ৰাষ্ট্ৰপতি ড’নাল্ড ট্ৰাম্পে বুধবাৰে এখন বিধেয়কত স্বাক্ষৰ কৰি আমেৰিকাৰ ইতিহাসৰ আটাইতকৈ দীঘলীয়া অচলাৱস্থাৰ (শ্বাটডাউন) অন্ত পেলাবলৈ সক্ষম হয়। ইয়াৰ কেইঘণ্টামান পূৰ্বে কংগ্ৰেছৰ সদস্যসকলে খাদ্য সাহায্য পুনৰুদ্ধাৰ, লাখ লাখ চৰকাৰী কৰ্মচাৰীক মজুৰি ঘূৰাই দিয়া আৰু বিমান পৰিবহণ নিয়ন্ত্ৰণ পুনৰুদ্ধাৰৰ সপক্ষে ভোটদান কৰিছিল।
ৰিপাব্লিকান দলৰ নিয়ন্ত্ৰিত হাউছ অৱ ৰিপ্ৰেজেণ্টেটিভছত ২২২-২০৯ ভোটত এই বিধেয়কখন গৃহীত হয়। ট্ৰাম্পৰ সমৰ্থনে তেওঁৰ দলটোক একত্ৰিত কৰি ৰাখিছে। অৱশ্যে কংগ্ৰেছৰ ডেম’ক্ৰেটসকলে এই বিধেয়কখনৰ তীব্ৰ বিৰোধিতা কৰিছে। তেওঁলোক ক্ষুব্ধ কাৰণ চেনেটত দীৰ্ঘদিনীয়া অচলাৱস্থাৰ মাজতো ফেডাৰেল স্বাস্থ্য বীমাৰ ৰাজসাহায্য বৃদ্ধিৰ কোনো চুক্তিত উপনীত হোৱা নাই।
সপ্তাহটোৰ আৰম্ভণিতে ছিনেটত গৃহীত হোৱা এই বিধেয়কখনত ট্ৰাম্পে স্বাক্ষৰ কৰাৰ ফলত বৃহস্পতিবাৰৰ পৰা চৰকাৰী কৰ্মচাৰীসকলে কামলৈ ঘূৰি আহিব পাৰিব। বন্ধৰ বাবে তেওঁলোকক ৪৩ দিনৰ বাধ্যতামূলক ছুটীত প্ৰেৰণ কৰা হৈছিল। কিন্তু ট্ৰাম্পে এই আইনত স্বাক্ষৰ কৰাৰ পাছতো চৰকাৰী সেৱা আৰু কাৰ্যকলাপ কেতিয়া সম্পূৰ্ণ স্বাভাৱিক হ’ব সেয়া এতিয়াও স্পষ্ট হোৱা নাই।
বুধবাৰে নিশা হোৱাইট হাউছত এই আইনখনত স্বাক্ষৰ কৰাৰ সময়ত ট্ৰাম্পে কয় যে, “এয়া আৰু কেতিয়াও হ’বলৈ দিব নোৱাৰি। কোনো দেশক এনেদৰে চলাব নোৱাৰি।”
দুয়োপক্ষৰ মাজত হোৱা চুক্তিৰ ফলত চৰকাৰী পুঁজি ৩০ জানুৱাৰীলৈকে বৃদ্ধি কৰা হৈছে। ফলস্বৰূপে আমেৰিকাৰ মুঠ ৩৮ ট্ৰিলিয়ন ডলাৰ (৩৮ কোটি ডলাৰ) ঋণৰ সৈতে প্ৰায় ১.৮ বিলিয়ন ডলাৰ ঋণ যোগ হ’ব।
এৰিজোনাৰ ৰিপাব্লিকান কংগ্ৰেছী ডেভিদ শ্বৱাইকাৰ্টে ধেমালিৰ সুৰত কয়, “মই অনুভৱ কৰিছিলো যে মই ছেইনফেল্ডৰ এটা খণ্ডত আছো। আমি ৪০ দিন পাৰ কৰিলো। অথচ মই এতিয়াও বুজি পোৱা নাই যে কাহিনীটো কি আছিল।”
শ্বৱাইকাৰ্টে লগতে কয়, “মই ভাবিছিলো যে ৪৮ ঘণ্টাৰ ভিতৰত শেষ হ’ব। সকলোৱে নিজৰ খং জাৰিব আৰু তাৰ পিছত পুনৰ কামলৈ আহিব। কিন্তু এতিয়া এনে লাগে যে খং নীতিত পৰিণত হৈছে!”
