰহণ কৰাৰ পিছত বিশ্বব্যাপী শুল্ক আৰোপৰ কথা সকীয়াই দিছে। যোৱা শনিবাৰে তেওঁ কানাডা, মেক্সিকো আৰু চীনৰ সামগ্ৰীৰ ওপৰত শুল্ক ঘোষণা কৰিছে।
খবৰ অনুসৰি ট্ৰাম্প প্ৰশাসনে চীনৰ পৰা আমদানি কৰা সামগ্ৰীৰ ওপৰত ১০ শতাংশ শুল্ক আৰোপ কৰিছে। ট্ৰাম্পে নিজৰ ছ’চিয়েল মিডিয়া প্লেটফৰ্ম ট্ৰুথত লিখিছে, “এই কৰ আন্তঃৰাষ্ট্ৰীয় জৰুৰীকালীন অৰ্থনৈতিক ক্ষমতা আইনখনৰ জৰিয়তে আৰোপ কৰা হৈছে। কাৰণ অবৈধ অনুপ্ৰৱেশকাৰী আৰু বিষাক্ত ড্ৰাগছৰ ফলত আমেৰিকাৰ নাগৰিকৰ মৃত্যু হৈছে।”
অৱশ্যে সোমবাৰে তেওঁ কয় যে কানাডা আৰু মেক্সিকোৰ ওপৰত শুল্ক আৰোপ কৰাৰ সিদ্ধান্ত এমাহৰ বাবে স্থগিত ৰখা হৈছে। কানাডাৰ প্ৰধানমন্ত্ৰী জাষ্টিন ট্ৰুডো আৰু মেক্সিক’ৰ ৰাষ্ট্ৰপতি ক্লাউডিয়া শ্বেইনবামৰ সৈতে আলোচনাৰ অন্তত ট্ৰাম্প প্ৰশাসনে এই সিদ্ধান্ত গ্ৰহণ কৰে।
কিন্তু চীনৰ ওপৰত আৰপ কৰা শুল্ক এতিয়াও আছে। ইফালে এই শুল্ক আৰোপ কৰাক লৈ চীনে ৰাজহুৱাভাৱে আমেৰিকাক গৰিহণা দিছে। চীনেও আমেৰিকাৰ সামগ্ৰীৰ ওপৰত ১৫ শতাংশ শুল্ক আৰোপ কৰাৰ কথা ঘোষণা কৰিছে। কয়লা আৰু তৰলীকৃত প্ৰাকৃতিক গেছৰ ওপৰত ১৫ শতাংশ কৰ আৰোপ কৰা হৈছে। তেল আৰু কৃষি সঁজুলিৰ ওপৰত ১০ শতাংশ শুল্ক আৰোপ কৰা হৈছে। চীনৰ বাণিজ্য মন্ত্ৰালয়ে এক বিবৃতি প্ৰকাশ কৰি কয় যে আমেৰিকাই একপক্ষীয়ভাৱে শুল্ক বৃদ্ধি কৰিছে, যিটোৱে বিশ্ব বাণিজ্য সংস্থাৰ নিয়ম উলংঘা কৰিছে।
