কৰ’নাৰ সংকটৰ মাজতে বলীউদৰ সৰু পৰ্দাত এইবাৰ ঘটিল আন এক অঘটন। সৰু পৰ্দাৰ এগৰাকী তাৰকাই আত্মহত্যা কৰাৰ ঘটনা সংঘটিত হৈছে।
বলীউদৰ সৰু পৰ্দাৰ অভিনেতা সমীৰ শৰ্মাই আত্মহত্যা কৰিছে। তেওঁ মুম্বাইৰ নিজৰ বাসগৃহতে আত্মহত্যা কৰে।
‘কাহানী ঘৰ ঘৰ কী’ ধাৰাবাহিকৰ তাৰকা অভিনেতা সমীৰ শৰ্মাৰ আত্মহত্যাৰ ঘটনাত মলাড আৰক্ষীয়ে এজাহাৰ দাখিল কৰিছে।
জানিব পৰা মতে, ৪৪বছৰীয়া অভিনেতা সমীৰ শৰ্মাই মলাড পশ্চিমত অৱস্থিত ছিএচএস বিল্ডিঙত থকা নিজৰ ঘৰতে চিপ লৈ আত্মহত্যা কৰে।
আৰক্ষীয়ে জানিবলৈ দিয়া মতে অভিনেতাগৰাকীৰ আত্মহত্যা দুই-তিনিদিন আগতে সংঘটিত হৈছে। কিয়নো আৰক্ষীয়ে ঘৰটোত প্ৰৱেশ কৰি মৃতদেহটো উৱলিবলৈ আৰম্ভ কৰা দেখা পায়।
আৰক্ষী সূত্ৰই জানিবলৈ দিয়া মতে অভিনেতাগৰাকীয়ে চলিত বছৰৰ ফেব্ৰুৱাৰি মাহত এপাৰ্টমেন্টটো ক্ৰয় কৰিছিল।
বুধবাৰে নিশা কৰ্ত্যৱত থকা চকীদাৰে সমীৰ শৰ্মাৰ শৱটো ওলমি থকা প্ৰত্যক্ষ কৰে। তেওঁৰ শৱটো পাকঘৰৰ ফেনত ওলমি থকা অৱস্থাত উদ্ধাৰ কৰা হয়।
আৰক্ষীয়ে গোটেই ঘৰটোতে তালাচী অভিযান চলাইছে আৰু ঘটনাটোৰ সৈতে বিত্তীয় দিশৰ সম্পৰ্কটোও খুঁটিয়াই চাইছে।
অভিনেতা সমীৰ শৰ্মাই কেইবাখনো টিভি ধাৰাবাহিকত কাম কৰিছিল। ইয়াৰ ভিতৰত আছিল ‘কাহানী ঘৰ ঘৰ কি’, য়ে ৰিস্তে হে প্যাৰ কে’, লেফ্ট ৰাইট লেফ্ট’,গীত হুই চবচে পৰাই’ দিল চাহতা হেই’ ‘আয়ুষ্মান ভৱ’ ‘প্যাৰ কা ক্যা নাম দু’ ইত্যাদি।
অভিনেতাগৰাকীয়ে বিজ্ঞাপন আৰু মডেলিঙৰো কাম কৰিছিল। দিল্লীৰ বাসিন্দা সমীৰ শৰ্মাই অধ্যয়ন সমাপ্ত কৰাৰ পাছত বাংগালোৰলৈ গৈছিল। তাত তেওঁ বিজ্ঞাপন সংস্থাত কাম কৰিছিল।
ইয়াৰ পাছতে তেওঁ মুম্বাইলৈ অভিনয়ৰ সপোন লৈ আহি সেই সপোন বাস্তৱায়িত কৰিবলৈ সক্ষমো হৈছিল।
