ইউৰোপীয় ইউনিয়নৰ ওপৰতো শুল্ক ঘোষণা কৰাৰ ভাবুকি দিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। অৱশ্যে কেতিয়া এই কৰ আৰোপ কৰা হ’ব সেই কথা তেওঁ কোৱা নাই যদিও “অতি সোনকালে” হ’ব বুলিও তেওঁ কয়।
সংবাদ মাধ্যমৰ বাতৰি অনুসৰি, দেওবাৰে স্থানীয় সময় অনুসৰি সাংবাদিকৰ সৈতে হোৱা বাৰ্তালাপত ট্ৰাম্পে কয় যে ইউৰোপীয় ইউনিয়নৰ পৰা আমদানি কৰা সামগ্ৰীৰ ওপৰতো আমেৰিকাৰ শুল্ক অতি সোনকালে কাৰ্যকৰী হ’ব।
ট্ৰাম্পে কয়, ‘কাৰণ তেওঁলোকে (ইউৰোপীয় ইুনিয়নে) সঁচাকৈয়ে আমাৰ সুবিধা লৈছে। আমাৰ ঘাটি ৩০০ বিলিয়ন ডলাৰতকৈও অধিক। তেওঁলোকে আমাৰ গাড়ী নলয়, আমাৰ কৃষিজাত সামগ্ৰীও নলয়। প্ৰায় একোৱেই নলয়। কিন্তু আমি তেওঁলোকৰ পৰা সকলো লওঁ – লাখ লাখ গাড়ী, বিপুল পৰিমাণৰ খাদ্য আৰু কৃষিজাত সামগ্ৰী।”
তেওঁ লগতে কয় যে মই সময়সীমা ক’ব নোৱাৰো, কিন্তু ই (শুল্ক) অতি সোনকালে হ’বলৈ গৈ আছে।’
ইতিমধ্যে ট্ৰাম্পে আমেৰিকাৰ সৰ্ববৃহৎ বাণিজ্যিক অংশীদাৰ কানাডা, মেক্সিকো আৰু চীনৰ ওপৰত শুল্ক আৰোপ কৰিছে। স্থানীয় সময় অনুসৰি শনিবাৰে ট্ৰাম্পে ঘোষণা কৰে যে কানাডা আৰু মেক্সিকোৰ সামগ্ৰীৰ ওপৰত ২৫ শতাংশ শুল্ক আৰু চীনৰ পৰা অহা সামগ্ৰীৰ ওপৰত অতিৰিক্ত ১০ শতাংশ শুল্ক ৪ ফেব্ৰুৱাৰীৰ পৰা কাৰ্যকৰী হ’ব। আৰু এইবাৰ তেওঁ ইউৰোপকলৈও একেই বাৰ্তা দিলে।
ইফালে ইউৰোপীয় ইউনিয়নে ট্ৰাম্পৰ এই ভাবুকিৰ তীব্ৰ প্ৰতিক্ৰিয়া প্ৰকাশ কৰিছে। তিনিওখন দেশৰ ওপৰত শুল্ক আৰোপ কৰাৰ সিদ্ধান্তক সমালোচনা কৰি ইউৰোপীয় ইউনিয়নৰ এগৰাকী মুখপাত্ৰই কয় যে ‘’কানাডা, মেক্সিকো আৰু চীনৰ ওপৰত শুল্ক আৰোপ কৰাৰ আমেৰিকাৰ সিদ্ধান্ত দুৰ্ভাগ্যজনক। যিকোনো শুল্কই অপ্ৰয়োজনীয়ভাৱে অৰ্থনৈতিক অগ্ৰগতিত বাধাৰ সৃষ্টি কৰে। ইয়াৰ ফলত মুদ্ৰাস্ফীতিৰ সৃষ্টি হয়। ইউৰোপীয় সামগ্ৰীৰ ওপৰত অপ্ৰয়োজনীয় শুল্ক আৰোপ কৰিলে আমিও কঠোৰ ব্যৱস্থা গ্ৰহণ কৰিম। আমি এতিয়ালৈকে কোনো অতিৰিক্ত শুল্কৰ কথা শুনা নাই।’’
সংবাদ মাধ্যমৰ বাতৰি অনুসৰি সোমবাৰে ইউৰোপীয় ইুনিয়নৰ নেতাসকলে বৈঠকত মিলিত হ’ব আৰু ট্ৰাম্পৰ নতুন শুল্ক নীতিৰ বিষয়ে আলোচনা কৰিব।
