আমেৰিকাৰ ৰাষ্ট্ৰপতি ড’নাল্ড ট্ৰাম্পে আগন্তুক ১৫ আগষ্টত আলাস্কাত ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে এক বৈঠকত মিলিত হ’ব। শুকুৰবাৰে ট্ৰাম্পে তেওঁৰ ছ’চিয়েল মিডিয়া প্লেটফৰ্ম ট্ৰুথ ছ’চিয়েলত এই ঘোষণা কৰে। ক্ৰেমলিনৰ মুখপাত্ৰ ইউৰী উশাক’ভে এই বৈঠকৰ বিষয়ে নিশ্চিত কৰি কয় যে, আলাস্কাৰ অৱস্থান “যথেষ্ট যুক্তিসংগত”। এই বৈঠকৰ মূল বিষয় হ’ব ২০২২ চনৰ ফেব্ৰুৱাৰীত আৰম্ভ হোৱা ৰাছিয়া-ইউক্ৰেইন যুদ্ধৰ দীৰ্ঘম্যাদী শান্তিৰ সমাধান। এই বৈঠকে কোনো শান্তি চুক্তিত উপনিত কৰাব নে এই বিশ্ব ৰাজনীতিত সৰৱ আলোচনা চলিছে।
ট্ৰাম্পে ছ’চিয়েল মিডিয়াত লিখিছে, যে “আমেৰিকাৰ ৰাষ্ট্ৰপতি হিচাপে মোৰ আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ মাজত অতি প্ৰত্যাশিত বৈঠকখন আগন্তুক শুকুৰবাৰ, ১৫ আগষ্টত আলাস্কাৰ অনুষ্ঠিত হ’ব। অধিক তথ্য পিছত জানোৱা হ’ব।” ক্ৰেমলিনৰ মতে, এই বৈঠকত “ইউক্ৰেইন সংকটৰ দীৰ্ঘম্যাদী শান্তিপূৰ্ণ সমাধানৰ বিকল্পসমূহ” আলোচনা কৰা হ’ব।
উল্লেখনীয় যে ট্ৰাম্পে এই বৈঠকৰ ঘোষণাৰ পূৰ্বে ইউক্ৰেইনৰ সৈতে শান্তি চুক্তিৰ বাবে “ভূখণ্ডৰ কিছু বিনিময়”ৰ প্ৰয়োজন হ’ব পাৰে বুলি ইংগিত দিছিল। তেওঁ কয়, “এইটো জটিল, কিন্তু আমি কিছু ভূখণ্ড ঘূৰাই পাম আৰু কিছু বিনিময় হ’ব।” কিন্তু ইউক্ৰেইনৰ ৰাষ্ট্ৰপতি ভল’ডিমিৰ জেলেনস্কিয়ে এই ধাৰণাক স্পষ্টভাৱে নাকচ কৰিছে। শনিবাৰে তেওঁ টেলিগ্ৰামত এক ভিডিঅ’ বাৰ্তাত কয়, “ইউক্ৰেইনৰ সংবিধানত ভূখণ্ডৰ প্ৰশ্নৰ উত্তৰ স্পষ্ট। আমি আমাৰ ভূমি আক্ৰমণকাৰীক দিব নোৱাৰোঁ। ইউক্ৰেইনক বাদ দি কৰা যিকোনো সিদ্ধান্ত শান্তিৰ পক্ষত হ’ব।”
