ইৰাণক পুনৰ সকীয়াই দিলে আমেৰিকাৰ ৰাষ্ট্ৰপতি ড’নাল্ড ট্ৰাম্পে। বৃহস্পতিবাৰে নিশা ইৰাণৰ বিৰুদ্ধে ‘অতি ভয়াৱহ’ সামৰিক আক্ৰমণ চলাব বুলি তেওঁ ঘোষণা কৰে। ভবিষ্যতে ‘খাৰ্গ দ্বীপ’ৰ নিয়ন্ত্ৰণ ল’ব বুলিও সকীয়াই দিয়ে। অৱশ্যে তেওঁৰ এই বক্তব্যৰ পিছত এতিয়ালৈকে ইৰাণৰ পৰা কোনো প্ৰতিক্ৰিয়া পোৱা হোৱা নাই।
উল্লেখ্য যে ‘খাৰ্গ দ্বীপ’ ইৰাণৰ অৰ্থনীতিৰ অন্যতম গুৰুত্বপূৰ্ণ কেন্দ্ৰ। সেই দেশৰ খাৰুৱা তেলৰ বৃহৎ পৰিমাণ এই দ্বীপৰ টাৰ্মিনেলৰ জৰিয়তে আন্তঃৰাষ্ট্ৰীয় বজাৰলৈ ৰপ্তানি কৰা হয়। ফলত বিশেষজ্ঞসকলৰ মতে এই দ্বীপটোক কেন্দ্ৰ কৰি যিকোনো সামৰিক ব্যৱস্থাই বিশ্ব শক্তি বজাৰত ডাঙৰ প্ৰভাৱ পেলাব পাৰে। দীৰ্ঘদিন ধৰি এই দ্বীপটোৰ নিয়ন্ত্ৰণৰ ওপৰত চকু ৰাখিছে ট্ৰাম্পে।
কিন্তু ট্ৰাম্পে দাবী কৰে যে সামৰিক অভিযান চলালেও দলং, বিদ্যুৎ কেন্দ্ৰ বা অন্যান্য অসামৰিক আন্তঃগাঁথনিক লক্ষ্য কৰি লোৱাৰ আমেৰিকাৰ কোনো উদ্দেশ্য নাই। অৱশ্যে ইৰাণৰ বিৰুদ্ধে সামৰিক হেঁচা বৃদ্ধি পাব বুলি তেওঁ স্পষ্ট কৰি দিয়ে। আজি নিশা ইয়াৰ আভাস দেখা যাব বুলিও তেওঁ কয়।
আন্তঃৰাষ্ট্ৰীয় বিশ্লেষকসকলৰ মতে খাৰ্গ দ্বীপক কেন্দ্ৰ কৰি যিকোনো বৃহৎ সামৰিক কাৰ্য্যই কেৱল ইৰাণতে নহয়, আন্তঃৰাষ্ট্ৰীয় তেল যোগান, হৰমুজ প্ৰণালীৰ মাজেৰে জাহাজ চলোৱা আৰু বিশ্ব অৰ্থনীতিৰ ওপৰতো সুদূৰপ্ৰসাৰী প্ৰভাৱ পেলাব পাৰে।
