সোমবাৰৰ পৰা আমেৰিকাই সকলো তীখা আৰু এলুমিনিয়াম আমদানিৰ ওপৰত ২৫ শতাংশ শুল্ক আৰোপ কৰিব। দেওবাৰে এই কথা ঘোষণা কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে। তেওঁ কয় যে কানাডা আৰু মেক্সিকোৰ পৰা আমদানি কৰা তীখা আৰু এলুমিনিয়ামৰ ওপৰতো এই শুল্ক আৰোপ কৰা হ’ব।
ইয়াৰ পূৰ্বে তেওঁ এই দুয়োখন দেশৰ সামগ্ৰীৰ ওপৰত শুল্ক আৰোপ কৰাৰ সিদ্ধান্ত সাময়িকভাৱে স্থগিত ৰাখিছিল। ইয়াৰ লগতে ট্ৰাম্পে লগতে কয় যে আমেৰিকাই আৰু বহু ক্ষেত্ৰত অতিৰিক্ত আমদানি শুল্ক আৰোপ কৰিব, যিটো সপ্তাহৰ শেষৰ ফালে ঘোষণা কৰা হ’ব।
ইপিনে, ভাৰতৰ প্ৰধানমন্ত্ৰী নৰেন্দ্ৰ মোডীয়ে চলিত সপ্তাহৰ ১২ ফেব্ৰুৱাৰীত আমেৰিকা ভ্ৰমণ কৰাৰ কথা। তাত তেওঁ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ সৈতে সাক্ষাৎ কৰিব। কিন্তু তাৰ পূৰ্বে ৭ ফেব্ৰুৱাৰীত ট্ৰাম্পে ঘোষণা কৰিছিল যে তেওঁ ‘পাৰস্পৰিক শুল্ক’ (reciprocal tariff) আৰোপ কৰিব। তেওঁৰ এই ঘোষণাক কেন্দ্ৰ কৰি জল্পনা-কল্পনাৰ সৃষ্টি হৈছিল।
আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মতে, এই পদক্ষেপে ‘সকলোকে প্ৰভাৱিত কৰিব’। মন কৰিবলগীয়া যে যোৱা কিছুদিনত ট্ৰাম্পে ভাৰতৰ প্ৰতি অসন্তুষ্টি প্ৰকাশ কৰি আহিছে। ইফালে শেহতীয়া বাজেটত ভাৰতে আমেৰিকাৰ বাইক হাৰ্লি-ডেভিডছনৰ শুল্ক হ্ৰাস কৰাৰ কথা ঘোষণা কৰিছিল। তাৰপিছতে মোডীয়ে ট্ৰাম্পক সাক্ষাৎ কৰাৰ কথা। এই প্ৰসংগত ট্ৰাম্পে ইংগিত দিছিল যে এই পাৰস্পৰিক শুল্কৰ গুৰুত্ব বাহনৰ ওপৰত অধিক হ’ব পাৰে।
উল্লেখ্য যে ড’নাল্ড ট্ৰাম্পে বাৰে বাৰে ভাৰতৰ শুল্ক নীতি সন্দৰ্ভত মাত মাতি আহিছে। শেহতীয়াকৈ চিবিএছৰ সৈতে হোৱা এক সাক্ষাৎকাৰত ড’নাল্ড ট্ৰাম্পে কয় যে আমি ইমান মূৰ্খ দেশ নহয় যে আমি ইমান বেয়া কাম এটা কৰিম।’ ভাৰতলৈ চাওকচোন। প্ৰধানমন্ত্ৰী নৰেন্দ্ৰ মোডী মোৰ বহুত ভাল বন্ধু। কিন্তু তেওঁলোকে কি কৰে চাওকচোন। মটৰ চাইকেলৰ ওপৰত ১০০ শতাংশ কৰ আৰোপ কৰা হৈছে। আমি তেওঁলোকৰ সামগ্ৰীৰ ওপৰত কোনো শুল্ক আৰোপ নকৰো। হাৰ্লীয়ে যেতিয়া ভাৰতলৈ বাইক প্ৰেৰণ কৰে তেতিয়া ইয়াৰ ওপৰত ১০০ শতাংশ শুল্ক আৰোপ কৰা হয়। আৰু ভাৰতে যেতিয়া ইয়ালৈ ইমান বাইক পঠায় তেতিয়া আমি কোনো শুল্ক নলওঁ। তাৰ পিছত মই প্ৰধানমন্ত্ৰী নৰেন্দ্ৰ মোডীক ফোন কৰি কৈছিলো, “এইটো ঠিক হোৱা নাই”। মোৰ এটা ফোনত টেৰিফ ৰেট ৫০ শতাংশ কৰ্তন কৰা হ’ল। কিন্তু মই ক’লোঁ, এইটো এতিয়াও গ্ৰহণযোগ্য নহয়। ৫০ শতাংশ বনাম শূন্য। তেওঁলোকে কয় যে তেওঁলোকে ইয়াৰ ওপৰত কাম কৰি আছে।’
মন কৰিবলগীয়া যে ইয়াৰ পূৰ্বে ২০২৪ চনৰ ফেব্ৰুৱাৰী মাহত ভাৰতে হাৰ্লি-ডেভিডছনৰ শুল্ক ৫০ শতাংশ হ্ৰাস কৰিছিল। আৰু এইবাৰৰ বাজেটত আৰু অধিক হ্ৰাস কৰা হৈছে।