ৰাছিয়াই ইউক্ৰেইনৰ চাৰিটা অঞ্চল—লুহানস্ক, ড’নেটস্ক, খেৰছন, আৰু জাপৰিজিয়া—আৰু ২০১৪ত অধিকাৰ কৰা ক্ৰিমিয়াৰ ওপৰত দাবী কৰিছে। অৱশ্যে এই অঞ্চলসমূহৰ সম্পূৰ্ণ নিয়ন্ত্ৰণ তেওঁলোকৰ হাতত নাই। ৰাছিয়াৰ প্ৰস্তাৱত ইউক্ৰেইনক নিৰপেক্ষ ৰাষ্ট্ৰ হিচাপে গঢ়ি তোলা, ন্যাট’ত যোগদানৰ আকাংক্ষা ত্যাগ কৰা, আৰু ৰাছিয়াৰ ওপৰত থকা পশ্চিমীয়া নিষেধাজ্ঞা উঠাই লোৱাৰ দৰে চৰ্ত অন্তৰ্ভুক্ত কৰিছে। কিয়েভ আৰু তাৰ মিত্ৰশক্তিসকলে এই দাবীক ইউক্ৰেইনৰ আত্মসমৰ্পণৰ সমতুল্য বুলি গণ্য কৰিছে।
এই বৈঠকত ইউক্ৰেইনৰ ৰাষ্ট্ৰপতি জেলেনস্কিৰ অংশগ্ৰহণ নিশ্চিত হোৱা নাই, যিটোৱে আলোচনাৰ ফলাফলৰ ওপৰত প্ৰশ্নৰ সৃষ্টি কৰিছে।
আনহাতে ক্ষমতালৈ ঘূৰি অহাৰ পৰা ট্ৰাম্পে ৰাছিয়া-ইউক্ৰেইন যুদ্ধ বন্ধ কৰাৰ প্ৰতিশ্ৰুতি দি আহিছে। তেওঁ দাবী কৰিছিল যে তেওঁ প্ৰথম ২৪ ঘণ্টাৰ ভিতৰতে এই যুদ্ধৰ অন্ত পেলাব পাৰে। কিন্তু তেওঁৰ প্ৰচেষ্টাৰ ফলত এতিয়ালৈকে কোনো বিশেষ সফলতা লাভ কৰা নাই। পূৰ্বৰ তুৰস্কত তিনিবাৰ প্ৰত্যক্ষ শান্তি আলোচনাত ব্যৰ্থ হৈছে। ট্ৰাম্পে পুটিনৰ সৈতে সম্পৰ্কৰ কথা উল্লেখ কৰি শান্তিৰ সম্ভাৱনাৰ কথা কৈছে, কিন্তু শেহতীয়াকৈ তেওঁ পুটিনৰ প্ৰতি হতাশা প্ৰকাশ কৰিছে। তেওঁ ৰাছিয়াৰ বিৰুদ্ধে অৰ্থনৈতিক নিষেধাজ্ঞাৰ ভাবুকি দিছিল, বিশেষকৈ ৰাছিয়াৰ তেল ক্ৰয় কৰা দেশসমূহৰ বিৰুদ্ধে, য’ত ভাৰতৰ বিৰুদ্ধে ২৫% শুল্কৰ নিৰ্দেশ জাৰি কৰিছিল।
ট্ৰাম্পৰ বিশেষ দূত ষ্টিভ উইটকফে ৬ আগষ্টত মস্কোত পুটিনৰ সৈতে সাক্ষাৎ কৰিছিল, আৰু ট্ৰাম্পে তাৰ পিছত শান্তি আলোচনাত “উল্লেখযোগ্য প্ৰগতি”ৰ কথা দাবী কৰিছিল। বিশ্লেষকসকলে কয় যে পুটিনে আলোচনা টানি নিছে, যাৰ ফলত যুদ্ধ দীঘলীয়া হৈছে।
ইফালে, শুকুৰবাৰে ভাৰতৰ প্ৰধানমন্ত্ৰী নৰেন্দ্ৰ মোদীয়ে পুটিনৰ সৈতে ফোনালাপত ৰাছিয়া-ইউক্ৰেইন যুদ্ধৰ শেহতীয়া পৰিস্থিতিৰ বিষয়ে আলোচনা কৰে। মোদীয়ে পুটিনক চলিত বৰ্ষৰ শেষৰ ফালে ভাৰত ভ্ৰমণৰ বাবে আমন্ত্ৰণ জনায়।
