কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙক কেন্দ্ৰ কৰি ৰাজ্যজুৰি তীব্ৰ প্ৰতিক্ৰিয়া অব্যাহত থকাৰ মাজতে পোহৰলৈ আহিছে তেওঁৰ পুত্ৰৰ এক বিলাসিতাৰ বিস্ফোৰক তথ্য। ভি জি আৰ আৰু পি জি আৰ ভূমি উচ্ছেদৰ দাবীত উত্তাল হৈ থকা কাৰ্বি পাহাৰত এতিয়া চৰ্চাৰ কেন্দ্ৰবিন্দু হৈ পৰিছে তুলিৰামৰ পুত্ৰ ছিংদং ৰংহাঙে ক্ৰয় কৰা এখন অতি বিলাসী মাৰ্চিডিজ বেঞ্জ বাহন।
প্ৰাপ্ত তথ্য অনুসৰি, চলিত বৰ্ষৰ ফেব্ৰুৱাৰী মাহত ছিংদং ৰংহাঙে ৪ কোটি ৪০ লাখ ৩৯ হাজাৰ ৭০০ টকা ব্যয় কৰি এখন ‘মাৰ্চিডিজ বেঞ্জ জি-ক্লাছ’ৰ মডেলৰ বাহন ক্ৰয় কৰিছে। সংবাদ মাধ্যমত প্ৰকাশিত বাতৰিৰ মতে, যোৱা ১৬ ফেব্ৰুৱাৰীত ‘চি-ইন-২৫০২১৬১৮০২৩৯৭৫২’ নম্বৰৰ অৰ্ডাৰৰ জৰিয়তে এই বাহনখন বুক কৰা হৈছিল। ‘মেনুফেক্টৰ ছাউথ ছি ব্লু’ ৰঙৰ এই বাহনখনৰ সৈতে অন্যান্য দামী সা-সৰঞ্জামৰ নামতো ব্যয় কৰা হৈছে বৃহৎ পৰিমাণৰ ধন।
কাৰ্বি জনসাধাৰণক বহিৰাগতৰ আগ্ৰাসনৰ মাজলৈ ঠেলি দি নিজৰ পৰিয়ালৰ বাবে এনে ৰাজকীয় বিলাসিতাৰ ব্যৱস্থা কৰাক লৈ জিলাখনৰ চুকে-কোণে এতিয়া প্ৰশ্ন উঠিছে। এজন যুৱকৰ হাতলৈ ইমান বিশাল অংকৰ ধন ক’ৰ পৰা আহিল? ইয়াৰ আঁৰত পিতৃৰ ক্ষমতাৰ অপব্যৱহাৰ নেকি বুলিও প্ৰশ্ন উঠিছে?
শেহতীয়াকৈ প্ৰতিবাদকাৰীয়ে তুলিৰাম ৰংহাঙৰ বাসগৃহ জ্বলাই দিয়াৰ পাছত তেওঁ নিজেই বুলডজাৰ চলাই অগ্নিদগ্ধ ঘৰটো চাফ-চিকুণ কৰা কাৰ্যই ৰহস্যৰ সৃষ্টি কৰিছে। সচেতন মহলৰ মতে, নিজৰ বাসগৃহত থকা বহু গুৰুত্বপূৰ্ণ তথা গোপন নথিপত্ৰ বা বেআইনী তথ্য লুকুৱাবলৈহে তেওঁ কোনো চৰকাৰী তদন্তৰ পূৰ্বেই এনেদৰে বুলডজাৰ চলাই ধ্বংসাৱশেষ আঁতৰাই পেলাইছে।
দীৰ্ঘদিন ধৰি পৰিষদৰ শাসনত থকা তুলিৰাম ৰংহাঙৰ বিৰুদ্ধে দুৰ্নীতিৰ অভিযোগ নতুন নহয়। ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাৰ সৈতে থকা মধুৰ সম্পৰ্কৰ বাবেই তেওঁ নিৰ্ভয়ে এনে বিলাসিতা অব্যাহত ৰাখিবলৈ সক্ষম হোৱা বুলি চৰ্চা হৈছে। দেশ-বিদেশৰ বিভিন্ন কাৰ্যসূচীত চৰকাৰী প্ৰতিনিধিৰ দৰে উপস্থিত থকা ৰংহাঙৰ পৰিয়ালৰ এই আকাশলংঘী বিলাসিতাই এতিয়া দৰিদ্ৰ কাৰ্বি ৰাইজক উপহাস কৰা বুলিও চৰ্চা চলিছে।
এফালে ভূমি সুৰক্ষাৰ বাবে ৰাইজৰ হাহাকাৰ আৰু আনফালে শাসকীয় পৰিয়ালৰ কোটিটকীয়া বাহনৰ বিলাসিতা এই বিপৰীত ছবিয়ে কাৰ্বি আংলঙৰ ৰাজনৈতিক পৰিৱেশ অধিক উত্তপ্ত কৰি তুলিছে।