অচলাৱস্থাৰ অন্ত পৰাৰ ফলত বিশেষকৈ বিমান উদ্যোগত আশাৰ পোহৰ দেখা গৈছে। দুসপ্তাহৰ পিছত আৰম্ভ হ’ব থেংকচগিভিঙৰ ছুটী আৰু ভ্ৰমণৰ বতৰ।
খাদ্য সাহায্য পুনৰ আৰম্ভ কৰিলে লাখ লাখ পৰিয়ালক কিছু আৰ্থিক সকাহ পাব। ইয়াৰ দ্বাৰা ছুটীৰ বজাৰ কৰাৰ সময়ত গ্ৰাহকৰ খৰচ বৃদ্ধি কৰাত সহায়ক হ’ব।
বন্ধৰ ফলত চৰকাৰী গুৰুত্বপূৰ্ণ অৰ্থনৈতিক তথ্য (যেনে নিয়োগ, মুদ্ৰাস্ফীতি আৰু গ্ৰাহকৰ ব্যয়ৰ তথ্য) প্ৰকাশ বন্ধ হৈ আছিল। ফলত বিনিয়োগকাৰী, নীতি নিৰ্ধাৰক আৰু সাধাৰণ জনতাই অৰ্থনীতিৰ প্ৰকৃত অৱস্থাৰ প্ৰতি অনিশ্চিত হৈ পৰিছিল।
হোৱাইট হাউছে কয় যে অক্টোবৰৰ নিয়োগ আৰু গ্ৰাহক মূল্য সূচকাংক (চিপিআই)ৰ প্ৰতিবেদন হয়তো আৰু কেতিয়াও প্ৰকাশ নহ’ব। অৰ্থাৎ কিছুমান তথ্য স্থায়ীভাৱে হেৰাই গৈছে।
অৰ্থনীতিবিদসকলৰ মতে, ছয় সপ্তাহৰ বন্ধৰ ফলত আমেৰিকাৰ মুঠ ঘৰুৱা উৎপাদন (জিডিপি) প্ৰতি সপ্তাহত প্ৰায় ০.১ শতাংশ হ্ৰাস পাইছে। কিন্তু অনাগত মাহত এই লোকচান আদায় হোৱাৰ সম্ভাৱনা আছে।
ডেম’ক্ৰেটসকলে কেইবাটাও বৃহৎ নিৰ্বাচনত জয়লাভ কৰাৰ মাত্ৰ আঠ দিনৰ পিছতে এই ভোটদান কৰা হৈছে, যিয়ে তেওঁলোকক বছৰৰ শেষত ম্যাদ উকলি যোৱা ফেডাৰেল স্বাস্থ্য বীমাৰ ৰাজসাহায্য বৃদ্ধি কৰাৰ সুযোগ দিব বুলি তেওঁলোকে ভাবিছিল।
ডিচেম্বৰ মাহত ছিনেটত এই চুক্তিৰ ওপৰত ভোটদানৰ কথা। কিন্তু সদনৰ অধ্যক্ষ মাইক জনছনে তেনে কোনো প্ৰতিশ্ৰুতি দিয়া নাই।
নিউ জাৰ্ছিৰ ডেম’ক্ৰেট তথা নিউ জাৰ্ছিৰ নৱনিৰ্বাচিত গৱৰ্ণৰ প্ৰতিনিধি মিকি শ্বেৰিলে কংগ্ৰেছৰ পৰা পদত্যাগ কৰাৰ পূৰ্বে সদনত দিয়া চূড়ান্ত ভাষণত এই বিধেয়কখনৰ বিৰোধিতা কৰিছিল।
শ্বেৰিলে কয়, ‘মই মোৰ সহকৰ্মীসকলক ক’ম যে কংগ্ৰেছক শিশুৰ মুখৰ পৰা খাদ্য কাঢ়ি নিয়া আৰু স্বাস্থ্যসেৱা কৰ্তন কৰা প্ৰশাসনৰ বাবে কেৱল আনুষ্ঠানিক ছীলমোহৰ হ’বলৈ নিদিব। মই এই দেশৰ জনসাধাৰণক দৃঢ়তাৰে থিয় দিবলৈ ক’ম।”
