তুৰস্ক আৰু ছিৰিয়াত হোৱা ভয়াৱহ ভূমিকম্পত এতিয়ালৈকে প্ৰায় ৮ হাজাৰ লোকে প্ৰাণ হেৰুৱাইছে। তিনিদিন ধৰি ধাৰাবাহিকভাৱে দুৰ্গত লোকক উদ্ধাৰৰ চেষ্টা চলাই আহিছে উদ্ধাৰকাৰী দলে। বেয়া বতৰ আৰু তীব্ৰ ঠাণ্ডাত উদ্ধাৰ অভিযান অত্যন্ত কঠিন হৈ পৰিছে।
অৱশ্যে ইয়াৰ মাজতো উদ্ধাৰ কৰ্মীসকলে ধ্বংসাৱশেষত আৱদ্ধ লোকসকলক উলিয়াই উদ্ধাৰ কৰাৰ বাবে নিৰন্তৰভাৱে ব্যস্ত হৈ আছে।
উল্লেখ্য, বৃহৎ পৰিসৰত বিধ্বংসী ৰূপ ধাৰণ কৰা ১৯৯৯ চনৰ পিছত এইটো দ্বিতীয়টো এনে ভূমিকম্প। ৭.৮ প্ৰাবল্যৰ এই ভূমিকম্পৰ ফলত বিদ্যালয়, চিকিৎসালয় আৰু এপাৰ্টমেণ্টৰ হাজাৰ হাজাৰ অট্টালিকা তাচপাচৰ দৰেই ঘহি পৰিছে। খহি পৰা আট্টালিকা তথা আৱাসগৃহৰ ধ্বংসস্তূপত আৱদ্ধ হৈ হাজাৰ হাজাৰ লোকে প্ৰাণ হেৰুৱাইছে।
দুয়োখন দেশতৰ এই পৰ্যন্ত প্ৰায় ৮,০০০ লোকৰ মৃত্যু হোৱা বুলি জানিব পৰা গৈছে। বিশ্ব স্বাস্থ্য সংস্থাৰ মতে ভূমিকম্পত মৃতকৰ সংখ্যা মাত্ৰ এটা দিনতে দুগুণলৈ বৃদ্ধি পাইছে। সংস্থাটোৰ মতে মৃত্যুৰ সংখ্যা আঠগুণলৈ বৃদ্ধি হোৱাৰ সম্ভাৱনা আছে।
ইফালে মৃতকৰ ভিতৰত হাজাৰ হাজাৰ শিশুও থাকিব পাৰে বুলি আশংকা প্ৰকাশ কৰিছে ৰাষ্ট্ৰসংঘই। সোমবাৰে তুৰস্কত এটাৰ পিছত এটাকৈ ৩ টা ভূমিকম্পৰ কঁপাই গৈছিল। যি তিনিটা ভূমিকম্পৰ তীব্ৰতা আছিল ক্ৰমে ৭.৮, ৭.৫ আৰু ৭.৮ প্ৰাবল্যৰ।
বৰ্তমান তুৰস্কত অতিপাত ঠাণ্ডা আৰু এনে পৰিস্থিতিত উদ্ধাৰ অভিযান কঠিন হৈ পৰাত গৃহহীন লোকৰ পৰিস্থিতি অধিক ভয়াৱহ হৈ পৰিছে। এই ভূমিকম্পত মানুহৰ ঘৰ-দুৱাৰ সম্পূৰ্ণৰূপে ধ্বংস হৈ পৰিছে। এনে পৰিস্থিতিত মুকলি আকাশৰ তলত ঠাণ্ডাত সময় কটাবলৈ দুৰ্গত লোকৰ বাবে অতি কঠিন হৈ পৰিছে।
সংবাদ সংস্থা ৰয়টাৰৰ মতে, বহু অঞ্চলত বিদ্যুৎ আৰু তেলৰ নাটনিও হৈছে। ক্ষতিগ্ৰস্ত অঞ্চলত দিনে নিশাই উদ্ধাৰ অভিযানত লিপ্ত হৈছে উদ্ধাৰকাৰী। বহুতে ধ্বংসাৱশেষৰ স্তুপৰ ওপৰেৰে নিজৰ জীৱন ৰক্ষা কৰিবলৈ দৌৰা লগতে আন একাংশই বন্ধু-বান্ধৱী, আত্মীয়-স্বজন আৰু ওচৰ-চুবুৰীয়াক বিচাৰি উলিয়াবলৈও চেষ্টা কৰা দেখা গৈছে। তুৰ্কীৰ ৰাষ্ট্ৰপতি টাইপ এৰদোগানে যোৱা সোমবাৰেই সদৰী কৰিছিল যে বেয়া বতৰৰ বাবে উদ্ধাৰ অভিযান অধিক কঠিন হৈ পৰিছে।
ইফালে, বিশ্ব স্বাস্থ্য সংস্থাৰ সঞ্চালক প্ৰধান টেড্ৰ’ছ আধানম গেব্ৰেইছাছে তুৰস্কৰ পৰিস্থিতিক লৈ উদ্বেগ প্ৰকাশ কৰিছে।ছিৰিয়াকলৈও উদ্বেগ প্ৰকাশ কৰিছে বিশ্ব স্বাস্থ্য সংস্থাই। WHOৰ প্ৰধানজনে কয় যে ইতিমধ্যে গৃহযুদ্ধৰ বাবে বছৰ বছৰ ধৰি মানৱীয় সংকটৰ মাজেৰে পাৰ হোৱা দেশখনে প্ৰাকৃতিক প্ৰলয়ৰ মোকাবিলা কৰিবলগীয়া হৈছে।
শেহতীয়া পৰিসংখ্যা অনুসৰি তুৰস্কত ৫,৪৩৪ জন আৰু ছিৰিয়াত কমেও ১,৮৭২ জন লোকৰ মৃত্যু হৈছে, যাৰ ফলত মুঠ ৭,৩০৬ জন লোকৰ মৃত্যু হৈছে।
বিশ্ব স্বাস্থ্য সংস্থাৰ বিষয়াসকলে অনুমান কৰিছে যে ২০ হাজাৰ পৰ্যন্ত লোকৰ মৃত্যু হ’ব পাৰে। বিশ্ব স্বাস্থ্য সংস্থাই এই বৃহৎ ভূমিকম্পৰ ফলত ২.৩ কোটি লোক ক্ষতিগ্ৰস্ত হ’ব পাৰে বুলি সকীয়াই দি দুয়োখন বিধ্বস্ত দেশকে বিভিন্ন দেশসমূহক সহায় কৰিবলৈ আহ্বান জনায়।
ইয়াৰ মাজতে ছিৰিয়াৰ ৰাষ্ট্ৰপতি বাছাৰ আল আছাদৰ চৰকাৰে ছিৰিয়াৰ বিৰুদ্ধে বলৱৎ হৈ থকা পশ্চিমীয়া দেশসমূহৰ নিষেধাজ্ঞা উঠাই লৈ সাহায্য প্ৰদান কৰিবলৈ আহ্বান জনাইছে। উল্লেখ্য যে গৃহ যুদ্ধৰ ফলত বিধ্বস্ত দেশখনৰ বিৰুদ্ধে পশ্চিমীয়া দেশসমূহৰ বিভিন্ন নিষেধাজ্ঞা বলৱৎ আছে যাৰ ফলত আন্তঃৰাষ্ট্ৰীয় সাহায্য প্ৰচেষ্টা জটিল হৈ পৰিছে।
